MIQUEAS 7 - Dios Rimashcata Quillcashcami

Israelcuna mana allita ruhuashcamanta

¹ ¡Aij, ñucalla! ¡Cosechana punzhapi granota tandachishca, tucuita uvasta pallashca, shuc uvasllapish mana tiyac pambapi shinami cani! Micungapacca shuc racimollapish mana tiyanchu. Ñucaca punta pucushca granota tucui shunguhuan micunatami munani.

² Cai pachapica llaquicpish, cashcata ruhuacpish mana tiyanchu. Tucui runacunami huañuchinata munan. Tucui runacunami shuctac runacunata huañuchingapac tucllata churan.

³ Paicunapac maquica ima mana allita ruhuangapac yachachishcami. Jatun mandaccunaca mana allita ruhuangapacmi imatapish cuchun mañacun. Juezcunaca imata pacalla japishpami mandan. Mandacpish, paipac shungu munashcatami riman. Chashnami allita ruhuanataca saquin.

⁴ Paicunapuramanta alli nishca runaca casha shinami. Allita ruhuac runaca zarza yura shinami. ¡Chapac runacuna huillashca shinami, llaquichina punzhapish pactamun! ¡Cunanmi musparishpa imatapish mana ruhuai pudinguichic!

⁵ Ricsishca runa ima nishcata ama cringuichu. Ama chai runapi shunguta churanguichu. Canhuan sueñuc huarmimantapish cuidaringui.

⁶ Churica taitatami camishpa rimanga. Ushica mamatami macanga. Nueraca suegratami llaquichinga. Piñaccunaca quiquin huasi ucupurallatacmi.

⁷ Ashtahuanpish ñucaca Mandac Diospac maquipimi casha. Ñucata quishpichic Diostami shuyasha. ¡Ñucata Mandac Diosca ñuca mañashcataca uyangami!

Israelcuna quiquin llactaman cutinamanta

⁸ Ñucata piñaclla, ñucamanta ama cushicuichu. Ñucaca urmashpapish jatarishallami. Ñuca pura tutapi causacucpica, Mandac Diosmi achicyachinga.

⁹ Ñuca juchata ruhuashcamantami Mandac Diosca piñarirca. Chaimanta cunanca, pai taripashpa, cashcata ruhuangacaman pai llaquichishcataca apacushallami. Paimi ñucataca achic luzman llucchinga. Chashna llucchicpica, pai cashcata ruhuac cashcatami ricusha.

¹⁰ Chaitaca ricushpaca ñucata piñashpa: “¿Canta Mandac Diosca maipitacyari?” nicpish, pingaihuan umata taparingami. Paicunata ñanpi turuta saruc shina llaquichishcataca ñuca ñahuihuantacmi ricusha.

¹¹ Jerusalén muyundi pircacunata allichina punzhami chayamun. Chai punzhapimi, linderocunatapish ashtahuan carupi churanga.

¹² Chai punzhapica Asiria llactamantapish, Egiptomantapish cambacman shamungami. Egiptomanta jatun yacu ladocaman causaccunami mama cucha yacuta, urcuta shamunga.

¹³ Cai pachaca shitashca pamba shinami saquiringa. Cai pachapi causaccuna mana allita ruhuashcamanta chashna canga.

Dios israelcunata llaquishcamanta

¹⁴ Can acllashcacunataca cambac taunahuan michiyari. Paicunaca alli quihua tiyac urcupimi paicunalla causacun. Utca huatacunapi shina, Basán, Galaad urcu quihuacunaman pushaiyari.

¹⁵ Egiptomanta llucchimui punzhapi ruhuashca shinallatac sumacta ruhuashpa ricuchiyari.

¹⁶ Llactacunapi causaccunaca tucui chai sumaccunata ricushpami, yallita pingashpa, maquihuan shimita tapashpa, ringripish mana uyaccuna tucunga.

¹⁷ Paicunaca culebra shina, llucashpa puric animalcuna shinami ñuto allpata micunga. Culebra mancharishpa jutcumanta llucshic shinami chucchunga. Mandac Diospacmanmi manchaihuan chucchushpa cutiringa. Can llaquichinatami manchanga.

¹⁸ Dioslla, saquirishca can acllashcacuna mana allita ruhuashcata perdonashpa, juchacunata cungaricca, ¿pi shuctac Diosta tiyanyari? Canca llaquic cashpami, mana huañui causaita piñaringui.

¹⁹ Canca cutinllatacmi ñucanchictaca llaquingui. Ñucanchic ima mana allita ruhuashcacunataca sarushpami, ñucanchic juchacunataca ucu mama cuchapi shitangui.

²⁰ Canca ñucanchic ñaupa taitacunahuan ari nishca shinami, Jacobopac huahuacunamanpish pactachingui. Taita Abrahamtapish llaquinguimi.