SAN MATEO 20 - Dios Rimashcata Quillcashcami

Uvasta pallanahuan chimbapurashpa Jesús parlashcamanta

¹ Jahua pacha Dios mandacucca, shuc amo paipac uvas chagrata pallachingapac, tutamanta gentecunata mashcangapac llucshic shinami.

² Ña tarishpaca, shuc punzhapi mashnata paganata parlashpami, uvasta pallachun cacharca.

³ Cutin punzhallata puebloman llucshishpaca, taucacuna plazapi yangalla tiyacuctami ricurca.

⁴ Paicunata ricushpaca: “Cancunapish ñuca chagrapi uvasta pallangapac richic. Mashnata pagana cashcataca pagashallami” nirca. Shina nicpica, paicunapish rircallami.

⁵ Cutinllatac chaupi punzhata, quimsa pacha chishita rishpapish, chashnallatacmi ruhuarca.

⁶ Cutinllatac pichca pacha chishita plazaman rishpapish, taucacuna yangalla tiyacuctami ricurca. Chashna ricushpaca: “¿Ima nishpatac cancunaca yanga tucui punzha caipi canguichic?” nirca.

⁷ Shina nicpica paicunaca: “Pipish mana trabajota cunchu. Chaimantami yangalla caipi tiyacunchic” nirca. Chashna nicpimi amoca: “Cancunapish richic, ñuca chagrapi uvasta pallagrichic” nirca.

⁸ Ña tutayamucucpi, amo mayordomota cayashpaca: “Pallaccunata cayashpa, quipata yaicuccunamanpish, punta yaicuccunacamanpish mashnata pagana cashcata pagai” nirca.

⁹ Pichca pacha chishita yaicuccunapish tucui punzha trabajomantami cullquita chasquirca.

¹⁰ Shinallatac tutamanta pallangapac yaicuccuna chayashpaca: “Ñucanchicca yallitami japishun” nishpami yuyacurca. Ashtahuanpish shuc punzha trabajollamantami japirca.

¹¹ Chashna shuc punzhallamanta japishpami chagrayuc amotaca:

¹² “Cai quipata yaicuccunaca shuc horasllatami trabajashca, ashtahuanpish ñucanchicca tucui punzhami rupaipi llaquita apashpa, trabajashcanchic. ¿Chashna cashca jahuachu, paicunamanpish ñucanchic-huan pacta pagangui?” nirca.

¹³ Chaimantami amo paicunapuramanta shucta cayashpaca: “Uyai, cantaca ima mana allita mana ruhuacunichu. ¿Manachu shuc punzha mashnata paganata parlanacurcanchic?

¹⁴ Cunanca cambac pagota japishpa ri. Ñucaca cai quipata pallangapac yaicuccunamanpish, canhuan pacta paganatami munani.

¹⁵ Ñuca cullquihuanca, imata ruhuasha nishpapish ruhuashallami. ¿Chashna allita ruhuacpichu envidiahuan piñaringui?” nirca.

¹⁶ Chai shinallatacmi punta caccunaca quipa cangacuna, cutin quipa caccunaca punta cangacuna— nishpami, Jesusca yachachirca.

Jesús pai huañunata cutin huillashcamanta

¹⁷ Jesús Jerusalén puebloman ricushpa, paipac chunga ishcai yachacuccunallata cayashpaca:

¹⁸ «Cunanca Jerusalenmanmi ricunchic. Chaipimi Runa Tucungapac shamushca ñucataca, curacunata mandac curacunaman, mandashcacunata yachachiccunamanmi japishpa cungacuna. Paicunami “huañunami cangui” nishpa,

¹⁹ mana israelcunaman cungacuna. Paicunaca ñucata pucllashpa asingami. Macashpa, cruzpi chacatashpami huañuchinga. Chashna huañuchicpipish, quimsa punzhapica causarishallami» nirca.

Jacobopac, Juanpac mama mañashcamanta

²⁰ Zebedeopac huarmimi Jesuspacman shamushpa, paipac ñaupapi cungurishpa mañarca.

²¹ Chashna mañacpimi Jesusca: —¿Imatatac ningui?— nirca. Chashna nicpimi chai huarmica: —Ñuca huahuacunata can mandanapi shuctaca cambac alli maquiman, shuctaca cambac lluqui maquiman tiyachingui— nirca.

²² Chashna nicpimi Jesusca: —Cancunaca imata mañacushcatapish mana yachanguichicchu. ¿Cancunaca jayacta ubiac shina llaquita ñuca shina apai pudinguichicchu?— nirca. Chashna nicpimi paicunaca: —Ari, apashunllami— nirca.

²³ Chashna nicpimi Jesusca: —Ari, cancunaca ñuca shina llaquita apanguichicmi. Ashtahuanpish maijanta ñuca alli maquiman, lluqui maquiman tiyachinataca, Diosmi maijanman allichishcata charicun. Chaitaca mana ñucachu ruhuasha— nirca.

²⁴ Chaita caishuc chunga yachacuccuna uyashpaca, chai huauquicunahuanca piñarircami.

²⁵ Chaimanta Jesús paicunata cayashpaca: —Cai pachapi mandaccunaca quiquin munashcata ruhuachishpami, gentecunataca charincuna. Chai mandaccunatapish shuctac ashtahuan jatun mandacca mandanllami. Chaitaca yachanguichicmi.

²⁶ Cancunapurapica mana chashnachu cana canguichic, ashtahuanpish cancunapurapi maijan mandac casha nishpaca, caishuccunata servinami canguichic.

²⁷ Maijanpish cancunapurapi punta casha nishpaca, yangalla tucushpami, caishuccunata servina canguichic.

²⁸ Chai shinallatacmi Runa Tucungapac shamushca ñucaca, mana servichingapac shamurcani, ashtahuanpish servingapac, huañushpa achcacunata quishpichingapac shamurcani— nirca.

Jesús ñahui mana ricuc runacunata alliyachishcamanta

²⁹ Jesús paipac yachacuccunahuan Jericó pueblomanta llucshicucpica, achca gentecunami caticurca.

³⁰ Ñanpi tiyacuc, ñahui mana ricuc ishcai runacuna Jesús chaita pasacucta uyashpaca: —¡Mandac Davidpac aillupuramanta Apunchic Jesús, ñucanchictaca llaquiyari!— nishpa, mañarca.

³¹ Gentecuna upallai nicpipish paicunaca: —¡Mandac Davidpac aillupuramanta Apunchic Jesús, ñucanchictaca llaquiyari!— nishpami, ashtahuan caparirca.

³² Chaimanta Jesús shayarishpa, paicunata cayashpaca: —¿Imatatac ruhuachun ninguichic?— nirca.

³³ Chashna nicpimi paicunaca: —Apunchic Jesús, ñucanchic ñahuicuna ricuchunmi munanchic— nirca.

³⁴ Chaimantami Jesusca paicunata llaquishpa, paicunapac ñahuipi tuparirca. Chashna tuparicpica, ñapish ñahuicuna ricucpi, Jesusta catishpa rircacunallami.