SAN MATEO 17 - Dios Rimashcata Quillcashcami

Jesús shuctaclaya tucushcamanta

¹ Sucta punzha quipami, Jesusca Pedrotapish, Jacobotapish, paipac huauqui Juantapish pushashpa, shuc jatun urcuman rirca.

² Chaipimi Jesusca paicunapac ñaupapi shuctaclaya tucushpa, ñahuica inti shina jagan nicuc, churanaca luz shina yurac achicyachicuc ricurirca.

³ Chaipimi Moisespish, Eliaspish, Jesus-huan parlanacucta ricurcacuna.

⁴ Chaimantami Pedroca Jesustaca: «Apunchic Jesús, ñucanchicca allimi caiman shamushcanchic. Can munacpica, quimsa chucllata ruhuasha, shuctaca canman, shuctaca Moisesman, shuctaca Eliasman» nirca.

⁵ Pedro rimacucpillatacmi, yuranlla puyu paicunata taparca. Chai puyu ucumanta rimashpaca: «Caimi ñuca cuyashca Churi. Paimi ñucataca cushichin. Paita uyanguichic» nirca.

⁶ Yachacuccuna chaita uyashpaca, manchaihuanmi pambacaman cumurirca.

⁷ Chaimanta Jesús cuchuyashpa, tuparishpaca: «Jatarichic, ama mancharichicchu» nirca.

⁸ Paicuna jatarishpaca pitapish mana ricurcachu. Chaipica Jesusllami cashca carca.

⁹ Jesús yachacuccunahuan urcumanta cutishpaca: —Cai ricushcataca Runa Tucungapac shamushca huañushpa, causaringacaman paimanta ama huillanguichicchu— nishpami mandarca.

¹⁰ Chaimanta yachacuccuna Jesustaca: —¿Imamantatac mandashcacunata yachachiccunaca: “Eliasracmi shamunga” ninyari?— nirca.

¹¹ Shina nicpimi Jesusca: —Ari, Eliasracmi shamunga. Pai shamushpami, tucuita allichinga.

¹² Shina cacpipish ñucaca: Eliasca ñami shamurca. Paita mana ricsishpami piñashpa, paicuna munashcata ruhuarca. Shinallatacmi Runa Tucungapac shamushca ñucapish, paicunapac maquipi llaquita apana cani— nirca.

¹³ Jesús chashna nicpimi, yachacuccunaca Bautizac Juanmanta parlacushcata entendirca.

Supai japishca huambrata Jesús alliyachishcamanta

¹⁴ Jesús achca gentecunapacman chayacpi, shuc runa paipac ñaupaman shamushpa, cungurishpaca:

¹⁵ —Apunchic Jesús, ñuca churita llaquiyari. Paica yuyaita chingachishpami yacupi, ninapi urmashpa, llaquita apacunlla.

¹⁶ Cambac yachacuccunapacmanca, ñami apamushpa ricuchircani, ashtahuanpish mana alliyachi pudircachu— nirca.

¹⁷ Chaimantami Jesusca: —¡Aij, mana cric millai gentecunalla! ¿Ima horacamantac cancunamanca yachachicushalla? ¿Maicamantac cancunahuanca llaquita apacushalla? Huambrata pushamuichic— nirca.

¹⁸ Pushamucpica, Jesusca sinchita rimashpami, huambramanta supaitaca llucchishpa cacharca. Huambraca chai ratollatacmi alli tucurca.

¹⁹ Chaimantami yachacuccuna Jesusta pacalla tapushpaca: —¿Ima nishpatac ñucanchicca supaita mana llucchi pudircanchic?— nirca.

²⁰ Shina nicpimi Jesusca: —Cancunaca, mana tucui shunguhuan cricchu canguichic. Cancuna crishca shuc uchilla mostaza muyu shinallapish cacpica, cai urcuta “caimanta chimbaman ri” nicpica, rinmanllami. Chashna ashallatapish cric cashpaca, imapish ruhuanguichicmanmi. Chaica chashnatacmi can.

²¹ Cai shina supaicunataca ayunashpa, Diosta mañashpallami llucchina— nirca.

Jesús huañunata cutin huillashcamanta

²² Jesusca paipac yachacuccuna Galilea llactapi cacpimi, paicunataca: «Runa Tucungapac shamushca ñucataca, runacunaman japichingacunami.

²³ Paicunami ñucataca huañuchinga. Shina huañuchicpipish, quimsa punzhapica causarishami» nirca. Chaimantami yachacuccunaca munai llaquirirca.

Diosta mañana huasimanta impuestota cushcamanta

²⁴ Jesús Capernaúm puebloman chayacpimi, Diosta mañana huasimanta impuestota japiccuna Pedropacman cuchuyashpaca: —Cancunata yachachicca, ¿Diosta mañana huasimanta impuestota paganllachu?— nishpa tapurca.

²⁵ Shina nicpimi Pedroca: —Ari, paganllami— nirca. Pedro huasiman chayacpi, Jesús tapushpaca: —¿Simón imatatac yuyangui? Cai pacha jatun mandaccunaca, ¿paicunapac llactacunamantachu, mana cashpaca, shuctac llactacunamantachu impuestotaca chasquincuna?— nirca.

²⁶ Shina nicpimi Pedroca: —Shuctac llactacunamantami chasquin— nirca. Shina nicpimi Jesusca: —Shinashpaca, quiquin llactapi causaccunaca mana paganachu canchic.

²⁷ Ashtahuanpish impuestota japiccunata mana piñachingapacca, cuchaman ri. Chaiman chayashpaca, anzuelota shitangui. Punta japishca challua shimipimi cullquita taringui. Chaita canmantapish, ñucamantapish impuestota cungui— nirca.