SAN MATEO 15 - Dios Rimashcata Quillcashcami

Mana alli yuyaicuna pandachic cashcamanta

¹ Jerusalenmanta shamuc maijan fariseocunapish, mandashcacunata yachachiccunapish Jesuspacman cuchuyashpaca:

² —¿Ima nishpatac cambac yachacuccunaca, ñaupa taitacuna yachachishcata mana cazushpa, maquita mana jahuashpa micuncuna?— nirca.

³ Chaimantami Jesusca: —¿Cancunapish ima nishpatac Dios mandashcata mana cazushpa, ñaupa taitacuna yachachishcallata catinguichic?

⁴ Dios mandashpaca: “Cambac taita mamata cuyangui” shinallatac “Maijanpish taita mamata mana alli nicca, huañuchishcami canga” ninmi.

⁵ Chashna nicucpipish, cancunaca: “Taita mama imata huahuacunaman mañacpica: ‘Caica Diosman cuna ofrendami. Chaimantami mana cui pudini’ ninallami” ninguichicmi.

⁶ Chashnami taita mamata mana ayudashpa, Dios mandashcata mana cazushpa, yanga yachachishcallata catinguichic.

⁷ ¡Cancunaca mishqui shimi, jayac shungucuna! Dios ima nishcata huillac Isaías cancunamanta huillashpaca, allitami nirca. Paica:

⁸ “Cai gentecunaca shimillahuanmi ñucataca alli nincuna. Ashtahuanpish shunguca, ñucamanta carupimi.

⁹ Yangallami ñucata alli nincuna. Paicuna yachachishpapish, runacuna mandashcallatami yachachincuna” nishcami— nirca.

¹⁰ Chai quipami Jesusca gentecunata cayashpaca: —Allita uyashpa entendichic:

¹¹ Imapish shimita yaicucca mana juchayucta ruhuanchu, ashtahuanpish shungumanta llucshishca, mana alli rimaicunami, runataca juchayucta ruhuan— nirca.

¹² Chaimantami yachacuccuna Jesuspacman cuchuyashpaca: —Can chashna nicpi, ¿fariseocuna piñarishcataca yachanguichu?— nirca.

¹³ Chashna nicpimi Jesusca: —Jahua pacha ñuca Taita mana tarpushca yuraca, ima yura cashpapish sapindi pitishcami canga.

¹⁴ Ñahui mana ricuc shina pushaccunataca saquichiclla. Ñahui mana ricucpura pushanacushpaca, ishcaitacmi jutcupi urmanga— nirca.

¹⁵ Chaimantami Pedroca Jesustaca: —Chimbapurashpa parlashcata entendichi— nirca.

¹⁶ Shina nicpimi, Jesusca: —¿Cancunapish manaracchu entendi pudinguichic?

¹⁷ Tucui ima micushcapish, huicsamanmi rin. Cutin chaimantaca llucshinmi. ¿Chaitaca manachu entendinguichic?

¹⁸ Ashtahuanpish millai rimashcacunaca shungumanta llucshishpami, runataca juchayucta ruhuan.

¹⁹ Shungumantami millai yuyaicuna llucshin. Chaimantami huañuchincuna, huainayancuna, ima millaita ruhuancuna, shuhuancuna, llullancuna, millaita rimancuna.

²⁰ Cai mana alli yuyaicunami juchayucta ruhuan. Ashtahuanpish maquita mana jahuashpa micunallaca, mana juchayucta ruhuanchu— nirca.

Canaán llacta huarmi Jesusta crishcamanta

²¹ Jesús chaimanta rishpaca, Tiro, Sidón llactacunamanmi rirca.

²² Jesús chaipi cacpimi, Canaán llacta huarmi caparishpaca: —Mandac Davidpac aillupuramanta Apunchic Jesús, ¡ñucata llaquiyari! Ñuca huahuatami supai japishpa, llaquichicun— nirca.

²³ Ashtahuanpish Jesusca imata mana nircachu. Chaimantami yachacuccuna Jesuspacman shamushpaca: —Huashata caparishpa catic huarmita caimanta richun niyari— nishpa mañarca.

²⁴ Chashna nicpimi Jesusca: —Diosca ñucataca, oveja chingarishca shina, israelcunapacmanllami cacharca— nirca.

²⁵ Chaimanta chai huarmi, paipac ñaupapi cungurishpaca: —Apunchic Jesús, ñucata ayudaiyari— nirca.

²⁶ Shina nicpimi Jesusca: —Huahuacunamanta tandata quichushpa, allcucunaman cunaca, mana allichu— nirca.

²⁷ Shina nicpimi, chai huarmica: —Ari, Apunchic Jesús. Amocuna mizamanta urmachishca micunataca allcucuna micunllami— nirca.

²⁸ Shina nicpimi Jesusca: —¡Huarmi, canca tucui shunguhuanmi crishcangui! Chaimanta can munashca shina ruhuarichun— nirca. Shina nincami, chai huarmipac huahuaca alli tucurca.

Tauca ungushcacunata Jesús alliyachishcamanta

²⁹ Jesús chaimanta rishpaca, Galilea cucha patamanmi chayarca. Chaimantaca urcuman rishpami, chaipi tiyarirca.

³⁰ Chaipi tiyacucpimi, achca gentecuna suchucunatapish, ñahui mana ricuccunatapish, maqui illaccunatapish, mana rimaccunatapish, shuctac ungushcacunatapish apamushpa, Jesuspac ñaupapi churarca. Chashna apamucpica, tucuitami alliyachirca.

³¹ Chaimantami mana rimariccunapish rimarirca, maqui illaccunapish alliyarca, suchucunapish purirca, ñahui mana ricuccunapish ricurca. Chaita ricushpami, gentecunaca cushicushpa, israelcunapac Diostaca “allimari cangui” ni callarirca.

Chuscu huaranga yalli gentecunaman Jesús carashcamanta

³² Jesús paipac yachacuccunata cayashpaca: —Cai tucui gentecunami quimsa punzhata caipi ñucahuan cancuna. Paicunaca ima micunata mana charinchu. Paicunataca llaquinayanmi. Mana carashpa, huasiman cachacpica, yalli yarcaihuan, ñanpi tigrangami— nirca.

³³ Shina nicpimi yachacuccunaca: —Cai tucuiman carangapacca, ¿maipitac micunataca tarishun? Caipica pipish mana causanchu— nirca.

³⁴ Shina nicpimi Jesusca: —¿Cancunaca mashna tandatatac charinguichic?— nirca. Shina nicpimi paicunaca: —Canchis tanda, asha challuallatami charinchic— nirca.

³⁵ Shina nicpimi, Jesusca gentecunata chai pambapi tiyachichun mandarca.

³⁶ Chaimantami canchis tandata, asha challuata japishpa, Diosta pagui nirca. Chai quipaca chaupishpa chaupishpami, paipac yachacuccunaman curca. Paicunaca gentecunamanmi cararca.

³⁷ Chashna caracpica, mana nictami micurcacuna. Chai puchuchishcataca canchis taza jundatami yachacuccunaca tandarca.

³⁸ Chaipi micuccunaca huarmicunata, huahuacunata mana yupashpami, chuscu huaranga carca.

³⁹ Chai quipami Jesusca gentecunata cachashpami, canoapi tiyarishpa, Magdala llactaman rirca.