SAN MATEO 7 - Dios Rimashcata Quillcashcami

Shuccunata mana juchanchina cashcamanta

¹ Ama shuccunata juchanchinguichicchu, pacta cancunatapish Diosca juchanchinman.

² Cancuna ima shinami shuccunata juchanchinguichic, chashnallatacmi cancunatapish Diosca juchanchinga. Ima shinami shuccunata ruhuanguichic, chashnallatacmi cancunatapish ruhuanga.

³ ¿Ima nishpatac quiquin ñahuipi tiyacuc caspita mana ricushpa, shucpac ñahuipi tiyacuc uchilla ucshatarac ricungui?

⁴ Cambac ñahuipi caspi tiyacucpica, ¿ima shinatac caishuctaca: “Shamui, cambac ñahuimanta ucshata llucchisha” ninguiyari?

⁵ Mishqui shimi, jayac shungu, cambac ñahuimantarac caspita llucchi. Chashna llucchishpami, alli ricushpa, caishucpac ñahuimanta uchilla ucshataca llucchingui.

⁶ Dios cushcataca ama allcucunaman cunguichicchu. Achca valishca perlastapish ama cuchicunaman cunguichicchu. Chashna cucpica, yangamanta sarungacunami. Chai allcucunaca cancunataca mana ricunayachishpa llaquichingami.

Japina yuyailla Diosta mañanamanta

⁷ Diosta mañaichic, paica cungami. Mashcaichic, taringuichicmi. Huasiyuc nichic, paica pascangami.

⁸ Maijanpish mañacca japinmi. Maijanpish mashcacca tarinmi. Huasiyuc nictaca yaicuchinmi.

⁹ ¿Cancunapuramanta maijantac huahua tandata mañacpica, rumita cunguichic?

¹⁰ ¿Challuata mañacpica, culebrata cunguichicchu?

¹¹ Cancuna millaicuna cashpapish, cancunapac huahuacuna imata mañacpica, allicunatami cunguichic. Ashtahuanpish jahua pacha Dioscarin, maijanpish mañacpica, allicunatami cunga.

¹² Ima shinami shuccuna cancunaman allita ruhuachun ninguichic, chashnallatac cancunapish shuccunaman allita ruhuaichic. Chaitami Moisés mandashcacunapipish, Dios ima nishcata huillashcapipish nicun.

Quichqui punguta yaicuna cashcamanta

¹³ Quichqui punguta yaicuichic. Chaica chingarinaman apac ñanpish, pungupish purinalla anchomi. Taucacunami chaitaca yaicun.

¹⁴ Ashtahuanpish huiñai causaiman apac ñanpish, pungupish quichquimi, mana yaicuipacllachu. Ashallami chaitaca yaicun.

Yuraca pucushpami, ima yura cashcataca ricuchin

¹⁵ Cancunapacman shamuc llulla huillaccunamanta cuidaringuichic. Paicunaca oveja carata churarishca, cutin ucu shungupica, atuc shina millaicunami.

¹⁶ Paicuna ima shina cashcataca, paicunapac ruhuashcata ricushpami ricsinguichic. Casha yuraca mana uvasta pucunchu. Cardos yurapish, higota mana pucunchu.

¹⁷ Alli yuraca alli granotami pucun. Mana alli yuraca, mana alli granotami pucun.

¹⁸ Alli yuraca, mana alli granotaca mana pucunchu. Mana alli yurapish, alli granotaca mana pucunchu.

¹⁹ Mana alli granota pucuc yurataca, tucui pitishpa ninapi shitanami.

²⁰ Paicuna ima ruhuashcata ricushpami llullashpa huillac cashcataca yachanguichic.

Dios mandacucman mana tucui yaicunamanta

²¹ Mana tucui ‘Apunchic Jesús, Apunchic Jesús’ niccunachu jahua pacha Dios mandacucmanca yaicunga, ashtahuanpish jahua pacha cac ñuca Taita munashcata ruhuaccunallami yaicunga.

²² Taripana punzhapica taucacunami: “Apunchic Jesús, Apunchic Jesús, cambac shutipimi huillacurcanchic, supaicunatapish llucchircanchic, milagrocunatapish ruhuarcanchic” ningacuna.

²³ Chashna cacpica ñucaca: “Cancunataca mana ricsinichu. Anchurichic, millaita ruhuaccuna” nishami.

Ishcai huasichicmanta Jesús chimbapurashpa parlashcamanta

²⁴ Maijanpish cai nishcata uyashpa cazucca, shuc alli yuyaiyuc, sinchi rumi allpapi huasichic runa shinami.

²⁵ Chashna sinchi rumi allpapi ruhuashca huasi cashpami, mashnata tamyacpipish, mashnata huairacpipish mana urmarca.

²⁶ Maijanpish cai nishcata uyashpa mana cazucca, shuc yuyai illac runa cabia allpapi huasichic shinami.

²⁷ Shina huasichishcataca, yalli tamyacpi, yacu shamucpi, huaira huactacpica, urmashpa llaquimi tucurca» nirca.

²⁸ Jesús chashna yachachicpica, tucui uyaccunami mancharishpa saquirirca.

²⁹ Jesusca mana mandashcacunata yachachic shinachu yachachirca, ashtahuanpish paillatac mandac cashpami, allita yachachirca.