SAN MATEO 18 - Dios Rimashcata Quillcashcami

“¿Maijantac ashtahuan alli canchic?” ninacushcamanta

¹ Chai punzhacuna yachacuccuna Jesuspacman cuchuyashpaca: —Jahua pacha Dios mandacucpica, ¿Pitac ashtahuan alli nishca canchic?— nishpa tapurca.

² Chaimantami Jesusca shuc huahuata cayashpa, paicunapac ñaupapi churashpaca:

³ —Cancuna huahuacuna shina mana tucushpa, huahuacuna ruhuac shina mana ruhuashpaca, jahua pacha Dios mandacucmanca mana yaicunguichicchu. Chaica chashnatacmi canga.

⁴ Maijanpish cai huahuacuna shina humildemi jahua pacha Dios mandacucpica tucuimanta yalli alli nishcaca canga.

⁵ Maijanpish ñuca shutipi shuc huahuata chasquicca, ñucatami chasquin.

Juchapi mana urmachina cashcamanta

⁶ Maijanpish cai huahuacuna shina ñucata caticcunata juchapi urmachictaca, cutana rumita cungapi huatashpa, jatun cuchapi shitanami ashtahuan alli canman.

⁷ Cai pachapica, juchapi urmachiccunaca tiyangallatacmi. Mana tucuringachu. Shina cacpipish, ¡juchapi urmachicca, imachari tucunga!

⁸ Chaimanta cambac maqui, cambac chaqui juchapi urmachicpica, pitishpa shitangui. Ishcai chaquindi, ishcai maquindi mana huañuc ninapi shitashca canapac randica, chulla chaquilla, chulla maquilla jahua pachaman yaicunami canmanca ashtahuan alli canga.

⁹ Cambac ñahui juchapi urmachicpica, llucchishpa shitangui. Ishcai ñahuindi ucu pacha ninapi shitashca canapac randica, chulla ñahuilla jahua pachapi yaicunami canmanca ashtahuan alli canga.

Jesús chingarishca ovejahuan chimbapurashpa parlashcamanta

¹⁰ Cai huahuacuna shinapuramanta maijanta ama mana valichinguichicchu. Ñucaca: Paicunata jahua pacha Taitapac ñahuita ricuc angelcunami cuidacun ninimi.

¹¹ Runa Tucungapac shamushca ñucaca, chingarishcacunata quishpichingapacmi shamurcani.

¹² ¿Imatatac yuyanguichic? Shuc runa patsac ovejata michicushpa, shuc ovejata chingachishpaca, ¿manachu iscun chunga iscunta michinapi saquishpa mashcagrinman?

¹³ Ña tarishpaca, mana chingarishca iscun chunga iscun ovejamanta yallimi cushicunman. Chaica chashnatacmi can.

¹⁴ Chashnallatacmi jahua pachapi cac Taitapish, cai huahua shinacunamanta shucllapish ama chingarichun munan.

Perdonanacunamanta

¹⁵ Maijan cric canta llaquichishpa juchallicpica, paillata cayashpa, paillahuan rimangui. Pai can rimashcata uyashpaca, cutinllatacmi Diospacman cutinga.

¹⁶ Can rimashcata mana uyacpica, shucta, mana cashpaca ishcaita pushashpa ringui. Ishcai, mana cashpaca quimsa rishpa uyashpami, cierto cashcata huillanga.

¹⁷ Paicunata mana uyacpica, tandanacushca criccunaman huillangui. Paicunatapish mana uyacpica, Diosta mana cricta shina, impuestota japicta shina charinguichic.

¹⁸ Cai pachapi cancuna allimi nishcaca, jahua pachapipish alli nishcallatami canga. Cai pachapi mana allichu nishcaca, jahua pachapipish mana alli nishcallatami canga. Chaica chashnatacmi canga.

¹⁹ Cutinllatacmi nini: Cancunapuramanta maijanhuan shuc yuyailla tucushpa, cai pachapi imata ruhuachun Diosta mañacpica, jahua pachapi cac ñuca Taitaca cungami.

²⁰ Maipimi ishcai, mana cashpaca quimsa ñuca shutipi tandanacucpica, ñucaca chaipimi cani— nirca.

²¹ Chaimanta Pedroca Jesuspacman shamushpaca: —Apunchic Jesús, ¿mashna cutincamantac ñucata piñachictaca perdonasha? ¿Canchis cutinchu perdonasha?— nirca.

²² Shina nicpimi Jesusca: —Mana canchis cutinllachu perdonana cangui, ashtahuanpish canchis cutin canchis chunga cutinmi perdonana nini.

Mana perdonasha nic runamanta Jesús parlashcamanta

²³ Jahua pacha Dios mandacucca, shuc jatun mandac paita serviccuna mashna debishcata tapungapac cayac shinami.

²⁴ Tapungapac cayacpica, chunga huaranga talento cullquita debic shuc runatami pushamurca.

²⁵ Pai cutichingapac cullquita mana charicpimi, chai mandacca huarmitapish, huahuacunatapish, tucui charishcacunatapish catuchun mandarca.

²⁶ Chaimantami chai debic runaca mandacpac ñaupapi cumurishpaca: “Amito, ashallitota shuyai, ñuca debishcataca cutichishallami” nishpa, mañarca.

²⁷ Shina nicpimi, mandac paita llaquishpaca: “Shinashpaca saquilla, ama cutichichu” nirca.

²⁸ Chai servic chaimanta rishpaca, paiman ashalla cullquita debic runahuanmi tuparca. Chashna tupashpaca: “¡Debita cutichi!” nishpami, cungapi japirishpa sipi callarirca.

²⁹ Chashna ruhuacpimi, chai ashalla cullquita debic runa paipac ñaupapi cungurishpaca: “Ashata shuyai, ñuca debishcataca cutichishallami” nishpa, mañarca.

³⁰ Chashna mañacpipish, chai runaca mana uyarcachu, ashtahuanpish carcelpimi debita cutichingacaman churarca.

³¹ Caishuc serviccuna chaita ricushpaca, mai llaquirishpami, tucui ima tucushcata jatun mandacman huillagrirca.

³² Chaimantami chai mandacca chai debic runata cutin cayachishpaca: “¡Millai runa, can mañacpica, achcata debishcatapish saquircanillami!

³³ ¿Ima nishpatac ñuca canta llaquishpa debita saquishca shinallatac, canpi caishuc servic runata mana saquircangui?” nirca.

³⁴ Chashna piñarishpami, tucui debishcata cutichingacaman carcelpi llaquita apachun churachirca— nirca.

³⁵ Jesusca: —Chashnallatacmi jahua pacha Taitapish cancunapura tucui shunguhuan mana perdonanacucpica ruhuanga— nirca.