SAN MATEO 22 - Dios Rimashcata Quillcashcami

Jesús bodahuan chimbapurashpa parlashcamanta

¹ Jesús cutinllatac yuyaita japina parlohuan parlashpaca:

² «Jahua pacha Dios mandacucman yaicunaca shuc jatun mandac paipac churita cazarachishpa,

³ paipac serviccunata bodaman cayac cachacpi, mana shamusha nic shinami.

⁴ Mana shamusha nicpi, cutinllatac shuctac serviccunata cachashpaca: “Jatun huagracunatapish, shuctac huira animalcunatapish huañuchishpami, jatun micuita ruhuashcani. Ñami tucui allichishca. Bodaman shamuichic nicunmi nigrichic” nishpa cacharca.

⁵ Chashna cayacpipish, mana uyashpami maijancunaca trabajangapac, maijancunaca catungapac rircacuna.

⁶ Maijancunacarin jatun mandac cachashca serviccunata macashpami huañuchirca.

⁷ Chashna ruhuacpimi, jatun mandacca yallita piñarishpa, chai huañuchic runacunataca huañuchishpa, chai pueblotapish rupachichun soldadocunata mandarca.

⁸ Chaimantami jatun mandacca serviccunataca: “Bodaca tucui allichishcami. Cayashcacuna mana shamusha nishcachu.

⁹ Chaimanta cancuna mai ñancunaman llucshishpa, pipish ricuricta pushamuichic” nishpa cacharca.

¹⁰ Chaimantami serviccunaca ñancunaman llucshishpa, pipish ricuricta alli cachun, mana alli cachun bodaman cayamurca. Chashnami boda huasipica jundachirca.

¹¹ Jatun mandac ucuman yaicushpaca, boda churanata mana churarishca runatami ricurca.

¹² Chaita ricushpaca: “Uyai, ¿ima nishpatac boda churanata mana churarishca caipica cangui?” nirca. Chashna nicpica, chai runaca upallami carca.

¹³ Chaimantami jatun mandacca serviccunataca: “Cai runataca chaqui maquita huatashpa, canzha puraman shitaichic. Chaipica huacaihuan quiru canirinami tiyan” nirca.

¹⁴ Achcami cayashcacunaca, cutin acllashcacunaca ashallami» nirca.

Impuestomanta tapushcamanta

¹⁵ Chai quipami fariseocunaca, Jesusta ima shina pandachishpa juchanchinata yuyarinacurca.

¹⁶ Chashna yuyarishpami, paicunapac yachacuccunatapish, mandac Herodespac runacunatapish tapuchun cacharca. Shina cachacpi, paicuna rishpaca: —Yachachic, canca imapish cashcallatami yachachingui. Dios munashca shina causachunmi allita yachachingui. Canca mana manchashpa, mana piman tucushpami yachachingui.

¹⁷ Canca, ¿imatatac ningui? ¿Roma llactata jatun mandac Cesarman impuestota paganachu canga? Mana cashpaca, ¿manachu pagana canga?— nishpa tapurca.

¹⁸ Jesusca, paicuna mana alli yuyaihuan tapuc shamushcata yachashpami paicunataca: —Mishqui shimi jayac shungu, ¿ima nishpatac ñucataca pandachishun nicunguichic?

¹⁹ Impuestota pagana cullquita ricuchichic— nirca. Shina nicpimi, shuc denariota ricuchirca.

²⁰ Chashna ricuchicpimi Jesusca: —Cai cullquipica, ¿pipac ñahuitac, pipac shutitac tiyacun?— nishpa tapurca.

²¹ Chashna tapucpimi paicunaca: —Jatun mandac Cesarpacmi— nirca. Shina nicpimi Jesusca: —Shinashpaca jatun mandac Cesarpac cashcataca, jatun mandac Cesarllamantac cuichic, Diospac cashcataca, Diosllamantac cuichic— nirca.

²² Chaita uyashpaca, mancharishpami upalla rircacuna.

