SAN MATEO 26 - Dios Rimashcata Quillcashcami

Jesusta japichingapac yuyarinacushcamanta

¹ Jesusca tucui chaicunata nishpami, paipac yachacuccunataca:

² —Caimanta ishcai punzha quipa, Pascua punzha cashcataca cancunallatac yachanguichicmi. Chai punzhapimi, Runa Tucungapac shamushca ñucataca, cruzpi chacatachun japichingacuna— nirca.

³ Chai punzhami Israel curacunata mandac curacunapish, pushac yuyaccunapish, curacunata jatun mandac Caifaspac huasipi tandanacushpa,

⁴ Jesusta umashpa pacalla japishpa huañuchinata yuyarinacurca.

⁵ Ashtahuanpish paicunaca: «Cai fiesta punzhapica mana japishpa, saquishunlla, gentecuna ñucanchicta llaquichingapac jataringami» ninacurca.

Jesuspac umapi mishquilla ashnacucta churashcamanta

⁶ Jesusca Betania pueblopi causac, lepra ungüihuanmi nishca Simonpac huasipimi carca.

⁷ Jesús mizapi tiyacucpimi, shuc huarmica achca valishca mishquilla ashnacucta yurac rumi botellapi apamurca. Chaitami Jesuspac umapi tallirca.

⁸ Chaita yachacuccuna ricushpaca, yallita piñarishpaca: —¿Ima nishpatac caitaca yangamanta tallinyari?

⁹ Chaita achca cullquipi catushpa huacchacunaman cunachari, alli canman carca— ninacurca.

¹⁰ Jesús chaita uyashpaca: —¿Ima nishpatac cai huarmitaca rimaricunguichic? Saquichic. Paica ñucamanca allitami ruhuashca.

¹¹ Huacchacunaca punzhantami cancunahuan, ashtahuanpish ñucaca mana cancunahuanca causacushallachu.

¹² Cai mishquilla ashnacucta ñucapi tallishpaca, ñuca cuerpo sumacta enterrashca cachunmi allichichishca.

¹³ Cai pachapi quishpirinamanta alli huillaita maipipish huillacushpaca, cai huarmi ruhuashcatapishmi huillanga. Pai ruhuashcaca yuyarishcami canga. Chaica chashnatacmi canga— nirca.

Judas Jesusta japichisha nishcamanta

¹⁴ Chunga ishcai yachacuccunapuramanta Judas Iscariote, curacunata mandac curacunapacman rishpaca:

¹⁵ «Jesusta cancunaman cucpica, ¿imatatac ninguichic?» nirca. Chashna nicpimi, chai curacunaca quimsa chunga cullquita curca.

¹⁶ Chaimanta pachami Judasca, ima shina Jesusta japichinata yuyaricurca.

Pascua micuita micushcamanta

¹⁷ Levadura illac tandata micuna fiesta callari punzha, yachacuccuna Jesuspacman cuchuyashpaca: —¿Maipitac Pascuata yuyarishpa, micunataca allichigrishun?— nirca.

¹⁸ Chashna nicpimi Jesusca: —Puebloman rishpa, shuc runahuan tupashpaca: “Ñucanchic yachachicca: ‘Ñucata japichina pachami chayamucun. Cambac huasipimi ñuca yachacuccunahuan Pascuata yuyarishpa micugrini’ ninmi” nigrichic— nirca.

¹⁹ Shinami yachacuccunaca Jesús mandashca shina Pascua micuita allichirca.

²⁰ Ña tutayamucuctami Jesusca chunga ishcai yachacuccunahuan micungapac tiyarirca.

²¹ Chashna micushpa tiyacushpami Jesusca: —Cancunapuramanta shucmi, ñucataca japichinga. Chaica chashnatacmi canga— nirca.

²² Chaimanta yallita llaquirishpa, cada shuc tapushpaca: —Apunchic Jesús, ¿ñucachu japichicca cani?— nishpa tapurca.

²³ Chashna tapucpimi Jesusca: —Cai ñuca micucuc platopi tandata jucuchishpa micucmi japichigrin.

²⁴ Runa Tucungapac shamushca ñucataca, Dios quillcachishcapi nishca shinami huañuchinga. Ashtahuanpish ñucata japichic runaca, ¡aij, imachari tucunga! Chai runaca mana huacharishca cashpachari alli canman carca— nirca.

²⁵ Chashna nicpimi, japichic Judasca Jesustaca: —Yachachic, ¿japichicca ñucachu cani?— nishpa, tapurca. Chashna tapucpimi Jesusca: —Ari, canmi cangui— nirca.

²⁶ Chashna micucushpami, Jesusca tandata japishpa, Diosta pagui nishpa, chaupishpa yachacuccunaman cushpaca: —Japichic, micuichic. Caica ñuca aichami— nirca.

²⁷ Vino vasota japishpa, Diosta pagui nishpa, yachacuccunaman cucushpaca: —Tucuilla cai vasomanta ubiaichic.

