SAN MATEO 5 - Dios Rimashcata Quillcashcami

Urcu jahuapi Jesús yachachishcamanta

¹ Jesusca achca gentecuna paita caticucta ricushpami, urcu jahuaman rirca. Chaipi tiyacucpimi, paipac yachacuccunaca cuchuyarca.

² Chaipimi Jesusca cashna nishpa yachachi callarirca:

Cushicuichic nishcamanta

³ «Juchayuc cashcamanta Diosta mashcaccuna, ¡cushicuichic! Jahua pacha Dios mandacucca cancunapacmi.

⁴ Shungupi llaquilla caccuna, ¡cushicuichic! Diosmi cancunataca cushichinga.

⁵ Llaquilla shungucuna, ¡cushicuichic! Cancunami Dios cusha nishca llactataca japinguichic.

⁶ Yarcaihuan yacunayaihuan shina, cashcata ruhuanata munaccuna, ¡cushicuichic! Diosmi chaita pactachichun saquinga.

⁷ Llaquiccuna, ¡cushicuichic! Cancunatapish Diosca llaquingami.

⁸ Shungupi millai yuyaita mana chariccuna, ¡cushicuichic! Cancunami Diostaca ricunguichic.

⁹ Piñanacushcata allichiccuna, ¡cushicuichic! Cancunami Diospac huahuacuna canguichic.

¹⁰ Cashcata ruhuashcamanta llaquita apaccuna, ¡cushicuichic! Jahua pacha Dios mandacucca cancunapacmi.

¹¹ Ñucata caticushcamanta piñashca, pipish llullashpa rimashca, llaquichishca caccuna, ¡cushicuichic!

¹² Chashna llaquichicpipish, ¡cushicuichiclla! Diosca jahua pachapimi, cancuna japina cashcata yallita cunga. Ñaupa punzhapipish Dios ima nishcata huillaccunataca llaquichircacunami.

Cachi shina, luz shina canamanta

¹³ Cancunaca cai pachapi causaccunapacca, cachi shinami canguichic. Cachi gamuyashpaca, ¿imapactac valinga? Mana imapac valinchu. Canzhapi gentecuna saruchun shitangapacllami valin.

¹⁴ Cancunaca cai pachapi causaccunapacca, luz shinami canguichic. Urcu jahuapi tiyac huasicunaca, mana pacallachu.

¹⁵ Luzta japichishpaca mana cajón ucupi churanchu, ashtahuanpish ucupi caccunata achicyachichunmi, pata jahuapi churan.

¹⁶ Cancunapish, cai pachapi causaccunapac ñaupapica, allita ruhuashpa causaichic. Chashnami luz shina canguichic. Cancuna chashna cacpimi, jahua pachapi tiyac cancunapac Diostaca ‘allimari cangui’ ningacuna.

Mandashcacunata yachachishcamanta

¹⁷ Ñucataca ‘Mandashcacunata, Dios ima nishcata huillaccuna huillashcata anchuchingapacmi shamushca’ nishpaca, ama yuyanguichicchu, ashtahuanpish mandashcacunata pactachingapacmi shamurcani.

¹⁸ Cai pacha, jahua pacha tucuringacaman, mandashcacunamantaca shuc rimaillapish, shuc puntollapish mana chingaringachu, tucui pactacungallami. Chaica chashnatacmi canga.

¹⁹ Maijanpish cai mandashcacunamanta uchilla mandashcata mana cazushpa, gentecunaman yachachicca, jahua pacha Dios mandacucpica uchilla nishcami canga. Maijanpish cai mandashcacunata cazushpa shuccunamanpish yachachicca, jahua pacha Dios mandacucpica, alli nishcami canga.

²⁰ Yachachiccunatapish, fariseocunatapish atishpa mandashcacunata mana pactachishpaca, jahua pacha Dios mandacucmanca jaicapi mana yaicunguichicchu.

Pitapish mana piñanamanta

²¹ Cancunapac ñaupa taitacunaman huillashpa: “Ama huañuchinguichu. Maijanpish huañuchictaca, juezpacman apashpa llaquichishcami canga” nishcatami uyarcanguichic.

²² Ashtahuanpish ñucaca: Maijanpish piñactaca, juezpacman apashpa llaquichishcami canga. Maijanpish muspa nictaca, mandaccunapura tandanacushcapacman apashpa, llaquichishcami canga. Maijanpish imatapish rimactaca, ucu pacha ninaman shitana nishcami canga ninimi.

²³ Chaimanta ofrendata altarpi churangapacpish maijanhuan piñanacushca cashcata chaipi yuyarishpaca,

²⁴ ofrendata altar ñaupapi saquishpa, allichimugrichun. Chai quipaca, ofrendata cunguillami.

