SAN MATEO 19 - Dios Rimashcata Quillcashcami

Cusandi huarmindi mana raquirinamanta

¹ Chaicunata nishca quipami, Jesusca Galilea llactamanta rishpa, Jordán yacu chimba lado Judea llactaman rirca.

² Achca gentecunami Jesusta caticurca. Chaipimi Jesusca ungushcacunata alliyachirca.

³ Chaimantami maijan fariseocuna Jesuspacman cuchuyashpa, paita pandachisha nishpaca: —¿Cusaca huarmimanta raquirinaca allichu canga?— nishpa, tapurca.

⁴ Chashna nicpimi Jesusca: —Dios cai pachata ruhuashpaca, caritapish, huarmitapish ruhuarcami. ¿Chaitaca manachu Dios quillcachishcapica ricushcanguichic?

⁵ Dios quillcachishcapica: “Carica taita mamata saquishpa, paipac huarmihuanmi tandaringa. Chashna tandanacushpaca, shucllami tucunga” nircami.

⁶ Chashna cashcamantaca ña mana ishcaichu, ashtahuanpish shucllami can. Chaimanta Dios tandachishcataca, pi mana chicanyachinachu can— nirca.

⁷ Fariseocuna Jesusta tapushpaca: —¿Ima nishpatac Moisesca firmata cushpaca, huarmimanta raquirichunlla nishpa mandarca?— nirca.

⁸ Chashna nicpimi Jesusca: —Moisesca cancuna sinchi shungu cacpimi, huarmimanta raquirichun saquirca, ashtahuanpish callaripica, mana chashnachu carca.

⁹ Shina cacpipish ñucaca: Manapish huarmi huainayacpi, huarmimanta raquirishpa shuc-huan cazaracca, juchallinmi ninimi— nirca.

¹⁰ Chashna nicpimi yachacuccunaca: —Huarmimanta mana raquirinalla cacpica, cazaranaca mana allichu— nirca.

¹¹ Chashna nicpimi Jesusca: —Mana tucui caricunachu caita entendincuna, ashtahuanpish Dios yuyaita cushcacunallami caitaca entendin.

¹² Maijancunaca capashca shinami huacharin. Cutin maijancunaca capashcatacmi cancuna. Cutin maijancunaca jahua pacha Dios mandacucpi servingapacmi, capashca shina tucun. Chashnami tauca runacuna mana cazarashpa causancuna. Maijanpish cai shina casha nishpaca chashna cachunlla— nirca.

Huahuacunamanta Jesús mañashcamanta

¹³ Huahuacunapac uma jahuapi maquita churashpa Diosta mañachunmi Jesuspacman pushamurca. Chaita ricushpami paipac yachacuccunaca piñarirca.

¹⁴ Chaimantami Jesusca: —Huahuacuna ñucapacman shamuchun, ama jarcaichicchu. Cai huahuacuna shina caccunami Dios mandacucmanca yaicunga— nirca.

¹⁵ Jesusca huahuacunapac uma jahuapi maquita churashpa mañashpaca, chaimanta rircallami.

Chayuc mosomanta

¹⁶ Shuc runa Jesuspacman shamushpaca: —Yachachic, huiñai causaita charingapacca, ¿ima allitatac ruhuana cani?— nishpa tapurca.

¹⁷ Shina nicpimi Jesusca: —¿Ima nishpatac allimanta tapungui? Allica, shucllami tiyan. Huiñai causaita charisha nishpaca, mandashcacunata pactachingui— nirca.

¹⁸ Chashna nicpimi chai mosoca: —¿Maijan mandashcacunatatac pactachina cani?— nirca. Chashna nicpimi Jesusca: —Ama huañuchingui, ama shuhuangui, ama llullangui, ama huainayangui,

¹⁹ taita mamata cuyangui. Can ima shinami cuyaringui, chashnallatac shuccunatapish cuyangui— nirca.

²⁰ Chashna nicpimi, chai mosoca: —Chaicunataca tucuitami pactachishcani. Ashtahuanca, ¿imatatac ashtahuan ruhuana cani?— nirca.

²¹ Chashna nicpimi Jesusca: —Diospac ñaupapi alli canata munashpaca, tucui charishcacunata catushpa, huacchacunaman cugri. Chashna ruhuashpami, jahua pachapica achcata charingui. Chashna ruhuashpaca, ñucata catilla— nirca.

²² Chai mosoca yalli chayucmi carca. Chaimantami chashna nicpica, yallita llaquirirca.

²³ Chaimantami Jesusca paipac yachacuccunataca: —Chayuccuna Dios mandacucman yaicunaca sinchimi canga. Chaica chashnatacmi.

²⁴ Shuc chayuc runa, Dios mandacucman yaicunapac randica, shuc camellomi auja ringrita pasarinman— nirca.

²⁵ Chaita yachacuccuna uyashpaca, ashtahuan mancharishpami: —Chashna cacpica, ¿pitac quishpiri pudingayari?— ninacurca.

²⁶ Chashna nicpi, Jesús paicunata ricurashpaca: —Gentecunapac yuyaipica, maita mana quishpiripacchu, ashtahuanpish Diosmanca imapish ruhuaipacllami— nirca.

²⁷ Chashna nicpimi Pedroca: —Ñucanchicca tucui charishcacunata saquishpami, cantaca caticunchic. ¿Chaimantaca imatatac japishun?— nishpa tapurca.

²⁸ Chaimantami Jesusca: —Cai pachata Dios mushucta ruhuacucpimi, Runa Tucungapac shamushca ñucaca, sumaimana achicllapi mandai callarisha. Chaipica cancunapish ñucata caticcuna cashcamantaca, chunga ishcai mandaccuna mandashpa tiyarinapi tiyarishpami, chunga ishcai Israel aillucunata mandanguichic. Chaica chashnatacmi canga.

²⁹ Maijanpish ñucata catingaraicu huasita, huauquicunata, panicunata, taita mamata, huarmita, huahuacunata, allpata saquicca, chaicunamanta patsac yallihuanmi japinga. Huiñai causaitapish japingami.

³⁰ Chaica cunan punzhapi ‘allimi cani’ niccunaca, yangallami tucunga. Cutin, cunan punzhapi yangalla caccunaca, alli nishcami canga.