SAN MATEO 8 - Dios Rimashcata Quillcashcami

Ungushca runata Jesús alliyachishcamanta

¹ Jesús urcumanta cuticpica, achca gentecunami catimurca.

² Chaiman leprahuan ungushca runa shamushpa, Jesuspac ñaupapi cumurishpaca: —Apunchic Jesús, can alliyachisha nishpaca, alliyachinguimanllami— nirca.

³ Shina nicpimi Jesusca: —Ari, alliyachisha ninimi. Alliyai— nishpa, maquihuan tuparicpica, lepra ungüica runamanta chingarircami.

⁴ Shinallatac Jesusca: —Riqui, canta alliyachishcataca, pacta piman huillanguiman. Cunanca Israel curaman ricuchishpa, Moisés mandashca shinallatac ofrendata cugringui— nirca.

Soldadocunata mandacpac servicta Jesús alliyachishcamanta

⁵ Jesús Capernaúm puebloman chayagricucpi, Roma llactamanta pasac soldadocunata mandac cuchuyashpaca:

⁶ —Apunchic Jesús, ñuca huasipimi ñucata servicca paralisis ungüihuanmi llaquita apacun— nirca.

⁷ Shina nicpimi Jesusca: —Shinashpaca, alliyachingapac risha— nirca.

⁸ Shina nicpimi, soldadocunata mandacca: —Apunchic Jesús, ¿ñuca ima alli cacpitac, ñuca huasimanca risha ninguiyari? Can caimanta alliyachun nilla. Chashna nicpica, alliyangallami.

⁹ Ñucaca shuc mandacpac mandashcapish, soldadocunata mandacpishmi cani. Maijan soldadota “ri” nicpica, rinllami. Cutin maijanta “shamui” nicpica shamunllami. Ñuca servicta “imata ruhuai” nicpica, ruhuanllami— nirca.

¹⁰ Chaita Jesús uyashpaca mancharircami. Chaimantami paita caticcunataca: —Cashna cric runataca, israelcunapurapipish mana tarishcanichu. Chaica chashnatacmi.

¹¹ Ñucaca ninimi: Achcacunami inti llucshinamanta, inti yaicunamanta tandarishpa, ñaupa taita Abrahamhuan, Isaac-huan, Jacobohuan jahua pacha Dios mandacucpi micungapac tiyaringa.

¹² Ashtahuanpish Dios mandacucman yaicungapac caccunaca, canzhapimi, purapi huacaihuan quiru caniringa— nirca.

¹³ Chaimantami Jesusca soldadocunata mandactaca: —Huasiman rilla. Can crishca shinallatac alliyangallami— nirca. Chai nishca horasllatacmi, chai servicca alli tucurca.

Pedropac suegrata Jesús alliyachishcamanta

¹⁴ Jesusca Pedropac huasiman rishpami, Pedropac suegra fiebrehuan camapi siricucta ricurca.

¹⁵ Shina ricushpami, Jesusca paipac maquipi tuparirca. Chashna tuparicpi, chai fiebre anchuricpica, jatarishpa paicunaman micunata carai callarircami.

Achca ungushcacunata Jesús alliyachishcamanta

¹⁶ Chishiyamuctami supai japishcacunata Jesuspacman apamurca. Chashna apamucpica, Jesusca pai rimashcallahuanmi supaicunata llucchishpa cacharca. Shinallatac tucui ungushcacunatapish alliyachircami.

¹⁷ Chaica, Dios ima nishcata huillac Isaías huillashca pactachunmi, chashnaca tucurca. Pai huillashpaca: «Pai quiquinmi ñucanchic ungüicunatapish alliyachirca, nanaicunatapish aparca» nishcami.

Jesusta catisha niccunamanta

¹⁸ Jesusca tauca gentecuna muyushpa shayacucta ricushpami, yachacuccunataca yacu cuchata chimbachun mandarca.

¹⁹ Chaipimi mandashcacunata yachachic runa cuchuyashpaca: —Yachachic, can maita ricpipish, catishami— nirca.

²⁰ Chashna nicpimi Jesusca: —Atuccunapish machaita charinmi. Volac animalcunapish cuzhata charinmi. Ashtahuanpish Runa Tucungapac shamushca ñucaca, maipi umata samachinallatapish mana charinichu— nirca.

²¹ Shina nicpimi, yachacuccunapuramanta shucca: —Apunchic Jesús, shuyai, ñuca taitatarac enterramugrisha— nirca.

²² Shina nicpimi Jesusca: —Saqui, huañushcacuna huañushcacunata enterrachun. Canca catilla— nirca.

Jesús huairata parachishcamanta

²³ Jesusca canoapi tiyarishpami, paipac yachacuccunahuan rirca.

²⁴ Chashna ricucpimi, yalli huaira jatarishpa, yacuta cuyuchishpa canoata ucuyachigrirca. Chashna cacpipish, Jesusca sueñucurcami.

²⁵ Chaimantami paipac yachacuccuna Jesusta ricchachingapac rishpaca: —Apunchic Jesús, ¡ña ucuyagrinchicca! ¡Ñucanchicta quishpichiyari!— nirca.

²⁶ Chaimanta Jesús riccharishpaca: —Mana tucui shunguhuan criccunalla, ¿ima nishpatac yallita mancharicunguichic?— nirca. Chaimantami Jesusca jatarishpa yacutapish cuchatapish rimarca. Shina rimacpica, huairapish, cuchapish casilla tucurcami.

²⁷ Chaimantami paicunapura mancharinacushpa: —¿Pitac cai runaca? Chaica huairapish, yacupish cazunmi— ninacurca.

Gadara llactapi supai japishca ishcai runamanta

²⁸ Jesús yacuta pasashpaca, Gadara llactamanmi chayarca. Chaipimi supai japishca ishcai runacunaca panteonmanta Jesuspacman shamurca. Paicunaca yalli millaicunami carca. Chaimantami chai ñantaca, pi mana pasai pudirca.

²⁹ Paicuna Jesuspacman chayashpaca: —Diospac Churi Jesús, ¿imatatac nic shamungui? ¿Canca manarac llaquichina punzha chayamucpichu llaquichi shamungui?— nishpa caparirca.

³⁰ Paicunapacmanta carupimi achca cuchicuna micushpa puricurca.

³¹ Chaimantami chai supaicunaca: —Ñucanchicta runacunamanta llucchishpaca, chai cuchicunapi yaicuchun saqui— nishpa mañarca.

³² Chashna nicpimi Jesusca: —Richiclla— nirca. Chaimantami supaicunaca chai cuchicunapi yaicungapac rirca. Chashna yaicucpica, cuchicunaca jahua quingraimanta singushpami, yacupi aguarishpa tucui huañurca.

³³ Chashna tucucta ricushpami, cuchicunata michiccunaca mancharishpa, tucui chai imalla tucushcatapish, supai japishcacuna ima tucushcatapish pueblopi huillagrirca.

³⁴ Chashna huillacta uyashpaca, tucui chai pueblopi causac gentecunami Jesuspacman shamurca. Chashna shamushpaca: “Cai llactamantaca rilla” nishpami mañarca.