SAN MATEO 25 - Dios Rimashcata Quillcashcami

Jesús chunga solteracunamanta parlashcamanta

¹ Jahua pacha Dios mandacucca, chunga solteracuna lamparata japichishpa, noviohuan tupangapac llucshic shinami.

² Paicunamanta pichcacunaca allichirishca, alli yuyaiyucmi carca. Cutin caishuc pichcacunaca mana allichirishca, mana alli yuyaiyucchu carca.

³ Chai mana alli yuyaiyuccunaca lamparata apashpapish, aceitetaca mana aparcachu.

⁴ Ashtahuanpish caishuc pichcacunaca alli yuyaiyuc cashpami, lamparatapish, tucuricpi churana aceitetapish aparca.

⁵ Novio mana utca shamucpica, tucui paicunami sueñurca.

⁶ Chashna sueñucucpimi, chaupi tutataca: “¡Ñami novio shamun, tupangapac llucshichic!” nishca uyarirca.

⁷ Chaita uyashpami, chunga solteracunaca jatarishpa, lamparata allichi callarirca.

⁸ Shinami chai mana alli yuyaiyuc solteracunaca chai alli yuyaiyuc solteracunataca: “Ñucanchic lamparacunaca ñami huañugrin. Asha aceiteta convidaichic” nirca.

⁹ Shina nicpimi, chai alli yuyaiyuc solteracunaca: “Ñucanchicmanpish, cancunamanpish faltangami. Catuccunapacman rishpa, cancunallatac randigrichic” nirca.

¹⁰ Chai pichca solteracuna randingapac ricpica, ñami novioca chayamurca. Chashna chayamucpimi, pichca allichirishca solteracunaca noviohuan boda huasiman yaicushpa, punguta huichcarca.

¹¹ Chai quipa, caishuc pichca solteracuna chayamushpaca: “Amito, punguta pascai” nirca.

¹² Chashna cayacpi, novioca: “Mana ricsinichu” nircami.

¹³ Chai shinallatac Runa Tucungapac shamushca ñuca ima punzha, ima horas cutimunata mana yachashcamanta allichirishpa shuyacuichic.

Chunga cullquimanta Jesús chimbapurashpa parlashcamanta

¹⁴ Jahua pacha Dios mandacucca, shuc amo caru llactaman ringapac paipac serviccunata cayashpa, cullquita saquic shinami.

¹⁵ Serviccuna imata ruhuaipacta ricushpami, shucmanca pichca talento cullquita, shucmanca ishcai talento cullquita, shucmanca shuc talento cullquita cushpa rirca.

¹⁶ Chai pichca talento cullquita japicca chai cullquihuanca randishpa catushpami, pichca talento cullquihuan mirachirca.

¹⁷ Ishcai talento cullquita japicpish, chai shinallatacmi mirachirca.

¹⁸ Ashtahuanpish shuc talento cullquita japicca amo saquishca cullquitaca allpata jutcushpami pacarca.

¹⁹ Chai amo tauca huatacuna quipa cutimushpaca, paipac serviccuna mashna cullquita mirachishcatami tapurca.

²⁰ Pichca talento cullquita japic runa chayashpaca: “Amito, canca pichca talento cullquitami saquircangui, pichca talento cullquihuanmi mirachircani” nirca.

²¹ Chashna nicpimi amoca: “Allitami ruhuashcangui. Ashallapipish allita ruhuashcamantaca, achcatami canmanca mingasha. Cunanca ñucahuan cushicungapac ucuman yaicui” nirca.

²² Ishcai talento cullquita japic runa chayashpaca: “Amito, canca ishcai talento cullquitami saquircangui, ishcai talento cullquihuanmi mirachircani” nirca.

²³ Chashna nicpimi amoca: “Allimi, canca allita ruhuac, cazuc servicmi cangui. Ashallapipish allita ruhuashcamantaca, achcatami canmanca cusha. Cunanca ñucahuan cushicungapac ucuman yaicui” nirca.

²⁴ Shuc talento cullquita japic runa chayashpaca: “Amito, canca piñami cangui. Manapish cushpa chasquiclla, manapish tarpushpa cosechaclla cashcata yachanimi.

