SAN MATEO 9 - Dios Rimashcata Quillcashcami

Jesús paralisis ungüi japishca runata alliyachishcamanta

¹ Chai quipami Jesusca canoapi tiyarishpa, jatun yacu cuchata pasashpa, pai causana puebloman chayarca.

² Chaipimi paralisis ungüi japishca runata chacanapi apamurca. Jambirinata crishpa paicuna shamushcata Jesús ricushpami, chai ungushca runataca: —Huahua, sinchiyailla. Cambac juchacunataca perdonanimi— nirca.

³ Chaita maijan mandashcacunata yachachiccuna uyashpaca: —Caica Dios tucushpami, Diosta piñachicun— nishpa, yuyacurca.

⁴ Jesús paicunapac yuyaita yachashpami, paicunataca: —¿Ima nishpatac cancunaca mana allita yuyacunguichic?

⁵ ¿Imata ninatac ashtahuan jahualla: “Juchacunataca perdonanimi” nina, mana cashpaca “jatarishpa, rilla” nina?

⁶ Runa Tucungapac shamushca ñucaca cai pachapi juchacunata perdonaclla cashcata cancuna yachachunmi, cai runataca: “Jatari, canta huandumushca chacanata apashpa, huasiman rilla” nini— nirca.

⁷ Chashna nicpica, chai runaca jatarishpa, paipac huasiman rircallami.

⁸ Chaita tucui gentecuna ricushpaca, runacunaman poderta cushcamantami mancharinacushpa, Diostaca “allimari cangui” nircacuna.

Jesús Mateota cayashcamanta

⁹ Chaimanta Jesús rishpaca, Mateotami Roma llactaman mizapi impuestota japishpa, tiyacucta ricurca. Chaimantami paitaca: —Ñucata cati— nirca. Chashna nicpimi, Mateoca jatarishpa catishpa rirca.

¹⁰ Chaimantaca Jesusca Mateopac huasipimi paipac yachacuccunahuan micucurca. Shinallatac impuestota japic runacunapish, juchayuc cashcamanta chicanyachishca runacunapish chaipimi Jesus-huan mizapi micucurca.

¹¹ Chaimantami fariseocunaca: —¿Ima nishpatac cancunapac yachachicca impuestota japiccunahuanpish, juchayuc cashcamanta chicanyachishca runacunahuanpish micucunyari?— nishpa, yachacuccunaman tapurca.

¹² Chaita Jesús uyashpaca: —Mana ungushcacunaca jambictaca mana mashcanchu, ashtahuanpish ungushcacunallami jambictaca mashcan.

¹³ Diosca: “Animalcunata ñucaman cushpa rupachinapac randica, shungumanta llaquiccuna cachunmi munani” ninmi. Ñucaca cashcata ruhuaccunataca mana cayac shamurcanichu, ashtahuanpish juchayuccunatami llaquirishpa Diosman cuti richun cayac shamurcani— nirca.

Jesús yachachishcaca mushuc cashcamanta

¹⁴ Bautizac Juanpac yachacuccuna shamushpaca: —Ñucanchicpish, fariseocunapish tauca cutinmi ayunanchic. ¿Ima nishpatac cambac yachacuccunaca mana ayunancuna?— nishpa tapurca.

¹⁵ Chashna tapucpimi Jesusca: —¿Bodapi caccunaca, Novio paicunahuan cacpica, llaquillachu canga? Ashtahuanpish Novio illaclla cana punzhacunami chayamucun. Chai punzhapimi ayunanga.

¹⁶ Pipish mauca churanataca, mushuc pañohuanca mana remendanchu. Chashna ruhuacpica, mushuc pañoca uchillayashpa, mauca churanataca ashtahuanmi lliquinman.

¹⁷ Chai shinallatac pipish cunanlla ruhuashca vinotaca, mauca capachupica mana churanchu. Chashna churacpica, capachuca lliquiringami. Chashna lliquiricpica, vinopish, capachupish tucuringami. Chaimantami cunanlla ruhuashca vinotaca, mushuc capachupi churana. Chashna ishcaitac mushuc cashpaca, imapish mana tucungachu— nirca.

