SAN MATEO 13 - Dios Rimashcata Quillcashcami

Tarpuc runamanta Jesús chimbapurashpa parlashcamanta

¹ Chai punzhallatacmi Jesusca huasimanta rishpa, cucha patapi tiyarirca.

² Chaiman achca gentecuna cuchuyacpimi, Chaimantami Jesusca shuc canoapi tiyarirca. Achca gentecunami yacu patapi tiyacurca.

³ Chaipi Jesús tauca rimaicunata chimbapurashpa yachachishpaca: «Shuc tarpuc runami trigota tarpungapac llucshirca.

⁴ Pai tarpucucpica, maijan muyuca ñanpimi urmarca. Chai muyutaca zhutacuna shamushpami mururca.

⁵ Maijan muyuca rumi allpapimi urmarca. Ashalla allpapi cashcamantami utca huiñarca.

⁶ Chashna cacpipish, chai yuraca mana ucuman sapita charishcamantami, inti rupachicpica chaquirca.

⁷ Maijan muyuca casha chaupipimi urmarca. Casha huiñashpaca aguachircami.

⁸ Ashtahuanpish maijan muyuca alli allpapimi urmarca. Chaimantami allita pucushpa, maijanca shucmanta pasacta, maijanca sucta chungata, maijanca quimsa chungata pucurca.

⁹ Maijanpish ringrita charicca, caita allita uyachun» nirca.

Imamanta chimbapurashpa parlashcamanta

¹⁰ Chaimantami paipac yachacuccunaca Jesuspacman cuchuyashpaca: —¿Imamantatac chimabapurashpa parlangui?— nishpa tapurca.

¹¹ Chashna tapucpimi Jesusca: —Cancunaman Dios mandacucmanta yachachishpaca, pimanpish mana yachachishcatami yachachini, ashtahuanpish shuccunamanca mana chashna yachachishcanichu.

¹² Maijan alli yuyaita charicmanca, ashtahuanmi cunga. Chashna cucpica, ashtahuanmi charinga. Ashtahuanpish mana charicmantaca, pai ashalla charishcatapish quichungami.

¹³ Chaimantami paicunamanca chimbapurashpa parlani. Paicunaca ricushpapish, mana ricushca shina, uyashpapish mana uyashca shinami, mana entendincuna.

¹⁴ Paicuna chashna cacpimi, Dios ima nishcata huillac Isaiasca: “Mashnata uyashpapish, mana entendinchu. Mashnata ricushpapish, mana ricunchu.

¹⁵ Cai gentecunapac shunguca, rumiyashcami. Paicunapac ringripish tapashca shinami, ñahuipish huichcashca shinami. Mana chashna cacpica, ñahuipish ricunmanmi, ringripish uyanmanmi, shungupi yuyarishpa, ñucapacman cutirinmanmi. Ñucapacman cutiricpica, alliyachimanmi” nishcami.

¹⁶ Cushicuichic, cancunapac ñahuipish ricucunmi, ringripish uyacunmi.

¹⁷ Dios ima nishcata huillaccunapish, cashcata ruhuaccunapish, cunan cancuna ricushcataca ricusha nishpapish mana ricurcachu. Uyasha nishpapish, mana uyarcacunachu. Chaica chashnatacmi.

Tarpuc runamanta parlashcata Jesús entendichishcamanta

¹⁸ Tarpuc runahuan chimbapurashpa parlashca imata nisha nishcata, cancunaca alli uyaichic:

¹⁹ Ñanpi urmashca muyu shinaca, Dios mandacucmanta huillashcata, uyashpapish mana entendicmi. Dios rimashcata paipac shungupi chasquishcataca, diablo shamushpami chingachinlla.

²⁰ Rumi allpapi urmashca muyu shinaca, Diosmanta huillashcata cushicushpa, utca chasquicmi.

²¹ Chaica, mana shungupi sapiyashca cashpami, llaquicuna japicpi, mana cashpaca alli huillaita chasquishcamanta piñacpica cutirinlla.

