SAN MATEO 28 - Dios Rimashcata Quillcashcami

Jesús causarishcamanta

¹ Samana punzha cayandi domingo pacarinatami Magdala pueblomanta Mariaca caishuc Mariahuan Jesusta enterrashcata ricungapac rirca.

² Paicuna chayacucpimi, cungailla allpa yallita chucchurca. Mandac Diospac angelmi jahua pachamanta shamushpa, Jesusta enterrashcata huichcashca rumita anchuchishpa, chai rumi jahuapi tiyarirca.

³ Chai angelca relampa shinami carca. Paipac churanaca rasu shina yuranllami carca.

⁴ Chaita ricushpami, soldadocunaca manchaihuan chucchushpa, huañushca shina saquirirca.

⁵ Angelca huarmicunataca: «Ama mancharichicchu. Cruzpi chacatashca Jesusta mashcacushcataca yachanimi.

⁶ Paica mana caipichu. Pai nishca shinami ña causarirca. Paita maipi churashcata ricuc shamuichic.

⁷ Cunanca: “Jesusca ñami huañushcacunapuramanta causarishpa, Galilea llactaman rishca. Chaipimi paita ricunguichic” nishpa, utca paipac yachacuccunaman huillagrichic. Chaitami ñucaca cancunaman huillana carcani» nirca.

⁸ Chaimantami huarmicunaca manchaihuan cashpapish cushilla jutcumanta llucshishpa, yachacuccunaman huillangapac callparca.

⁹ Chashna ricucpimi, Jesusca paicunaman ricurishpa alabadurca. Chaipimi huarmicunaca cushicushpa, Jesuspacman cuchuyashpa chaquipi ucllarishpa, “allimari cangui” nircacuna.

¹⁰ Chashna ruhuacpica Jesusca: —Ama mancharichicchu. Cunanca, Galilea llactapi ñucata ricugrichun ñucata catic huauquicunaman huillagrichic. Chaipimi ñucata ricunguichic ninmi nigrichic— nirca.

Ima tucushcata soldadocuna huillashcamanta

¹¹ Huarmicuna huillangapac ringacamanca, enterrashca jutcuta cuidaccunapuramanta maijancuna Jerusalén puebloman rishpa, curacunata mandac curacunamanmi tucui imalla tucushcata huillarca.

¹² Chashna huillacpimi, curacunata mandac curacunahuan, pushac yuyaccunahuan tandanacushpa parlanacurca. Chaimantami soldadocunaman achca cullquita cushpa,

¹³ cashna yuyaita curca: «Cancunaca: “Ñucanchic sueñucucpimi, tuta paipac yachacuccuna shamushpa, cuerpotaca shuhuashca” ninguichic.

¹⁴ Chaita mandac Pilato yachashpa, cancunata llaquichisha nicpica, ñucanchic cancunamanta paihuan parlashunllami» nirca.

¹⁵ Soldadocuna cullquita japishpaca, paicuna nishca shinami ruhuarca. Chashna nishcataca, cunan punzhacamanmi israelcunaca parlanacun.

Tucuiman huillachun Jesús mingashcamanta

¹⁶ Chunga shuc yachacuccunaca Jesús maiman tupachun nishpa mandashca shinami, Galilea llactapi tiyac urcuman rirca.

¹⁷ Jesusta chaipi ricushpaca, “allimari cangui” nircami. Ashtahuanpish maijancunaca pai cashcata mana yuyacurcachu.

¹⁸ Jesús paicunapacman cuchuyashpaca: «Diosca ñucamanmi cai pachatapish, jahua pachatapish mandachun poderta curca.

¹⁹ Chaimanta tucui cai pacha llactacunaman rishpa, ñuca yachacuccunata ruhuaichic. Paicunataca Taitapac, Churipac, Espiritupac shutipi bautizanguichic.

²⁰ Ñuca cancunaman mandashpa yachachishcacunata paicunapish cazuchun yachachinguichic. Ñucaca cai pacha tucuringacamanmi, cancunahuanca casha» nirca.