Jairopac ushimantapish, Jesuspac churanapi tuparic huarmimantapish

¹⁸ Jesús chashna nicucpimi, israelcunata mandac chayashpa, cungurishpaca: —Ñuca ushimi ñacalla huañun. Shina huañushca cacpipish, can paipac umapi maquita churacpica, causaringallami— nirca.

¹⁹ Chashna nicpimi Jesusca jatarishpa, paipac yachacuccunahuan, runahuan rirca.

²⁰ Chashna ricucpimi, chunga ishcai huatata yahuar cacharirishpa ungushca huarmi, Jesuspac huashata rishpa, churana tuparirca.

²¹ Paipac shungupica: “Jesuspac churanapi tuparishpaca alliyashallami” yuyashpami, chashnaca tuparirca.

²² Chaimanta Jesús tigrarishpa, huarmita ricushpaca: —Huahua, sinchiyailla. Can crishcamantaca ñami alli tucungui— nirca. Chai ratollatacmi huarmica alli tucurca.

²³ Mandacpac huasiman Jesús chayashpa, enterrangapac flautapi tocacuctapish, gentecuna caparishpa huacacuctapish

²⁴ ricushpaca: —Caimanta llucshichic. Huambraca mana huañushcachu, sueñucunllami— nirca. Gentecuna chaita uyashpaca Jesusta burlarcami.

²⁵ Gentecunata llucchishca quipami, Jesusca ucuman yaicushpa, huambrapac maquipi japirirca. Chashna maquipi japiricpica jatarircallami.

²⁶ Jesús chashna ruhuashcaca, tucui chai llactacunapimi yacharirca.

Jesús ishcai ungushca runacunata alliyachishcamanta

²⁷ Jesús chaimanta ricucpimi, ñahui mana ricuc ishcai runacuna catishpa rishpaca: —Mandac Davidpac churi Apunchic Jesús, ¡ñucanchictaca llaquiyari!— nirca.

²⁸ Jesús huasiman yaicucpi, ñahui mana ricuc chai ishcai runacuna paipacman shamucpimi Jesusca: —¿Cancunaca ñuca alliyachinataca cringuichicchu?— nirca. Shina nicpimi, chai runacunaca: —Apunchic Jesús, crinchicmi— nircacuna.

²⁹ Chaimanta Jesús ñahuipi tuparishpaca: —Alliyanata crishcamantaca, cancuna crishca shinallatac alliyaichic— nirca.

³⁰ Paicunapac ñahuica pascarircami. Chaimantami Jesusca: —Pacta cancuna alli tucushcata piman huillanguichicman— nirca.

³¹ Ashtahuanpish chai paicuna chaimanta rishpaca, tucui llactacunapimi Jesús imata ruhuashcataca huillarca.

Mana rimaric runata Jesús alliyachishcamanta

³² Ñahui alliyashca runacuna llucshirishca quipaca, supai japishca, mana rimac runatami Jesuspacman apamurca.

³³ Jesús chai runamanta supaita llucchishpa cachacpica, chai runaca rimai callarircallami. Chaipi caccuna chaita ricushpa, mancharishpaca: “Cai Israelpica jaicapi mana ricushcatami ricunchic” ninacurca.

³⁴ Ashtahuanpish fariseocunaca: “Cai runaca supaicunata mandac diablohuan cashpami, supaicunataca llucchishpa cachan” nircacuna.

“Grano tandanaca achcami” nishcamanta

³⁵ Jesusca tucui pueblocunatapish, llactacunatapish purishpami, israelcuna tandanacuna huasicunapi yachachirca. Dios mandacucmanta alli huillaita huillashpami, tucuilaya ungushcacunatapish alliyachishpa, nanaicunatapish anchuchishpa puricurca.

³⁶ Jesusca tauca gentecuna shitashca, michic illaclla ovejacuna shina, caita chaita puricucta ricushpami, yalli llaquirirca.

³⁷ Chaimantami paipac yachacuccunataca: —Granota tandanaca achcami. Tandaccunaca ashallami.

³⁸ Chaimanta ashtahuan tandaccunata cachachun, Chagrayucta mañaichic— nirca.