SAN MATEO 27 - Dios Rimashcata Quillcashcami

Pilatopacpaman Jesusta apashcamanta

¹ Pacarimucucpimi, curacunata mandac curacunapish, israelcunata pushac yuyaccunapish Jesusta ima shina huañuchinata yuyarinacurca.

² Shina yuyarishpami, Jesusta huatashpa, chai llactata mandachun mandac Pilatopacman aparca.

Judas Iscariote huañushcamanta

³ Japichic Judasca Jesusta huañuchigricucta yachashpami, llaquirishpa, chai quimsa chunga cullquita curacunata mandac curacunaman, pushac yuyaccunaman cutichingapac rirca.

⁴ Paica: —Mana faltayuc runata japichishpaca, juchallishcanimi— nirca. Chashna nicpimi paicunaca: —Ñucanchicmanca, ¿imatac curinyari? Chaitaca canchari ricungui— nirca.

⁵ Shina nicpimi, Judasca Diosta mañana huasi ucupi cullquita shitashpa, sipiringapac rirca.

⁶ Curacunata mandac curacuna chai cullquita japishpaca: “Caica shuc runata huañuchingapac randishca cullquimi. Chaimanta ofrendata tandanapica, mana churanachu canchic” nirca.

⁷ Shina ninacushpami, caru llacta runa huañucpi enterrangapac, mangata ruhuacpac allpata randirca.

⁸ Chaimantami chai pambataca cunancaman Yahuar Allpa nishpa cayancuna.

⁹ Chashnami Dios ima nishcata huillac Jeremías huillashcaca pactarca. Paica: «Quimsa chunga cullquitami japirca. Israelcunaca chaitami paimantaca paganga nishca carca.

¹⁰ Ima shinami Dios nishca shinami, chaihuanca mangata ruhuacpac allpata randirca» nishcami.

Pilatopac ñaupapi Jesusta juchanchishcamanta

¹¹ Jesustaca Mandac Pilatopacmanmi aparca. Chaipimi Pilatoca: —¿Canchu israelcunata Jatun Mandac cangui?— nirca. Shina nicpimi Jesusca: —Ari, canllatac nishcanguimi— nirca.

¹² Curacunata mandac curacunapish, pushac yuyaccunapish juchanchicucpica, Jesusca imata mana nircachu.

¹³ Chaimantami Pilatoca: —Canta cai tucuita juchanchicuctaca, ¿manachu uyangui?— nirca.

¹⁴ Shina nicpipish, Jesusca imata mana nircachu. Chaimantami Pilatoca yallita mancharirca.

Jesusta huañuchingapac juchanchishcamanta

¹⁵ Pascua punzhapica, gentecuna munashca shuc prezutami mandac Pilatoca cacharic carca.

¹⁶ Chai punzhapica, shuc yalli millai Barrabás runami prezu tiyacurca.

¹⁷ Pilatoca tandanacushca gentecunataca: —¿Maijantatac cacharichun ninguichic? ¿Barrabasta? Mana cashpaca, ¿Cristo nishca Jesusta?— nishpa tapurca.

¹⁸ Pilatoca Jesustaca envidiamanta apamushcatami yacharca.

¹⁹ Pilato, pai mandanapi tiyacucpimi, paipac huarmica: —Chai allita ruhuac runamantaca, shuc mancharinatami tutaca muscurcani. Paitaca ama imata ruhuanguichu— nichun cacharca.

²⁰ Utcamanmi curacunata mandac curacunapish, pushac yuyaccunapish gentecunataca: “Barrabasta cacharichun, Jesustaca chacatachun ninguichic” nishca carca.

²¹ Pilato paicunata cutin tapushpaca: —Cai ishcai runacunamantaca, ¿maijantatac cacharichun ninguichic?— nirca. Shina nicpimi paicunaca: —¡Barrabasta cachari!— nircacuna.

²² Chaimantami Pilatoca: —Shinashpaca, Cristo nishca Jesustaca, ¿imatatac ruhuachun ninguichic?— nirca. Shina nicpimi, tucui paicunaca: —¡Paitaca chacatailla!— nircacuna.

