SAN MATEO 2 - Dios Rimashcata Quillcashcami

Yachac runacuna Jesusta ricugrishcamanta

¹ Judea llacta Belén pueblopimi Jesusca huacharirca. Chai punzhacunaca Herodesmi chai llactataca mandacurca. Chaipimi inti llucshina ladomanta, yachaccuna Jerusalén puebloman shamurca. Paicunaca lucerota ricushpa yachacuccunami carca.

² Paicunaca: —¿Israelcunata mandangapac huacharishca huahuaca, maipitac? Ñucanchicca inti llucshina ladopi, huahua huacharishcata ricuchic lucerotami ricushpa, alli ningapac shamunchic— nirca.

³ Chaita uyashpami, mandac Herodesca yallita mancharirca. Jerusalenpi causaccunapish, chashnallatacmi mancharirca.

⁴ Chaimantami Herodesca Israel curacunata mandac curacunatapish, mandashcacunata yachachiccunatapish cayashpaca: —¿Maipitac Quishpichic Cristoca huacharinga?— nirca.

⁵ Chashna nicpimi paicunaca: —Diosmanta ñaupa huillacca: “Judea llacta Belén pueblopimi huacharinga” nincunami. Paicuna quillcashca:

⁶ “Judea llacta Belenlla, canca tucui Judea pueblocunamanta alli nishca pueblomi cangui. Canmantami shuc mandac llucshinga. Paimi ñuca acllashca israelcunataca pushanga” nishcami— nirca.

⁷ Chashna nicpimi, Herodesca yachaccunata pacalla cayashpa tapushpa, punzha lucero ricurishcata allita yachac chayarca.

⁸ Chaimanta, paicunata Belenman cachashpaca: —Chaiman rishpa, huahuata allita mashcagrichic. Ña tarishpaca huillangapac shamunguichic, ñucapish chai huahuata alli nigringapac— nirca.

⁹ Jatun mandac Herodes chashna nicpica, chai yachaccunaca rircami. Paicuna ricpica, inti llucshina ladopi ricurishca lucerollatacmi ñaupata rishpa, huahua Jesús siricuc huasi jahuapi jarcarirca.

¹⁰ Yachaccuna chai lucerota ricushpaca, yallitami cushicurca.

¹¹ Paicuna chai huasiman yaicushpaca, huahuatami paipac mama Mariandi ricurca. Chaimantami cungurishpa “allimari cangui” nircacuna. Shinallatac quipita pascashpami, curitapish, inciensotapish, mirratapish curca.

¹² Dios yachaccunaman muscuipi ricurishpa “Herodespacman ama cutichun” nicpimi, shuctac lado ñanta paicunapac llactamanca cutirca.

Egipto llactaman miticushpa rishcamanta

¹³ Yachaccuna rishca quipaca, Mandac Dios cachashca ángel muscuipi Joseman ricurishpaca: «Mandac Herodesmi huahuataca huañuchingapac mashcachigricun. Cunanca jatarishpa, huahuata paipac mamandi Egipto llactaman apai. Ñuca ima horas shamuchun ningacaman chaipi cagri» nirca.

¹⁴ Shina nicpimi, Joseca riccharishpa, chai tutallatac huahuata apashpa, mama Mariandi Egipto llactaman rirca.

¹⁵ Mandac Dios ñaupa huillacman huillachishca pactachunmi, chai llactapi Herodes huañungacaman causarcacuna. Pai huillachishpaca: «Egipto llactamantami ñuca Churitaca cayarcani» nishcami carca.

Herodes huahuacunata huañuchichun mandashcamanta

¹⁶ Herodesca yachaccuna umashcamantami, munai piñarishpa, tucui muyundi Belén llactapi causac, manarac ishcai huatata charic cari huahuacunata huañuchichun mandarca. Chashnami yachaccuna lucerota ricushca punzhamanta ñaupaman huacharishca huahuacunata huañuchichirca.

¹⁷ Chashnami, Diosmanta ñaupa huillac Jeremías quillcashcaca pactarca.

¹⁸ Paica: «Ramá pueblopica ¡alau! nishpa caparishcami uyarirca. Chaica Raquelmi, paipac huahuacunamanta huacacurca. Huahuacuna huañushcamantami Paitaca pipish mana cushichi pudircachu» ninmi.

Egipto llactamanta cutishcamanta

¹⁹ Herodes huañushca quipa, Mandac Diospac ángel Egiptopi Joseman muscuipi ricurishpaca.

²⁰ «Jatarishpa, huahuata apashpa, mama Mariandi Israel llactaman cuti. Huahuata huañuchishun niccunaca ñami huañushca» nirca.

²¹ Chaimantami Joseca jatarishpa, huahuata apashpa, mama Mariandi Israel llactaman cutirca.

²² Ashtahuanpish Herodespac churi Arquelao paipac taitapac randi, Judea llactata mandacushcata yachashpami, chaiman rinataca mancharca. Chaimantami Mandac Dios cutin muscuipi huillacpi, Galilea llactaman rirca.

²³ Chaiman chayashpaca, ñaupa huillaccuna huillashca pactachunmi Nazaret pueblopi causangapac rirca. Chai huillaccunaca: “Paica nazareno nishcami canga” nishca carca.