SAN MATEO 4 - Dios Rimashcata Quillcashcami

Diablo Jesusta pandachisha nishcamanta

¹ Chai quipaca, Diospac Espiritumi Jesustaca diablo shitashca pambaman pusharca. Chaipimi diabloca pandachisha nirca.

² Chaipi chuscu chunga punzhata, chuscu chunga tutata mana micushca cashpami, Jesusca yarcachirca.

³ Chashna cacpimi, diablo Jesuspacman cuchuyashpaca: —Can Diospac Churi cashpaca, cai rumicunata tanda tucuchun ni— nirca.

⁴ Chashna nicpimi Jesusca: —Dios quillcachishcapica: “Gentecunaca mana tandallahuanchu causanga, ashtahuanpish Dios rimashcahuanmi causanga” ninmi— nirca.

⁵ Chaimantaca diabloca, Diospaclla Jerusalén puebloman Jesusta pushashpa, Diosta mañana huasi jahuapi

⁶ churashpaca: —Can Diospac Churi cashpaca, caimanta shitari. Dios quillcachishcapica: “Ama huactarichunca, Diosmi paipac angelcunata jarcachun cachanga. Chaquillatapish ama chugririchunca, angelcunami maquipi chasquinga” ninmi— nirca.

⁷ Chashna nicpimi Jesusca: —Dios quillcachishcapica: “Canta Mandac Diosta ama pandachisha nichun” ninmi— nirca.

⁸ Diabloca Jesusta jatun urcuman pushashpa, tucui llactacunapi ima tiyashca sumaccunata ricuchishpaca:

⁹ —Can ñucata cungurishpa adoracpica, cai tucuitami canman cusha— nirca.

¹⁰ Shina nicpimi Jesusca: —¡Anchuri caimanta Satanás! Dios quillcachishcapica: “Canta Mandac Diosllata alli ningui, paillata servingui” ninmi— nirca.

¹¹ Shina nicpimi, diabloca saquishpa rircalla. Chai quipami angelcunaca Jesusta servingapac shamurca.

Galilea llactapi Jesús huillai callarishcamanta

¹² Jesusca Bautizac Juan prezu cacta uyashpami, Galilea llactaman rirca.

¹³ Shina cashpapish Nazaret pueblopica ña mana causagrircachu, ashtahuanpish Galilea jatun cucha patapi cac Capernaúm pueblopimi causagrirca. Chai puebloca ñaupa taita Zabulonpac, Neftalipac causana llactapimi carca.

¹⁴ Dios ima nishcata huillac Isaías huillashca pactachunmi, chaipi causagrirca.

¹⁵ Paica: «¡Zabulonpac, Neftalipac causana Galilea llactalla! ¡Jordán yacu chimba ladopi cac, jatun cucha patapi tiyac, mana israelcuna causana Galilea llactalla!

¹⁶ Amsapi causac cancunami shuc jatun luzta ricurca. Amsapi huañunalla caccunatami, chai luzca achicyachirca» nishcami.

¹⁷ Chaimanta pachami Jesusca: «Diosca ñami mandagrin. Chaimanta juchayuc cashcamanta llaquirishpa, Diosman cutirichic» nishpa, huillai callarirca.

Challuata japic chuscu runata Jesús acllashcamanta

¹⁸ Jesusca Galilea cucha patata puricushpami, ishcai huauquindi runacunata ricurca. Shucca Simón nishca Pedro, shinallatac Andresmi carca. Paicunaca challuata japiccuna cashpami, linchita yacupi shitacurca.

¹⁹ Chaipimi Jesusca paicunataca: —Ñucahuan jacuchic. Cancunataca challuata japic shina, gentecunata Diospacman pushamuchunmi yachachisha— nirca.

²⁰ Shina nicpica, linchicunata chai pambapi saquishpa, Jesusta catishpa rircacunallami.

²¹ Jesús chaimanta rishpaca, Zebedeopac churi huauquindipura Jacobota, Juantami ricurca. Paicunaca challuata japina linchicunata taita Zebedeohuan siracurca. Jesusca paicunatapish cayarcami.

²² Chaimantami canoatapish, paicunapac taitatapish saquishpa, Jesusta catishpa rirca.

Tauca gentecunata Jesús alliyachishcamanta

²³ Jesusca tucui Galilea llacta israelcuna tandanacuna huasipimi yachachishpa puricurca. Dios mandanamanta alli huillaita huillashpami, tucuilaya ungüihuan, nanaihuan cac gentecunatapish alliyachishpa puricurca.

²⁴ Chai ruhuashcaca tucui Siria llactapimi uyarirca. Shina uyaricpimi, Jesuspacmanca nanaihuan caccunatapish, ungüihuan llaquilla caccunatapish, supai japishca caccunatapish, yuyai illac tucushcacunatapish, paralisis ungüihuan caccunatapish apamurca. Jesusca tucui chai ungushcacunatami alliyachirca.

²⁵ Chaimantami Galilea llactamantapish, Decápolis nishca chunga pueblocunamantapish, Jerusalén pueblomantapish, Judea llactamantapish, Jordán yacu chimba ladopi cac llactacunamantapish, achca gentecuna Jesustaca catirca.