SAN MATEO 14 - Dios Rimashcata Quillcashcami

Bautizac Juanta huañuchishcamanta

¹ Chai punzhacunapi Galilea llactata mandac Herodes Jesusmanta parlanacucta uyashpa,

² serviccunata cayashpaca: «Chai Bautizac Juanmi, huañushcacunapuramanta causarishca canga. Chaimantami milagrocunata ruhuacunga» nirca.

³ Herodesca paipac huauqui Felipepac huarmi Herodías nishcata uyashpami, Juantaca cadenahuan huatashpa, carcelpi churachishca carca.

⁴ Herodesca Herodias-huanmi apanacushpa causacurca. Chaimantami Bautizac Juanca Herodestaca: «Shucpac huarmihuan causanaca mana allichu» nishca carca.

⁵ Herodesca Juanta huañuchisha nicushpapish, gentecunata manchashpami, mana huañuchirca. Chaica, Juantata Dios ima nishcata huillacmi nicmi carca.

⁶ Herodesca pai huacharishca punzhata yuyarishpami cayashcacunahuan cushicucurca. Chaipimi Herodiaspac huahuaca, tucuipac ñaupapi bailarca. Chaica ricushpami, Herodesca cushicurca.

⁷ Chaimantami Herodesca pai imata mañashca cungapac ari nirca.

⁸ Paipac mama yachachishca cashcamantami, chai huambraca: «Cunanllatac shuc platopi Bautizac Juanpac umata cui» nirca.

⁹ Chaimantami mandac Herodesca mai llaquiricushpapish chaipi caccunapac ñaupapi ari nishcamantaca,

¹⁰ Juanpac umata pitimuchun carcelman cacharca.

¹¹ Umataca shuc platopi apamushpami, chai solteraman curca. Paica mamamanmi curca.

¹² Chai quipami Juanpac yachacuccuna shamushpa, paipac cuerpotaca apashpa enterrarca. Chaimantami Jesusman huillangapac rirca.

Jesús pichca huaranga yalli gentecunaman carashcamanta

¹³ Jesús, Bautizac Juan huañushcata yachashpaca, paillami canoapi tiyarishpa, shitashca pambaman rirca. Shina ricpipish, achca gentecunami paicunapac pueblocunamanta llucshishpa, chaquillahuan catirca.

¹⁴ Jesús canoamanta uricushpa, achca gentecunata ricushpaca, llaquirishpami maijan ungushcacunata alliyachirca.

¹⁵ Ña amsayamucucpi, yachacuccuna Jesuspacman cuchuyashpaca: —Ña amsayacunmi. Caipica ima huasillapish mana tiyanchu. Gentecuna pueblocunaman rishpa, ima micunatapish randichun cachai— nirca.

¹⁶ Shina nicpimi Jesusca: —¿Imapactac maiman ricunga? Cancunallatac caraichic— nirca.

¹⁷ Shina nicpimi paicunaca: —Pichca tanda, ishcai challuallatami charinchic— nircacuna.

¹⁸ Shina nicpimi Jesusca: —Caiman apamuichic— nirca.

¹⁹ Chaimantami gentecunata quihua pambapi tiyarichun mandashpa, chai pichca tandata, ishcai challuata japishpa, huichailla ricushpa, Diosta pagui nishpaca, chaupishpa, paipac yachacuccunaman curca. Paicunaca gentecunamanmi cararca.

²⁰ Shina caracpica, tucui gentecunami mana nicta micurca. Cutin puchushcataca paipac yachacuccunami chunga ishcai taza jundata tandarca.

²¹ Chai micuccunaca huarmicunata, huahuacunata mana yupashpami, pichca huaranga shina carca.

Yacu jahuata Jesús purishcamanta

²² Chaimantaca Jesusca paipac yachacuccunata canoapi huichicushpa, cucha chimba ladoman ñaupachishpa cacharca. Shinallatac gentecunatapish huasicunaman cacharcami.

²³ Shina cachashca quipaca, pailla urcuman rishpami, Diosta mañagrirca. Chaipica tutayangacamanmi pailla carca.

²⁴ Canoaca ña chaupi cuchapimi carca. Huaira ñaupamanta jarcacpimi, canoaca yacupi caiman chaiman cuyuricurca.

²⁵ Jesusca ña punzhayamucucpimi, yacu jahuata purishpa yachacuccunapacmanca cuchuyacurca.

²⁶ Cucha jahuata puricta ricushpami mancharishpa: —¡Almatami ricunchic!— nircacuna.

²⁷ Shina mancharicucpimi Jesusca: —Ama mancharichicchu, sinchicuichic, ñucami cani— nirca.

²⁸ Shina nicpimi Pedroca: —Apunchic Jesús can cashpaca, ñucatapish yacu jahuata cambacman shamuchun ni— nirca. Shina nicpimi Jesusca:

²⁹ —Shamui— nirca. Chaimantami Pedroca canoamanta uricushpa, yacu jahuata paipacman ri callarirca.

³⁰ Shina ricushpapish, yalli huairata ricushpami, mancharishpa yacupi ucuyagrirca. Chaimantami: —¡Apunchic Jesús, quishpichiyari!— nishpa caparirca.

³¹ Shina caparincami Jesusca, Pedrota maquimanta japishpaca: —¿Ima nishpatac ñucata mana tucui shunguhuan crishpa, mancharcangui?— nirca.

³² Paicuna canoaman huichicucpica, huairaca pararircami.

³³ Chaimantami canoapi caccunaca Jesuspac ñaupapi cungurishpa: —Canca Diospac Churitacmi cangui— nishpa, alli nircacuna.

Jesús Genesaret llactapi ungushcacunata alliyachishcamanta

³⁴ Cucha chimba ladoman pasashpaca, Genesaret llactamanmi chayarcacuna.

³⁵ Chaipi causac gentecunaca Jesús cashcata ricsishpami, tucui chai llactacunapi huillarcacuna. Chaimantami ungushcacunata paipacman apamurca.

³⁶ Chai ungushcacunaca Jesuspac churana puntallapipish tuparichun saquichunmi mañarcacuna. Jesuspac churanapi tupariccunaca, tucuimi alliyarca.