²⁸ Caica, Dios cancunahuan mushuc ari nishca yahuarmi. Caimi achca runacunapac juchacunata perdonangapac jichana ñuca yahuarmi.

²⁹ Ñucaca: Ñuca Taita mandacucpi, cancunahuan mushuc vinota ubiangacaman, cai uvas vinotaca mana ubiashachu nini— nirca.

Pedro Jesusta neganamanta

³⁰ Himnota cantashca quipami, Olivos urcuman rircacuna.

³¹ Chaipimi Jesusca: —Dios quillcachishcapica: “Michictaca huañuchishami. Ovejacunaca caita chaitami ringa” ninmi. Chaimantami cancunaca cunan tutallatac ñucata saquishpa, caita chaita ringuichic.

³² Shina cacpipish causarishca quipaca, cancunapac ñaupatami Galilea llactaman risha— nirca.

³³ Chashna nicpimi Pedroca: —Caishuccuna canmanta caruyacpipish, ñucaca manatac saquishachu— nirca.

³⁴ Chashna nicpimi Jesusca: —Cunan tutallatacmi gallo manarac cantacpi, quimsa cutin negangui. Chaica chashnatacmi canga— nirca.

³⁵ Chashna nicpimi Pedroca: —Canhuan pacta huañuna cacpipish, mana negashachu— nirca. Chashnallatacmi tucui yachacuccunaca nirca.

Getsemaní huertapi Jesús Diosta mañashcamanta

³⁶ Jesús, yachacuccunahuan Getsemaní huertaman chayashpaca: —Ñuca chainicpimi Diosta mañangacaman, cancunaca caillapi tiyacuichic— nirca.

³⁷ Jesusca Pedrotapish, Zebedeopac ishcai churicunatapish pushashpa, rishpami, shungupi yallita llaquiri callarirca.

³⁸ Chashna cashpami Jesusca: —Ñuca shungupica, huañuna nanaihuan shinami yallita llaquiricuni. Cancunaca mana sueñushpa, caipi ñuca shinallatac chaparacuichic— nirca.

³⁹ Jesusca ashata chainicman rishpa, pambacaman cumurishpa, Diosta mañashpaca: «Ñuca Taitalla, cai llaquita ñucamanta anchuchiyari. Shina cacpipish ama ñuca munashcata ruhuaichu, ashtahuanpish can munashcata ruhuai» nirca.

⁴⁰ Jesús chashna mañashpa, yachacuccunapacman cutimushpaca, paicuna sueñucuctami ricurca. Chaimantami Pedrotaca: —¿Manachu ashallatapish ñuca shinallatac riccharishca cai pudircanguichic?

⁴¹ Mana pandachishca cangapacca, Diosta mañashpa chaparacuichic. Cancunapac yuyaica sinchimi, ashtahuanpish cancunapac cuerpomi shaicushca— nirca.

⁴² Cutinllatac Jesús mañangapac rishpaca: —Ñuca Taitalla, llaquita ñuca apanatac cacpica, can munashca shina cachun— nirca.

⁴³ Jesús cutimushpaca, yachacuccuna cutinllatac sueñucuctami ricurca. Paicunapac ñahuicunaca sueñuihuan cashpami, mana pascarisha nirca.

⁴⁴ Jesús paicunata chaipi saquishpa, cutinllatac Diosta mañangapac rishpaca, puntaman mañashca shinallatacmi mañarca.

⁴⁵ Chashna mañashpa, yachacuccunapacman cutimushpaca: —¿Samarishpa sueñucunguichicllachu? Ña jatarichic, ñami Runa Tucungapac shamushca ñucata, juchayuc runacunaman japichina horasca pactamushca.

⁴⁶ ¡Jatarishpa jacuchic! Ñucata japichicca ñami chayamucun— nirca.

Jesusta japichishcamanta

⁴⁷ Jesús chashna nicucpiracmi, chunga ishcai yachacuccunapuramanta Judasca, tauca runacunahuan shamurca. Chai runacunaca curacunata mandac curacunapish, cunac yuyaccunapish cachacpimi espadacunahuan, caspicunahuan shamurcacuna.

⁴⁸ Jesusta japichic Judasca, chai runacunataca: «Maijantami ñuca muchani, chaimi Jesusca. Chaita japinguichic» nishcami carca.

⁴⁹ Judas chayashcahuan, Jesuspacman cuchuyashpaca: —Yachachic, ¿allillachu cangui?— nishpami mucharca.

⁵⁰ Chaimantami Jesusca: —Uyai. ¿Imapactac shamurcangui?— nirca. Shina nicpimi, Jesusta prezurcacuna.

⁵¹ Chaipimi Jesus-huan caccunapuramanta shucca, espadata llucchishcahuan jatun mandac curapac servicta huactashpa ringrita pitirca.

⁵² Chaimantami Jesusca: —Espadata maipi huacaichinallapitac huacaichi. Maijanpish espadahuan macanacucca, espadallapitacmi huañunga.

