MIQUEAS 2 - Dios Rimashcata Quillcashcami

Huacchacunata llaquichiccuna ima tucunamanta

¹ ¡Aij, millaillata yuyashpa causaccunalla! ¡Sueñushpa ima millaita ruhuanata yuyariccunalla! Ña pacarimucpica, paicuna yuyarishca shinallatacmi ruhuan. Paicunaca sinchi mandac cashpami chashna ruhuan.

² Maijanpac allpacunatapish, huasicunatapish yallita munashpami quichun. Paicunaca shuc runata llaquichishpami, paipac familiatapish llaquichishpa, ima charishcacunatapish quichushpa llaquichin.

³ Chaimantami Mandac Diosca: «Riquichic, ñucapish paicunataca yallita llaquichinatami yuyarishcani. Chai llaquimantaca shucllapish mana atingachu. Mana jatun tucushpa puringachu. Chai punzhaca yalli llaquimi canga.

⁴ Chai punzhapica cancunata burlashpami rimanga. Chaimantami cancuna huacashpaca: “¡Yallita llaquichishpa tucuchishcami canchic! Ñucanchicman cushca allpacunataca shuccunami medishpa japicun. ¡Aij, mana llaquishpami, tucui ñucanchic llactacunata quichushca!” ninguichicmi.

⁵ Chaimantami Mandac Diospac acllashcacunapurapica suerteta ruhuashpa, allpacunata chaupingapacca pipish mana tiyanga.

⁶ Paicunaca: “¡Ama huillaichicchu! ¡Chaicunamanta ama huillaichicchu! ¡Ima llaquipish mana japingachu!” nincunami.

⁷ Jacobopac huahua huahuacunaca: “¿Mandac Diospac Espirituca llaquichinata saquishcachu? ¿Paichu cashna llaquichicun? Pai rimashcacunaca allita ruhuashpa causac runataca, ¿manachu allita ruhuan?” ninguichicmi.

⁸ Cancunaca ñuca acllashca gentecunatami piñai callarishcanguichic. Macanacuimanta cutishpa pasacuc soldadocunamantami jahualla churanata quichurcanguichic.

⁹ Ñuca llactapi causac huarmicunatapish paicuna cushilla causana huasicunamantami llucchishpa cacharcanguichic. Paicunaman ñuca cushca huahuacunatapish huiñaitami quichurcanguichic.

¹⁰ ¡Caipica, mana samarina tiyanchu. Chaimanta jatarishpa richiclla! Cai pushtuca yallita mapayashca cashcamantami, tucui tucuchishca canga.

¹¹ Maijan llullac espirituhuan cashpaca: “Ñucaca vinopish, sidrapish tiyangami” nishpa huillacca cai llactapi causaccunapac huillacmi canga.

Mandac Dios runacunata quishpichinamanta

¹² Jacobopac huahua huahuacunataca tucuimi tandachisha. Tucui saquirishca israelcunataca ovejacunata corralpi tandachic shina, shinallatac sumac quihuapi tandachic shinami tandachisha. Chaipica achca runacuna cashcamantami yallita bullanacucunga.

¹³ Ñanta pascacmi, paicunapac ñaupataca huichai rishpa, punguta llucshinga. Paicunata jatun mandacca ñaupashpami ringa. Tucuipac ñaupata ricca Mandac Dios ñucami casha» ninmi.