Jesús huañushcacuna causarinamanta parlashcamanta

²³ Chai punzhapimi huañushcacuna causarinata mana cric maijan saduceocuna Jesuspacman shamushpa tapushpaca:

²⁴ —Yachachic, Moisesca: “Maijanpish manarac huahuata charishpa huañucpica, huauquimi chai viudahuan cazarana can. Chashnami huañushca huauquipac randi huahuata charina can” nishcami.

²⁵ Ñucanchicpurapimi canchis huauquicuna tiyarca. Chai huauquicunamanta punta huauquimi manarac huahuata charishpa huañurca. Saquiric viudahuanca huauquimi cazararca.

²⁶ Quipa huauquipish, ashtahuan quipa huauquipish cazararcami. Chashnami tucui canchis huauquicuna cazararca.

²⁷ Quipaca chai huarmipish huañurcami.

²⁸ Chashna canchis huauquicunahuan cazarashca cashcamantaca, huañushcacuna causarina punzhapica, ¿maijanpac huarmitac canga?— nirca.

²⁹ Chashna nicpimi Jesusca: —Cancunaca, Dios quillcachishcatapish, Diospac podertapish mana yachashpami, yalli pandaricunguichic.

³⁰ Huañushcacuna causarina punzhapica, mana cazarangacunachu, mana cazarachingachu, ashtahuanpish jahua pacha angelcuna shinami cangacuna.

³¹ Huañushcacuna causarinamantaca, ¿manachu Dios huillashcapica, ricushcanguichic? Diosca:

³² “Ñucaca Abrahampac, Isaacpac, Jacobopac Diosmi cani” ninmi. Diosca mana huañushcacunapac Dioschu, ashtahuanpish causaccunapac Diosmi— nirca.

³³ Jesús yachachishcata gentecuna uyashpaca mancharircami.

Mandashcacunamanta tapushcamanta

³⁴ Saduceocunata Jesús upallachishcata yachashpami, fariseocunaca tandanacurca.

³⁵ Paicunapuramanta mandashcata shuc yachachic, Jesusta pandachisha nishpa tapushpaca:

³⁶ —Yachachiclla, mandashcacunamantaca, ¿maijantac ashtahuan yalli cazunaca?— nirca.

³⁷ Shina nicpimi Jesusca: —“Canta Mandac Diosta tucui shunguhuan, tucui almahuan, tucui yuyaihuan cuyangui” ninmi.

³⁸ Cai mandashcami tucuimanta yalli ashtahuan cazunaca.

³⁹ Quipa mandashcapish, chai shinallatacmi: “Can ima shinami cuyaringui, chashnallatac shuccunatapish cuyangui” ninmi.

⁴⁰ Cai ishcai mandashcacunami tucui mandashcacunapac, Dios ima nishcata huillaccuna huillashcacunapac sapi shinaca— nirca.

Cristoca mandac Davidtapish Mandac cashcamanta

⁴¹ Fariseocuna chaipi tandanacushca cacpimi Jesusca:

⁴² —Cristomantaca, ¿imatatac yuyanguichic? ¿Pipac churi cashcatatac yuyanguichic?— nishpa tapurca. Shina nicpimi, paicunaca: —Mandac Davidpac aillupuramantami can— nircacuna.

⁴³ Chashna nicpimi Jesusca: —Chashna cacpica, ¿ima nishpatac Davidllatac Diospac Espíritu yuyaita cucpica, Cristoca: “Ñucata Mandacmi” nirca? Davidca:

⁴⁴ “Mandac Diosca ñucata Mandactaca: Canta piñaccunata cambac chaquipi churangacaman, canca ñuca alli maquiman tiyacuilla” nishcami.

⁴⁵ Davidllatac “ñucata Mandac” nicpica, ¿ima shinatac Cristoca Davidpac aillupura cangayari?— nirca.

⁴⁶ Jesús chashna nicpica, pi imata mana cutichircachu. Chai punzhamanta pachami pi ashtahuan mana tapurca.