SAN MATEO 24 - Dios Rimashcata Quillcashcami

Jesús Diosta mañana huasita urmachishca canamanta huillashcamanta

¹ Jesusca Diosta mañana huasimantami llucshishpa ricurca. Chaipimi paipac yachacuccuna cuchuyashpa, Diosta mañana huasita ricuchirca.

² Chashna ricuchicpimi Jesusca: —¿Tucui caicunallata ricushpachu mancharicunguichic? Caipica, shuc rumillapish mana saquiringachu, tucui urmachishcami canga. Chaica chashnatacmi tucunga— nirca.

Llaquicuna tiyanamanta

³ Olivos urcupi Jesús tiyaricpi, yachacuccuna cuchuyashpaca: —¿Ima punzhatac can huillashcaca pactangayari? Can shamunatapish, cai pacha tucurinatapish, ¿imata ricushpatac yachashunyari?— nishpa, tapurcacuna.

⁴ Chashna nicpimi Jesusca: —Pacta pi cancunata pandachinman, cuidaringuichic.

⁵ Taucacunami ñuca shutipi shamushpa: “Ñucami Quishpichic Cristoca cani” nishpa, achcacunata pandachinga.

⁶ Cancunaca quiquin llactapipish, caru llactapipish jatun macanacuitami uyanguichicmi. Chaita uyashpapish, ama mancharinguichicchu. Chashna llaquicunaca tiyangallatacmi. Ashtahuanpish cai pachaca manarac tucuringachu.

⁷ Llactacunapurapish, jatun mandaccunapurapishmi macanacunga. Maijan llactapica allpa chucchuipish, yarcaipish tiyangami.

⁸ Chai llaquicunaca callari llaquicunallami canga.

⁹ Chai punzhapica cancunata prezushpa mandaccunapacman apangami. Chashnami huañuchinga. Ñucata caticushcamantaca, tucui llactacunapimi piñanga.

¹⁰ Chai punzhacunapica, taucacunami crinata saquishpa, caishuc chaishuc piñanacushpa prezuchinga.

¹¹ Tauca llullac huillaccuna shamushpami, achca gentecunata pandachinga.

¹² Chashna yallita millai miraricpimi, taucacuna cuyanatapish saquinga.

¹³ Chaica, pipish tucuricaman llaquicunata apactaca quishpiringami.

¹⁴ Dios mandacucmanta alli huillaica tucui llactacunapimi huillashca canga. Chai quipami cai pachaca tucuringa.

¹⁵ Dios ima nishcata huillac Daniel quillcashca shina, Diosta mañana huasipi millana tiyacuctami ricunguichic. (Caita rezacca alli entendichun).

¹⁶ Judea llactapi causaccunaca urcucunapi miticugrichun.

¹⁷ Maijanpish huasi jahuapi cashpaca, ama huasi ucumanta imata apangapac uricuchun.

¹⁸ Chagrapi cashpaca, ama huasimanta churanata apangapac cutichun.

¹⁹ ¡Chai punzhacunapi huicsayuc huarmicunalla, chuchucuc huahuayuc huarmicunalla, imachari tucunguichic!

²⁰ Cancuna miticuna punzha ama tamya cachun, ama samana punzha cachun, Diosta mañaichic.

²¹ Chai punzhacunaca achca llaquimi canga. Cai pacha callari punzhamanta, cunancamanmi, chashna llaquica mana tiyashca. Quipapish mana tiyangachu.

²² Chai llaqui punzhacunata Dios mana chaupicpica, pipish mana quishpirinmanchu. Diosca pai acllashcacunata cuyashcamantami, chai llaqui punzhacunataca chaupinga.

²³ Maijanpish: “¡Riquichic, Quishpichic Cristoca caipimi, chaipimi!” nicpipish, ama cringuichicchu.

²⁴ Llullac cristocunapish, llullac huillaccunapish ricuringami. Paicunaca milagrocunatapish, mancharinacunatapish ruhuashpa ricuchingami. Chashnami Dios acllashcacunatapish pandachinga.

²⁵ Chaicunataca utcamanmi cancunaman huillarcani.

²⁶ Maijan: “Riquichic, Cristoca shitashca pambapimi” nicpipish, ama cringuichicchu. Mana cashpaca: “Cristoca caipimi miticushca tiyacun” nicpipish, ama cringuichicchu.