²² Casha chaupipi urmashca muyu shinaca, Dios rimashcata uyashpapish, ima llaquicunamanta, charina yuyaimanta chai uyashcataca saquicmi. Chashnami aguarishpa, mana pucuc muyu shina tucun.

²³ Alli allpapi urmashca muyu shinaca, Dios rimashcata allita entendicmi. Chaica allita pucushpa maijanca shucmanta quimsa chungata, maijanca sucta chungata, maijanca pasacta pucuc shinami tucun— nirca.

Trigo chagrahuan, mana alli quihua chimbapurashcamanta

²⁴ Jesús chimbapurashpa parlashpaca: «Jahua pacha Dios mandacucca, shuc runa paipac allpapi alli muyuta jichacpi,

²⁵ paita piñac runa shamushpa, gentecuna sueñucucpi, mana alli muyuta jichac shinami.

²⁶ Trigo huiñashpa, grano ricuricpica, mana alli quihuapish ricurircami.

²⁷ Chashna mana alli quihua ricuricpimi, serviccunaca amotaca: “Amito, ¿ima shinatac cai mana alli quihuaca ricurin? ¿Manachu cambac allpapica alli muyuta jicharcanchic?” nirca.

²⁸ Chashna nicpimi paica: “Maijan ñucata piñac runami mana alli quihuata tarpushca canga” nirca. Chashna nicpimi, chai serviccunaca: “¿Manachu chai mana alli quihuata trigo chagramanta pilashpa anchuchigrishun?” nirca.

²⁹ Chashna nicpimi paica: “Mana, mana alli quihuata pilacushpaca, trigondi pilanguichicmi.

³⁰ Trigota cosechana punzhacaman huiñachun saquichiclla. Chai punzhami trigota piticcunataca: ‘Chai mana alli quihuata pitishpa, rupachingapac huataichic. Ashtahuanpish trigotaca grano huacaichinapi huacaichichic’ nishpa mandashallami” nirca» nirca.

Mostaza muyuhuan chimbapurashpa Jesús parlashcamanta

³¹ Jesús chimbapurashpa parlashpaca: «Jahua pacha Dios mandacucca, shuc runa paipac allpapi mostaza muyuta tarpushca shinami.

³² Mostaza muyuca tucui muyumanta yalli ñutumi. Cutin huiñashpaca, tucui yuracunamanta yallimi tucun. Chai yurapimi, zhutacunapish cuzhancuna» nirca.

Levaduramanta chimbapurashpa Jesús parlashcamanta

³³ Jesús cutin chimbapurashpa parlashpaca: «Jahua pacha Dios mandacucca, shuc huarmi quimsa taza harinata ashalla levadurahuan chapushpa, punguillichic shinami» nirca.

Jesús chimbapurashca parlohuan yachachishcamanta

³⁴ Jesusca tucui caicunataca, chimbapurashca parlocunallahuanmi yachachirca. Chashnaca,

³⁵ Dios ima nishcata huillac nishca pactachunmi, tucuita yachachirca. Chai huillacca: «Chimpapurashca parlohuanmi parlasha. Cai pachata ruhuashca punzhamanta pacha, pi mana yachachishcatami huillasha» nishcami.

Mana alli quihuahuan chimbapurashpa parlashcata Jesús entendichishcamanta

³⁶ Jesús gentecunata cachashpaca, huasimanmi yaicurca. Chaipi cacpi, paipac yachacuccuna cuchuyashpaca: —Trigopi huiñashca chai mana alli quihuan chimbapurashpa parlo imata nisha nishcata yachachi— nirca.

³⁷ Chashna tapucpimi Jesusca: —Alli muyuta jichac shinaca, Runa Tucungapac shamushca ñucami cani.

³⁸ Allpa shinaca, cai pachapi causac gentecunami. Alli muyu shinaca, Dios mandacucpi causaccunami. Mana alli quihua shinaca, diablo mandashca causaccunami.

