MIQUEAS 1 - Dios Rimashcata Quillcashcami

Samariatapish, Jerusalentapish llaquichinamanta

¹ Jatun mandac Jotam, Acaz, Ezequías Judá llactata mandacui punzhacunapimi Mandac Diosca Moreset llactamanta Miqueasman Samaria llactatapish, Jerusalentapish llaquichinamanta muscuipi shina huillarca.

² ¡Tucui caipi causaccuna uyaichic! Cai pachapish, tucui caipi ima tiyacpish alli uyaichic. Mandac Dios cancunata llaquichinataca, paipac huasimanta ricuchun.

³ Mandac Diosca pai causacuc huasimanta llucshishpa, urai shamushpami, cai pacha urcucunata puricun.

⁴ Pai sarucpica, urcucunapish, pambacunapish ninapi cera yacuyac shinami yacuyashpa ucuyanga. Jahuamanta yacu talliricuc shinami talliringa.

⁵ Tucui cai llaquicunaca Jacobopac, Israelpac huahuacunapish mana cazushpa juchallishcamantami japinga. Jacobopac huahuacunaca, ¿ima juchacunatatac ruhuarcayari? ¿Manachu Samaria llactapi ruhuashca juchacuna canga? Judá llactapi causaccunaca, ¿ima juchacunatatac ruhuashcayari? ¿Manachu Jerusalenpi ruhuashca juchacuna canga?

⁶ Mandac Diosca: «Chaimantami Samaria llactataca rumi montonta shina ruhuashpa, uvas tarpuna allpata ruhuasha. Pircashca rumicunataca pugru pambamanmi caita, chaita singuchishpa cachasha.

⁷ Paicunapac rumi dioscunatapish ñutuchishami. Chai dioscunaman cushcacunataca ninapimi rupachisha. Chai dioscunataca tucui tucuchishpami shitashca pambata shina ruhuasha. Chaicunataca huainayac huarmicuna pagashca cullquihuanmi ruhuashca carca. Chaicunaca huainayac huarmicunallamantacmi cutinga» ninmi.

⁸ Chai tucui llaquicunamantami huacashpa churanacuna illac, lluchu chaquilla purisha. Chacal, avestruz animal shinami, caparishpa huacasha.

⁹ Samaria llactapi causaccunapac sisu ungüica mana jambipac cashpami Judá llactacaman chayarca. Ñucapaclla, Jerusalén yaicunacamanmi chayarca.

¹⁰ ¡Chai llaquicunataca ama Gat llactapi huillanguichicchu! ¡Ama chai llaquimanta huacanguichicchu! ¡Chai llaquihuanca Bet-le-ofra llactapi llaquirishpa polvopi singugrichic!

¹¹ ¡Safir llactapi causaccunalla, pingaihuan ñaupashpa richicyari! Zaanán llactapi causaccunaca mana llucshincunachu. Bet-esel llactapi causaccunaca llaquihuan cashcamantami cancunataca mana ayudanga.

¹² Mandac Diosllatac Jerusalén pungucaman llaquicunata cachacpica, ¿ima shinatac Marot llactapi causaccunaca cushilla cangayari?

¹³ Laquis llactapi causaccunalla, carretacunata alli callpac caballocunapi huataichicyari. Cancunami, Sionpi causaccunataca juchata ruhuanata callarichircanguichic. Israel llactapi causaccunapish cancunamantami mana cazurca.

¹⁴ Chaimantami cancuna llucshishpa ringapacca, ima charishcacunata Moreset-gat llactapi causaccunaman cunguichic. Aczib llactaca israelcunata urmachingapacmi canga.

¹⁵ Maresa llactapi causaccunalla, cancunapac llactata quichungapacca shuhuaccunami cutinllatac shamunga. Paicuna shamucpimi, llaquilla sisa shina, israelcunaca Adulam quingraipi miticugringa.

¹⁶ Judá llactalla, cancunapac cuyashca huahuacunamantaca llaquirishpa, acchata ruturichicyari. Cancunahuan causaccunata shuctac llactaman prezu apashcamantaca jatun anga shina, lluchu uma tucuichicyari.