MIQUEAS 3 - Dios Rimashcata Quillcashcami

Israelcunata pushaccunata llaquichinamanta

¹ Shina nicpimi ñucaca: «¡Jacobopac huahua huahuacunalla, israelcunata mandaccunalla, caita uyaichic! ¿Manachu cancunapish cashcata ruhuashpa mandana canguichic?

² Ashtahuanpish cancunaca allita ruhuanata piñashpami, mana allita ruhuanata munanguichic. Tullumantaca caratapish, aichatapish anchuchishpami saquinguichic.

³ Shinallatac ñuca llactapuracunatami micunguichic. Paicunapac caratami anchuchinguichic. Paicunataca mangapi churangapac shinami pitinacushpa, tullucunatapish ñutuchinguichic. Chashnami paicunataca mangapi churana aicha shinata ruhuanguichic.

⁴ Shina ruhuashpapish Mandac Diosta mañanguichicmi. Cancuna mañacpica, paica mana uyangachu. Cancuna juchacunata ruhuashpa causacushcamantami llaqui punzhacunapica, paipac ñahuitaca cancunamanta pacanga» nircani.

⁵ Mandac Diosca llactacunata pandachishpa huillaccunata rimashpaca: «Paicunaca: “Micuna tiyacpica, cushi causaimi tiyanga. Ashtahuanpish micuna mana tiyacpica, macanacuimi tiyanga” nincunami.

⁶ Chaimantami tutaca ña mana ñuca ima nishcataca uyanga. Shamuc punzha ima tucunatapish mana yachangachu. Chai huillaccunapacca intipish tigrangami, punzhapish tutayangami.

⁷ Chaimantami huillaccunapish, adivinocunapish pingaihuan yuyai illac saquiringa. Ñucaca paicuna mañashcataca mana uyashachu. Chaimantami shimita taparinga» ninmi.

⁸ Ashtahuanpish ñucaca Jacobopac huahuacuna mana cazushcata, israelcuna juchallishcata huillangapacmi Mandac Diospac Espirituhuan, poderhuan cani. Paica cashcata ruhuacmi.

⁹ Cunanca, Jacobopac huahuacunata pushaccunapish, israelcunata mandaccunapish caita alli uyaichic. Cancunaca cashcata ruhuanatapish, allita ricushpa mandanatapish millanayachinguichicmi.

¹⁰ Cancunaca runata huañuchishpami Sión llactataca shayachinguichic. Jerusalentaca imatapish mana allita ruhuashcahuanmi allichinguichic.

¹¹ Juezcunaca pacalla imata japishpami, ima llaquitaca allichin. Curacunaca cullquimantami yachachin. Huillaccunapish cullquimantami yachac tucushpa huillan. Chashna ruhuacushpapish Mandac Diostami yuyarinchic nishpaca: “¿Manachu Mandac Diosca ñucanchic-huan? ¡Ima llaquipish ñucanchictaca mana japingachu!” nincunami.

¹² Chaimantami Sión llactataca tarpuna allpata shina yapunga. Jerusalenca rumita montón shinami tucunga. Diospac huasi urcupica sachami jundanga.