MIQUEAS 5 - Dios Rimashcata Quillcashcami

Belenmanta quishpichicta cachanamanta

¹ ¡Sinchi runanacuna causana Jerusalenlla, tandanacuichicyari! ¡Piñaccunaca pueblota muyushpami shayacun! Israel llacta jueztaca ñahuipi varahuan huactashpami chugrichinga.

² Mandac Diosca: «Efrata nishca Belenlla, canca Judá llacta familiapurapica tucuimanta yalli uchilla pueblomi cangui. Canmantami Israel llactata Mandacca llucshinga. Paica ñaupa huata miranacuimantami shamun» ninmi.

³ Shuc huarmi huicsayuc tucushpa, sajuaringacaman, maijan saquirishca paipac huauqui israelcuna cutimungacamanmi llactallata saquinga.

⁴ Chai Mandacca Mandac Diospac sumac poderhuanmi michinga. Chaimantami paicunaca cushilla causanga. Pai yallita sinchiyachicpimi, mana manchashpa causanga.

⁵ ¡Paimi ñucanchicmanca cushi causaita cunga! Asiriocuna ñucanchic llactaman shamushpa, mandashpa tiyana huasicunata sarunacucpica, canchis michiccunata, pusac mandaccunatami paicunata llaquichichun cachashun.

⁶ Paicunami Nimrod llactatapish, Asiria llactatapish jatun macanacuita cachashpa tucuchinga. Chashnami ñucanchic llactaman shamushpa, Asiriocunapac maquimanta quishpichinga.

⁷ Maijan saquirishca Jacobopac huahuacunapuramanta saquirishcaca Mandac Dios cachashca páramo shina, quihuapi urmacuc tamya shinami canga. Paicunaca mana huañuclla runatachu shuyanga. Ashtahuanpish Mandac Diosmantami japinga.

⁸ Saquirishca Jacobopac huahuacunaca gentecunapac chaupipica shuc león sacha animalcunapac chaupipi cac shinami canga. Huahua león manada ovejacunapac chaupita rishpa, micuc shinami canga. Chashna micucucpica, pipish mana misai pudingachu.

⁹ Chashnami cancunata piñaccunata atinguichic. Chashna ruhuacpimi, cancunata mana ricunayachiccunaca tucui chingaringa.

¹⁰ Mandac Diosca: «Chai punzhacunapica cancunapac caballocunatapish, carretacunatapish cancunapac chaupipimi huañuchishpa chingachisha.

¹¹ Cancunapac llacta pueblocunatapish, torrecunatapish tucui urmachishpami tucuchisha.

¹² Brujocunatapish anchuchishami. Cancunapurapica brujocunaca mana ashtahuan tiyangachu.

¹³ Rumimanta ruhuashca dioscunatapish, imaman ricchac dioscunatapish cancunapac chaupillapitacmi tucuchisha. Shina ruhuacpimi, cancuna ruhuashca dioscunapac ñaupapica mana ashtahuan cumuringuichic.

¹⁴ Asera huarmi diosta yuyarina yuracunatapish, cancunapac llactacunatapish tucuchishami.

¹⁵ Ñucata mana cazuc llactacunataca nina japiric shina, yallita piñarishpami, paicuna ñucata llaquichishca shinallatac llaquichisha» ninmi.