NAHÚM 1 - Dios Rimashcata Quillcashcami

¹ Elcos llactamanta, Nahumman Nínive llactata tucuchinamanta muscuipi shina huillashcata quillcashcami.

Mandac Dios Nínive llactata llaquichinamanta

² ¡Mandac Diosca, paipaclla cachun munacmi! Ima shina paita llaquichishca shinallatac llaquichicmi. Paita mana ricunayachiccunata llaquichicmi, paita piñaccunata piñacmi.

³ Mandac Diosca imatapish ruhuacmi. Mana allita ruhuaccunataca llaquichingatacmi. Shina cashpapish mana utca piñaricchu. Mandac Diosca tamya acapana huairapimi purin. Puyuca pai purishca polvomi.

⁴ Pai rimashpaca, mama cuchatapish, achca yacucunatapish chaquichinmi. Basán llactapish, Carmelo urcupish, Líbano llacta sisacunapish, anguyashpa chaquinmi.

⁵ Paipac ñaupapica, urcucunapish chucchunmi, lomacunapish yacuyanmi. Allpapish, cai pachapish, tucui chaipi causaccunapish cuyurinmi.

⁶ Pai piñaricpica, ¿pitac paipac ñaupapi shayaringayari? Nina japiric shina pai piñaricpica, ¿pitac paipac ñaupapi cai pudingayari? Nina talliricuc shinami paica yallita piñarin. Jatun rumicunapish chaupirinmi.

⁷ ¡Mandac Diosca allimi! Llaqui punzhacunapica sinchi torre shinami jarcan. Paita shuyaccunataca cuidanmi.

⁸ Ashtahuanpish paita mana ricusha niccunataca jatun yacu tucuchic shinami tucuchin. Paita piñaccunataca pura tutami catishpa tucuchinga.

⁹ ¿Imamantatac Mandac Diosta piñachisha nicunguichic? Paita piñaccunataca jaicapi mana jataripacta ruhuashpami tucuita tucuchinga.

¹⁰ Quichqui casha yuracuna shina cashpapish, machashca shina cashpapish chaquishca ucsha shinami tucuringuichic.

¹¹ Canmantami Mandac Diosta piñachishpa, mana alli yuyaita cuc runaca llucshirca.

¹² Chaimantami Mandac Diosca: “Paicunaca sinchi cashpapish, achca cashpapish, tucui huañuchishcami canga. Cantaca yallitami llaquichircani, ña mana ashtahuan llaquichishachu.

¹³ Cunanca, cambac jahuapi churashca yugota paquishami, coyundacunatapish pitishami” ninmi.

¹⁴ Nínive llactalla, Mandac Dios mandashpaca: “Cambac shutita jaicapi ama yuyarishca cachun. Cambac diospac huasipi tiyac dioscunatapish imaman riccha dioscunatapish ñutuchishami. Can imapac mana valic cashcamantami chaillapitac enterrana jutcuta ruhuasha” ninmi.

¹⁵ ¡Riquichic, sumac causaimanta alli huillaita huillacmi, jahua urcucunata shamucun! ¡Judá llactalla, canca fiestacunata ruhuailla. Can imatapish Diosman cusha nishcataca cuilla. Millaita ruhuaccunaca mana ashtahuan llaquichingachu, chaica ñami tucui chingarirca!