⁵³ Ñuca Taitaman huaranga huaranga angelcunata ñucata cuidachun mañacpica, cunanllatacmi cachanman. Chaitaca, ¿manachu yachangui?

⁵⁴ Chashna ruhuacpica, ¿ima shinatac Dios quillcachishcapi nishcaca pactangayari?— nirca.

⁵⁵ Shinallatac Jesusca paita japiccunataca: —¿Shuhuacta shinachu espadacunahuan, caspicunahuan japingapac, shamunguichic? Punzhantami Diosta mañana huasipi yachachishpa cancunahuan carcani. Chaipica mana japircanguichicchu.

⁵⁶ Ashtahuanpish Dios ima nishcata huillac quillcashca pactachunmi, chashna tucushca— nirca. Chaipimi yachacuccunaca Jesusllata saquishpa, tucui miticushpa rircacuna.

Jesusta mandaccunapacman apashcamanta

⁵⁷ Jesusta japishpaca, curacunata mandac Caifaspac huasimanmi aparca. Chaipimi mandashcacunata yachachiccunapish, pushac yuyaccunapish tandanacushca carca.

⁵⁸ Pedroca caru carutami chai huasi pungu pambacaman Jesusta catishpa rirca. Chaipimi Diosta mañana huasita cuidaccunahuan Jesusta ima ruhuacta ricushpa tiyacurca.

⁵⁹ Curacunata mandac curacunapish, tandanacushca mandaccunapish, Jesusta huañuchingapacmi llullashpa huillaccunata mashcarca.

⁶⁰ Tauca runacuna llullashpa huillacucpipish, ima juchata mana tarircacunachu. Shina cacpipish quipata ishcai llullashpa huillac runacuna shamushpaca:

⁶¹ —Cai runaca: “Diosta mañana huasita urmachishpapish, quimsa punzhapica cutin shayachimanllami” nircami— nirca.

⁶² Chaimantami curacunata mandac cura jatarishpa Jesustaca: —Caita nishcamantaca, ¿manachu imata ningui?— nirca.

⁶³ Ashtahuanpish, Jesusca imata mana nircachu. Chaimantami mandac curaca: —Causac Diospac shutipi huillai. ¿Canchu Diospac Churi Cristoca cangui?— nirca.

⁶⁴ Shina nicpimi Jesusca: —Ari, canllatac nishcanguimi. Ashtahuanpish ñucaca: Cunanmanta pachami Runa Tucungapac shamushca ñucataca, poderyuc Diospac alli maquiman tiyacucta ricunguichic. Shinallatac jahua pachamanta puyupi shamucuctapishmi ricunguichic ninimi— nirca.

⁶⁵ Shina nicpimi, mandac curaca yallita piñarishpa, paipac churanata lliquishpaca: —¡Cai runaca Diostami piñachishca! ¿Imapactac shuctac huillaccunaman tapushun? ¡Cancunallatacmi Diosta piñachishpa rimashcataca uyashcanguichic!

⁶⁶ Cancunaca, ¿imatatac ninguichic?— nishpa tapurca. Shina nicpimi, chaipi caccunaca: —¡Juchallishcami, huañunami can!— nircacuna.

⁶⁷ Chaimantami maijancunaca ñahuipi tucashpa macarca. Cutin maijancunaca huactashpami:

⁶⁸ —Cristo cashpaca, pi canta huactacta huillai— nircacuna.

Pedro Jesusta negashcamanta

⁶⁹ Pedro canzha pambapi tiyacucpimi, shuc servic huarmi cuchuyashpaca: —Canpish Galilea llactamanta Jesus-huan puricmi cangui— nirca.

⁷⁰ Pedro tucui chaipi caccunapac ñaupapi negashpaca: —Mana ricsinichu, pimantachari nicungui— nirca.

⁷¹ Pedro chai pungu pambamanta llucshicucpi, cutinllatac shuc servic huarmi ricushpaca: —Cai runapish Nazaret pueblomanta Jesus-huan puricmi carca— nishpami, chaipi caccunaman parlarca.

⁷² Cutinllatac Pedro negashpaca: —¡Chai runataca mana ricsinichu!— nirca.

⁷³ Chai quipallatac, chaipi caccuna Pedropacman cuchuyashpaca: —Canpish chaipurallatami cangui. Cambac rimaipish ricsinallami— nirca.

⁷⁴ Shina nicpimi, cutinllatac Pedroca: —¡Pimantatacpish rimacunguichicchari! ¡Chai runataca mana ricsinichu! Ñuca llullacucpica, Diosllatac llaquichichun— nirca. Chai ratollatacmi galloca cantarca.

⁷⁵ Chaipimi Pedroca, Jesús: «Manarac gallo cantacpimi, quimsa cutin negangui» nishcata yuyarirca. Chaimantami Pedroca canzhaman llucshishpa, yallita llaquirishpa huacarca.