²³ Shina nicpimi Pilatoca: —¿Ima mana allitatac ruhuashcayari?— nirca. Shina nicpipish, paicunaca ashtahuanmi: —¡Chacatailla!— nishpa caparircacuna.

²⁴ Tucui gentecuna mana uyashun nishpa, ashtahuan caparinacui callaricpimi, Pilatoca yacuta japishpa, maquita jahuashpaca: —Cai runata huañuchishpaca mana ñucachu juchayuc casha, ashtahuanpish cancunami juchayuc canguichic— nirca.

²⁵ Shina nicpimi paicunaca: —Ari, pai huañushcamanta ñucanchicmi juchayuc cashun— nircacuna.

²⁶ Chashna nicpimi, Pilatoca Barrabasta cacharishpa, Jesustaca azotichishpa cruzpi chacatachun Roma llacta soldadocunaman curca.

²⁷ Shina cucpimi, soldadocunaca Jesusta Pilato mandashpa tiyana jatun ucuman apashpa, caishuc soldadocunata Jesuspac muyundipi tandachirca.

²⁸ Chaipimi soldadocunaca Jesuspac churanata surcuchishpa, amsa puca churanata pachallichirca.

²⁹ Cashamanta ahuashca coronata umapi churachishpami, shuc taunata alli maquipi charichirca. Chashna nic tucushpalla, paipac ñaupapi cungurishpaca: —¡Israelcunata Jatun Mandac, canca allimari cangui!— nircacuna.

³⁰ Chaimantaca tocashpami, paipac taunallahuantac umapi huactarca.

³¹ Chashna burlashca quipaca, amsa puca churanata surcuchishpami, paipac churanallatatac churachishpa, cruzpi chacatangapac aparca.

Jesusta chacatashcamanta

³² Chaimanta ricushpami, Cirene pueblomanta Simón runahuan tuparca. Paimanmi Jesuspac cruzta apachishpa rircacuna.

³³ Chaimantaca Gólgota nishca urcumanmi chayarca. Gólgota nishcaca, Uma Tullu nisha ninmi.

³⁴ Chaipimi jayac-huan chapushca vinota Jesusman curca. Chashna cucpica, Jesusca ashata mallishpa mana ubiasha nircachu.

³⁵ Jesusta cruzpi chacatashpaca, suerteta ruhuashpami paipac churanacunata japircacuna.

³⁶ Chaipimi soldadocunaca Jesusta cuidangapac tiyarirca.

³⁷ Cruz jahuapica, imamanta huañuchishcata quillcashcatami churarca. Chai quillcapica: «Caimi israelcunata Jatun Mandac Jesús» nicurcami.

³⁸ Jesustaca ishcai shuhuac runacunatami shuctaca alli maquiman, shuctaca lluqui maquiman chacatarca.

³⁹ Chaita pasaccunaca umata cuyuchishpa, Jesusta

⁴⁰ camishpaca: «Diosta mañana huasita urmachishpapish, quimsa punzhapica cutin shayachishallami nircanguimi. Can Diospac Churi cashpaca, ¡cruzmanta uricuiyari!» nircami.

⁴¹ Shinallatac curacunata mandac curacunapish, mandashcacunata yachachiccunapish, pushac yuyaccunapish burlashpa:

⁴² «Shuccunataca quishpichircami. Cunan paillatacca mana quishpiri pudinchu. Israelcunata Jatun Mandac cashpaca, cruzmanta uricunmanmi. Chashna uricucpica, ñucanchicpish crinchicmanmi.

⁴³ Paica: “Diospac Churimi cani” nishpami, Dios yuyailla puricurca. Shina cacpica, Dios cuyashpaca quishpichinmanmi» nircacuna.

⁴⁴ Chai shinallatacmi Jesus-huan chacatashca shuhuac runacunapish camircacuna.

Jesús huañushcamanta

⁴⁵ Chaupi punzhamanta quimsa horas chishicamanmi, tucui cai pachaca amsayarca.

