MIQUEAS 6 - Dios Rimashcata Quillcashcami

Mandac Dios israelcunata rimashcamanta

¹ Cunanca, Mandac Dios rimashcata uyaichic. Paica: «¡Lomacuna uyachun, jatarishpa imata rimana cashcata huillaichicyari!

² Urcucunapish, cai pacha callari rumicunapish Mandac Dios ñuca juchanchishpa rimashcata uyaichicyari. Ñucami acllashcacunata juchanchishpa llaquichisha. Israelcunahuan piñarishpami juchanchisha.

³ Ñuca acllashcacunalla, ¿cancunataca imatatac ruhuarcani? Mana cashpaca, ¿imata ruhuashpatac piñachircani? ¡Imata cashpapish huillaichiclla!

⁴ Ñucami Egipto llactamantaca llucchimurcani. Cancuna, chai llactapi huatashca shina causacucpimi, Moisesta, Aaronta, Mariata cachashpa quishpichircani.

⁵ Ñuca acllashcacunalla, cunanca Moab llactata jatun mandac Balac cunashcata yuyarichicyari. Beorpac churi Balaam Sitimmanta Gilgalman chayashpa, imata nishcatapish yuyarichicyari. Chashna yuyarishpami, Mandac Dios ñucaca cashcata ruhuac cashcata yachanguichic» ninmi.

Mandac Dios imata ruhuachun mañashcamanta

⁶ Mandac Diospac ñaupapica, ¿imahuantac ricurigrishayari? Jahua pacha Mandac Diostaca, ¿ima shinatac cumurishpa mañashayari? ¿Animalta huañuchishpa tucui rupachishpachu cuchuyasha? ¿Shuc huatayuc becita cushpachu cuchuyasha?

⁷ Mandac Diosca, ¿huaranga huaranga cari ovejacunata chasquingachu? Mana cashpaca, ¿chunga huaranga tucyacuc aceiteta cucpica cushicungachu? Ñuca mana cazushcamantaca, ¿ñuca punta churitachu cusha? Ñuca juchamantaca, ¿ñucamanta llucshishca huahuatachu cusha?

⁸ Huañunalla runa, ñami Mandac Diosca ima alli canataca huillarca. Mandac Diosca cashcata ruhuachun, llaquic cachun, paipac ñaupapi cumurichunmi munan.

⁹ Judá llactapi causaccunalla, Mandac Dios llactapi causaccunata quishpichingapac cayanmi. Paipac ñaupapi cumuriccunaca yachaisapami. Mandaccunapish uyaichic.

¹⁰ Paica: «Ñucata mana manchac runapac huasipica, ¿shuhuashcacuna tiyangaracchu? ¿Ñuca millana, mana alli medinacuna tiyangaracchu?

¹¹ Mana allita pezac balanzatapish, mana allita medic bolsatapish, ¿allimi nishachu?

¹² Chashnami chai llactapi causaccunaca yallita llaquichishca. Paicunaca llullaccunami. Calluca llullashpa umangapacllami.

¹³ Chaimantami ñucaca cancunataca llaquichircani. Cancunapac juchacunamantami llaquinayaita tucuchircani.

¹⁴ Micushpapish mana sacsanguichu. Yarcaica mana anchuringachu. Imata tandachishpapish mana huacaichi pudinguichu. Imata huacaichishcataca canta piñaccunamanmi cusha.

¹⁵ Tarpushpapish mana cosechanguichu. Olivos granota cutashpapish, chai aceitehuanca mana cahuiringuichu. Uvasta capishpapish vinotaca mana ubianguichu.

¹⁶ Jatun mandac Omri mandashcacunallatacmi pactachircangui. Acab aillucuna imata ruhuashpa causashcatami ruhuashpa purircangui. Chaimantami llaquinayaita tucuchisha. Cai llactapi causaccunatapish burlashpa asingacunami. Canmantami ñuca acllashcacunaca pingaichishca canga» ninmi.