²⁵ Maijan canta juezpacman cayachigricpica, manarac juezpacman chayashpa, canta cayachic-huan alli tucungui. Mana cashpaca juezman cucpi, juezca soldadocunaman cushpa cantaca carcelpi churangami.

²⁶ Chaimantaca tucui cullquita cungacaman mana llucshinguichu. Chaica chashnatacmi canga.

Cazarashca jahua mana huainayanamanta

²⁷ Shinallatac ñaupaca: “Cazarashca jahua ama huainayanguichu” nishcatami uyarcanguichic.

²⁸ Ashtahuanpish ñucaca: Maijanpish shuc huarmita munashpaca, paipac shungupica ña huainayanmi.

²⁹ Chaimanta cambac alli lado ñahui juchapi urmachisha nicpica, surcushpa shitangui. Tucui cuerpo ucu pacha ninaman shitashca canapac randica, chulla ñahuillata chingachinami canmanca ashtahuan alli canga.

³⁰ Cambac alli lado maqui juchapi urmachisha nicpica, pitishpa shitangui. Tucui cuerpo ucu pacha ninapi shitashca canapac randica, cambac chulla maquillata chingachinami ashtahuan alli canga.

Cazarashcacuna mana raquirina cashcamanta

³¹ Shinallatac ñaupaca: “Maijanpish cazarashca cashpa, paipac huarmimanta raquirisha nicca, firmata cushpa raquirichunlla” nishcatami uyashcanguichic.

³² Ashtahuanpish ñucaca cashnami nini: Maijan caripish paipac huarmi manapish shuc-huan cacta yachashpa raquiricpica, chai huarmica paimantami shuc-huan huainayanacushpa juchallin. Shinallatac maijanpish chai raquirishca huarmihuan cazarashpaca, juchallinmi.

Diospac shutita mana yangalla rimana cashcamanta

³³ Shinallatac cancunapac ñaupa taitacunamanca: “Diospac shutipi imata ari nishpaca, pactachingui” nishcatami uyashcanguichic.

³⁴ Ashtahuanpish ñucaca cashnami nini: Diospac shutipica shinachari jahua pacha Dios mandashpa tiyarinamantapish,

³⁵ shinachari paipac chaqui saruna cai allpamantapish, shinachari Jerusalén Jatun Mandacpac pueblomantapish,

³⁶ shinachari quiquinllamantapish, pai Diospac shutipica ama rimaichicchu. Ashtahuanpish cancunaca cancunapac shuc acchallatapish yuractaca yanaman, yanataca yuracman mana tigrachi pudinguichicchu.

³⁷ Imatapish ari nina cacpica, ari nichic. Mana nina cacpica, mana nichic. Manapish cashcata nina yuyaicunaca, diablomantami shamun.

Maijan imata quichucpipish, macacpipish saquinalla cashcamanta

³⁸ Shinallatac ñaupaca: “Maijanpish ñahuita surcuctaca, paitapish ñahuita surcunami. Quiruta surcuctaca, paitapish quiruta surcunami” nishcatami uyarcanguichic.

³⁹ Ashtahuanpish ñucaca: Piñactaca ama piñanguichu, ashtahuanpish maijan canta alli lado jazhapi huactacpica, lluqui lado jazhapipish huactachun saquingui.

⁴⁰ Maijanpish camisata quichusha nishpa juezpacman cayachicpica, ashtahuan valishca jahualla churanatapish cungui.

⁴¹ Maijan quipita shuc kilometrota apashpa cui nicpica, ishcai kilometrota apangui.

⁴² Mañacmanca, cunguilla. Maijanpish imata mañacpica, ama misarishpa mañachinguichiclla.

Piñaccunata cuyana cashcamanta

⁴³ Ñaupaca: “Canta cuyactaca cuyangui, piñactaca piñangui” nishcatami uyarcanguichic.

⁴⁴ Ashtahuanpish ñucaca: Piñaccunata cuyaichic, shinallatac cancunata llaquichiccunamanta Diosta mañaichic ninimi

⁴⁵ Chashnami jahua pacha Diospac huahuacuna canguichic. Paica allicunaman, mana allicunaman, paita cazuccunaman, mana cazuccunamanmi intitapish, tamyatapish cachanlla.

⁴⁶ Cancuna maijan cuyaccunallata cuyashpaca, ¿ima allitatac Diosmantaca japinguichic? Chaitacarin Roma llactaman impuestota japiccunapish ruhuancunami.

⁴⁷ Shinallatac cancunapuralla alabadunacushpaca, ima allita mana ruhuanguichicchu. Diosta mana ricsiccunapish chashnaca ruhuancunami.

⁴⁸ Jahua pacha Dios ima shinami allita can, chashnallatac cancunapish allita caichic.