²⁷ Chaica, Runa Tucungapac shamushca ñuca cutimuna punzhaca, inti llucshic ladomanta, inti tigrana ladocaman relampa achicyachic shinami canga.

²⁸ Maipimi huañushca tiyan, chaipimi ullachucunaca tandanacun.

Runa Tucungapac shamushca cutimunamanta

²⁹ Chai llaqui punzhacuna tiyashca quipaca, intipish amsayangami, quillapish mana achicyachingachu. Lucerocunapish urmangami. Jahua pachapi tiyac jatuncunapish chucchungami.

³⁰ Chashna tucucpimi, Runa Tucungapac shamushca ñuca cutimucuc señalca jahua cielopi ricuringa. Chaita ricushpami, tucui cai pachapi causaccunaca mancharishpa huacanga. Runa Tucungapac shamushca ñucataca poderhuan, sumaimanata achicyachishpa puyupi shamucucta ricunga.

³¹ Ñuca angelcunata cachashpami. Paicunami trompetapi sinchita tocashpa, ñuca acllashcacunataca tucui cai pachamanta tandachinga.

³² Higo yura ima tucucta ricushpa, yuyaita japichic. Yurapi ramacuna cutin huiñashpa, pangacuna ricuricpica, usyai chayamucucta yachanguichic.

³³ Tucui caicunata cancuna ricushpaca, Runa Tucungapac shamushca ñuca cutimuna ña pungullapi cashcatami yachanguichic.

³⁴ Cai ñuca huillashcaca pactangacaman, cai punzha causaccunaca manarac huañungachu. Chaica chashnatacmi canga.

³⁵ Jahua pachapish, cai pachapish tucuringami. Ashtahuanpish ñuca huillashcaca pactacungallami.

³⁶ Ima horas, ima punzha, ñuca cutimunataca pi mana yachanchu. Jahua pachapi cac angelcunapish mana yachanchu. Ñucapish mana yachanichu, ashtahuanpish ñuca Taitallami yachan.

³⁷ Ima shinami Noé causai punzhacunapi tucurca, chashnallatacmi Runa Tucungapac shamushca ñuca cutimuna punzhapish canga.

³⁸ Chai punzhapi manarac yacu juizhu callaricpica, gentecunaca micushpa, ubiashpa, cazarashpa causacurca. Chashnami Noé huambuc huasiman yaicungacamanca carca.

³⁹ Chashnami mana entendishpa, yacu juizhu tucui paicunata tapangacaman causarca. Chashnallatacmi Runa Tucungapac shamushca ñuca cutimuna punzhapipish canga.

⁴⁰ Ishcai runami chagrapi canga. Paicunamantaca shucca pushashca, shucca saquishcami canga.

⁴¹ Ishcai huarmipish cutacungami. Paicunamantaca shucca pushashca, shucca saquishcami canga.

⁴² Mandac ima horas chayamunata mana yachashcamanta, alli yuyaihuan chaparacuichic.

⁴³ Caita yuyarichic: Ima horas shuhuac shamunata huasiyuc yachashpaca, mana sueñushpami chapanman. Chashnami huasimanta imatapish mana shuhuachinman.

⁴⁴ Runa Tucungapac shamushca ñucaca, cancuna mana yuyashca horasmi chayamusha. Chaimanta allichirishpa shuyacuichic.

Alli servicmantapish, mana alli servicmantapish

⁴⁵ ¿Maijantac alli cazuc, alli yuyaiyuc servic runaca canga? Paipac amo mandashcata cazushpami, serviccunaman micuna horas caranga.

⁴⁶ Mandashcata pactachishpa causacucpi amo cuticpica, ¡chai servicca cushicungami!

⁴⁷ Chashna alli cazucmanca amoca tucui charishcacunatami minganga. Chaica chashnatacmi canga.

⁴⁸ Ashtahuanpish mana cazuc servicca: “Ñuca amoca mana utca shamungachu” yuyashpami,

⁴⁹ caishuc serviccunata macashpa, machaccunahuan tandarishpa micushpa, ubiashpa puri callaringa.

⁵⁰ Chai servicpac amoca mana yuyashca punzha, mana yuyashca horasmi chayamunga.

⁵¹ Chashna shamushpami llaquichishpa, mishqui shimi jayac shungu gentecunahuan churanga. Chaipica huacaihuanmi quiru caniringa.