⁴⁶ Chai horasllatacmi Jesusca: «Elí, Elí, ¿lama sabactani?» nishpa, caparirca. Chaica: “Ñuca Dios, ñuca Dios, ¿ima nishpatac ñucallata saquinguiyari?” nisha ninmi.

⁴⁷ Chaipi caccuna chaita uyashpaca: —Paica huillac Eliastami cayacun— nircacuna.

⁴⁸ Chashna caparicta uyashcahuanmi shuc runaca, esponjata apamungapac callparca. Chaitaca jayac vinopi satishpami, caspi puntapi churashpa, Jesús ubiachun shimiman chayachirca.

⁴⁹ Ashtahuanpish maijancunaca: —Saquichic, Eliasca quishpichingapac shamucta ricungapac— nircacuna.

⁵⁰ Jesusca cutinllatac sinchita caparishpaca huañurcallami.

⁵¹ Chai ratomi Diosta mañana huasi tiyac lienzoca, jahuamanta uraiman chaupita lliquirirca. Allpapish chucchurcami, jatun rumicunapish chictarircami.

⁵² Shinallatac enterrashca jutcucunapish pascarircami. Chashna pascaricpica, Diospaclla caccunaca causarircami.

⁵³ Chai enterrashcamanta causariccunaca Jesús causarishca quipami Jerusalén puebloman shamurcacuna. Paicunataca achca gentecunami ricurca.

⁵⁴ Patsac soldadocunata mandacpish, Jesusta cuidaccunapish allpa chucchucta, shuctac ima tucushcacunata ricushpaca yallita mancharishpami: —Cai runaca Diospac Churitacmi cashca— nircacuna.

⁵⁵ Chaipica tauca huarmicunami carullamanta ricucurca. Paicunaca Galilea llactamantami Jesusta ayudashpa shamurca.

⁵⁶ Paicunapurapica Magdala pueblomanta Mariapish, Jacobopac, Josepac mama Mariapish, Zebedeopac churicunapac mamapishmi carca.

Jesusta enterrashcamanta

⁵⁷ Ña tutayamucucpica, Arimatea pueblomanta chayuc Josemi shamurca. Paipish Jesusta caticmi carca.

⁵⁸ Paimi mandac Pilatopacman rishpa, Jesuspac cuerpota enterrangapac mañarca. Chashna mañacpica, Jesuspac cuerpota cuchunmi Pilatoca mandarca.

⁵⁹ Chaimantami Joseca Jesuspac cuerpota mushuc lienzo pañohuan pillurca.

⁶⁰ Chashnami cunanlla ruhuashca enterrana jutcupi churarca. Chai jutcutaca Josellatacmi ruhuachishca carca. Chaipimi Jesuspac cuerpota churashpa, jatun rumihuan jarcashpa rirca.

⁶¹ Chai jutcu ñaupapica Magdala pueblomanta Mariami, caishuc Mariahuan tiyacurca.

Enterrashcata cuidachun churashcamanta

⁶² Allichirina punzhamanta cayandi samana punzhapimi curacunata mandac curacunapish, fariseocunapish Pilatopacman rircacuna.

⁶³ Chaiman rishpaca: —Jatun mandaclla. Cai llullac runa causacushpa: “Quimsa punzhapica causarishami” nishcatami yuyarinchic.

⁶⁴ Chaimanta quimsa punzhacaman cuerpo enterrashcata cuidachun cachai. Pacta yachacuccuna tuta shamushpa, paipac cuerpota shuhuanman. Chashna shuhuashpaca: “Jesusca ñami causarishca” nishpami, gentecunata crichinga. Chashna ruhuashpacarin, punta llullashcata atishpami ashtahuan llullanga— nircacuna.

⁶⁵ Chashna nicpimi Pilatoca: —Caipimi, cai soldadocunata cachani. Paicunata pushashpa, ima shinapish allita cuidanguichic— nirca.

⁶⁶ Chashnami chai jutcuta huichcashca rumita ama pipish cuyuchichun, sellota churashpa, soldadocunatapish cuidachunmi saquirca.