³⁹ Trigo chagrapi mana alli quihuata jichac shinaca, diablomi. Cosechana nishpaca, cai pacha tucurinatami nisha nin. Trigota cosechaccunaca angelcunami.

⁴⁰ Mana alli quihuata pitishpa rupachic shinami, cai pacha tucuri punzhapica canga.

⁴¹ Runa Tucungapac shamushca ñucami, mandashca causaccunapuramanta mana allita ruhuaccunatapish, shuccunata pandachiccunatapish tandachichun, angelcunata cachasha.

⁴² Chashna tandachishpami nina hornopi shitanga. Chaipimi huacaihuan quiru caniringa.

⁴³ Ashtahuanpish cashcata ruhuaccunaca inti shinami, Dios mandacucpica achic nicunga. Maijanpish ringrita chariccunaca, cai nishcata alli uyaichic.

Pacashca curimanta Jesús chimbapurashpa parlashcamanta

⁴⁴ Jahua pacha Dios mandacucca curita allpapi pacashca shinami. Chai pacashcata shuc runa tarishpaca, chaillapitacmi pacashpa saquinman. Quipaca cushicushpami pai tucui charishcacunata catushpa, chai allpata randinman.

Jesús sumac perlas-huan chimbapurashpa parlashcamanta

⁴⁵ Shinallatac jahua pacha Dios mandacucca achca valishca perlasta randingapac mashcac runa shinami.

⁴⁶ Sumac perlasta tarishpaca, paipac tucui charishcacunata catushpami randinman.

Jesús linchihuan chimbapurashpa parlashcamanta

⁴⁷ Shinallatac jahua pacha Dios mandacucca linchita yacupi shitacpi, tucuilaya challuacunata apamuc shinami.

⁴⁸ Linchipi challuacuna jundacpica, yacu pataman llucchishpami, allitaca tazapi huacaichishpa, mana allitaca shitan.

⁴⁹ Chashnami cai pacha tucuri punzhapica canga. Chaica angelcuna shamushpami allita ruhuaccunapuramanta mana allicunata chicanyachishpa,

⁵⁰ jatun ninapi shitanga. Chaipimi huacaihuan quiru caniringa— nirca.

Ñaupa yachachishcamantapish, cunan yachachishcamantapish

⁵¹ Jesús paipac yachacuccunata tapushpaca: —¿Tucui caicunataca entendinguichicchu?— nirca. Shina nicpimi, paicunaca: —Ari— nirca.

⁵² Chashna nicpimi Jesusca: —Shinashpaca, jahua pacha Dios mandacucmanta yachachicpica, shuc taita paipac huasimanta huacaichishpa charishcacunata mushuctapish, maucatapish canzhaman llucchic shinami— nirca.

Jesús Nazaret pueblopi cashcamanta

⁵³ Jesús chai chimbapurashpa parlashca quipaca, chaimanta rircallami.

⁵⁴ Chashnami Nazaret puebloman chayashpa, tandanacuna huasipi yachachi callarirca. Chaita paicuna uyashpaca: —¿Maipitac cai tucuitaca yachacurca? ¿Ima shinatac paica milagrocunatapish ruhuanyari?

⁵⁵ Paica carpinteropac churillami. Paipac mamapish Mariami. Paica Jacobopac, Josepac, Simonpac, Judaspac huauquimi.

⁵⁶ Paipac panicunapish caillapitacmi ñucanchic-huan causancuna. ¿Maipitac cai tucuitaca yachacurca?— nishpa mancharinacurca.

⁵⁷ Jesustaca mana crisha nircacunachu. Chaimantami Jesusca: —Dios ima nishcata huillactaca, maipipish allimi chasquin. Ashtahuanpish quiquin llactapi, quiquin familiapurapica mana uyashun nincunachu— nirca.

⁵⁸ Chaimantami Jesusca paipac llactapica mana achca milagrocunata ruhuarca.