²⁵ Chaimantami can saquishca cullquitaca allpapi huacaichircani. Caipimi, cambac cullquica” nirca.

²⁶ Shina nicpimi amoca: “¡Canca, mana valic, quilla servicmi cangui! Ñuca manapish tarpushpa cosechac, manapish cushpa chasquic cashcataca yacharcanguimi.

²⁷ Chaimanta cullquitaca bancopi churashpa mirachinami carcangui. Ñuca cutishpaca, saquishca cullquitapish, interestapish japimanmi carcani” nirca.

²⁸ Shina nishpami caishuc serviccunataca: “Chai cullquita quichushpa, chunga cullquita charic runaman cuichic.

²⁹ Achcata charicmanmi, ashtahuan cushca canga. Chaimantami ashtahuan charinga. Cutin mana charicmantaca, ashalla charishcatapish quichushcami canga.

³⁰ Cai mana valic servictaca canzhaman llucchishpa purapi shitaichic. Chaipica huacaihuanmi quiru caniringa” nirca.

Llactacunata taripanamanta

³¹ Runa Tucungapac shamushca ñuca sumaimana achic nicuc-huan achicyachishpa, tucui angelcunahuan shamushpaca, jatun mandac tiyarinapimi tiyarisha.

³² Chaipimi tucui llacta gentecuna ñucapac ñaupaman shamushpa tandaringa. Chashna tandaricpimi, paicunataca shuc michic ovejacunata chivocunamanta chicanyachic shina chicanyachisha.

³³ Ovejacunataca ñuca alli maquimanmi churasha. Cutin chivocunataca lluqui maquimanmi churasha.

³⁴ Ñuca alli maquiman caccunataca: “Ñuca Taita alli nishcacuna, ñucahuan mandangapac shamuichic. Cai mandanataca Diosmi cai pacha callari punzhamanta, cancunaman cungapac allichishpa charicushca.

³⁵ Ñuca yarcaihuan cacpica, cararcanguichicmi. Yacunayaihuan cacpipish, ubiachircanguichicmi. Samarinata mana charicpipish, pozachircanguichicmi.

³⁶ Churana illac cacpipish, churachircanguichicmi. Ungushca cacpipish, carcelpi cacpipish, ricuc shamurcanguichicmi” nishami.

³⁷ Shina nicpica, cashcata ruhuaccunaca: “Apunchic Jesús, ¿maipitac yarcaihuan cacpi cararcanchic, yacunayaihuan cacpi ubiachircanchic?

³⁸ ¿Maipitac mana samarinata charicpi pozachircanchic, churana illaclla cacpi churachircanchic?

³⁹ ¿Maipitac ungushca cacpi, carcelpi cacpi ricuc shamurcanchic?” ningacunami.

⁴⁰ Shina nicpimi ñucaca: “Cai uchilla ñuca huauquicunaman ruhuashpaca, ñucamanmi ruhuarcanguichic. Chaica chashnatacmi” nishami.

⁴¹ Lluqui maquiman caccunataca: “Millaicuna, caimanta anchurichic. Diabloman, paita servic angelcunaman allichishca, mana huañuc ninapimi shitashca canguichic.

⁴² Cancunaca ñuca yarcaihuan cacpipish, mana cararcanguichicchu. Yacunayaihuan cacpipish, mana ubiachircanguichicchu.

⁴³ Samarinata mana charicpipish, mana pozachircanguichicchu. Churana illac cacpipish, mana churachircanguichicchu. Ungushca cacpipish, carcelpi cacpipish, mana ricugrircanguichicchu” nishami.

⁴⁴ Chashna nicpimi paicunaca: “Apunchic Jesús, ¿ima horatac can yarcaihuan cacta, yacunayaihuan cacta, samarinata mana charicta, churana illacta, ungushca cacta, carcelpi cacta, imalla illacta ricushcanchic?” ningacunami.

⁴⁵ Shina nicpimi ñucaca: “Cai uchillacunaman mana ruhuashpaca, ñucamanmi mana ruhuarcanguichic. Chaica chashnatacmi” nishami.

⁴⁶ Paicunaca jaicapi mana tucuric, jatun llaquimanmi ringa. Ashtahuanpish cashcata ruhuaccunaca, huiñai causaimanmi ringa— nirca.