SAN MATEO 12 - Dios Rimashcata Quillcashcami

Jesuspac yachacuccuna samana punzhapi trigo umata pitishcamanta

¹ Samana punzhami Jesusca paipac yachacuccunahuan trigo chagra chaupita ricurca. Paipac yachacuccunaca yarcaihuan cashpami, trigo umata cacushpa micui callarirca.

² Chaita fariseocuna ricushpami, Jesustaca: —Uyai, cambac yachacuccunaca samana punzhapi mana ruhuana cashcatami ruhuacun— nirca.

³ Shina nicpimi Jesusca: —David paihuan puriccunahuan yarcaihuan imata ruhuashcataca Dios quillcachishcapica, ¿manachu ricushcanguichic?

⁴ Paicunaca Diosta mañana huasiman yaicushpami, Diosman cushca tandataca mana micuna cacpipish micurcacuna. Chaitaca curacunami micuc carca.

⁵ Samana punzhapipish curacuna Diosta mañana huasiman yaicushpa, trabajashpapish mana juchallishcataca, ¿manachu mandashcapica ricushcanguichic?

⁶ Chaica, Diosta mañana huasitapish yallimi caipi can ninimi.

⁷ Dios quillcachishcapi: “Animalta cushpa rupachinapac randica, shuccunata llaquiccuna cachun” nishcataca, ¿manachu entendinguichic? Chaita entendishca cashpaca, mana faltayucta mana juchanchinguichicmanchu.

⁸ Runa Tucungapac shamushca ñucami, samana punzha cacpipish, imata ruhuanataca yachani— nirca.

Maqui chaquishca runata Jesús alliyachishcamanta

⁹ Jesús chaimanta rishpaca, israelcuna tandanacuna huasimanmi yaicurca.

¹⁰ Chaipimi maqui chaquishca shuc runa tiyacurca. Chaipi cac gentecuna Jesusta juchanchingaraicu tapushpaca: —Mandashcapica, ¿samana punzhapipish ungushcata alliyachichun ninchu?— nirca.

¹¹ Shina tapucpimi Jesusca: —Maijan cancuna samana punzhapi shuc oveja jutcupi urmacpica, ¿manachu llucchinguichicman?

¹² Runaca ovejatapish yalli valinmi. Chaimanta samana punzhapica, imapish allitaca ruhuanallami— nirca.

¹³ Chashna nishpami, chai runataca: —Maquita chutai— nirca. Pai maquita chutacpica, alliyashpa, caishuc maqui shinallatacmi saquirirca.

¹⁴ Chaita fariseocuna ricushpa, canzhaman llucshishpaca, ima shina Jesusta huañuchinatami yuyarinacurca.

Jesusca Dios acllashca servic cashcamanta

¹⁵ Jesús chaita yachashpaca chaimanta rircami. Achca gentecunami catishpa rirca. Jesusca tucui ungushcacunata alliyachishpapish

¹⁶ paimanta ama piman huillachunmi mandarca.

¹⁷ Chashnami Dios ima nishcata huillac Isaías huillashca pactarca. Isaías huillashpaca:

¹⁸ «Caipimi ñuca acllashca servicca. Paitami ñucaca cuyani. Paimi ñucata cushichin. Paimanmi Espirituta cusha. Tucui llactacunapi cashcata ruhuashpa mandanamanta huillanga.

¹⁹ Paica pihuanpish mana rimarinacungachu, ñancunapipish pai caparishcaca mana uyaringachu.

²⁰ Cashcata ruhuashpa taripangacaman huishtuyashca cañatapish mana paquingachu, ashalla japiricuc mechatapish mana huañuchingachu.

²¹ Tucui llactacunami paipi shunguta churashpa shuyanga» nishcami.

Jesusta “diablohuanmi cangui” nishcamanta

²² Shuc punzhami supai japishca, ñahui mana ricuc, mana rimaric runata Jesuspacman apamurca. Chashna apamucpica, Jesusca alliyachircami. Chaimantami ñahuipish ricurca, shimipish rimarca.

²³ Chaimantami tucui gentecuna mancharishpa, caishuc chaishuc: «¿Paichu Davidpac aillupuramanta canga?» nishpa tapunacurca.

²⁴ Chaita uyashpami fariseocunaca: «Cai runaca supaicunata mandac Beelzebuhuan cashpami, supaicunataca llucchishpa cachan» nircacuna.

²⁵ Chashna yuyacushcata yachashpami Jesusca: «Shuc llactata mandaccunapura piñanacushpa macanacucpica, chai llactaca tucuringami. Shuc pueblopi, mana cashpaca shuc huasipi causaccunapura piñanacushpa macanacucpica tucuringami.

²⁶ Satanás mandashca supaicuna piñanacushpa, llucchishpa cachanacucpica, pai mandanaca tucuringami.

²⁷ Ñuca Beelzebuhuan supaicunata llucchishpa cachacpica, cancunapac yachacuccunaca, ¿pihuantac supaicunata llucchin? Chashna cacpica, paicunallatacmi cancuna pandaricushcataca ricuchincuna.

²⁸ Ñucaca Diospac Espirituhuanmi supaicunataca llucchishpa cachani. Chashna ruhuashpami, cancunapurapi Dios mandacushcata ricuchicuni.

²⁹ Pipish shuc sinchi runapac huasiman yaicushpa, imata shuhuangapacca, huasiyuc runataracmi chacnanman. Paita chacnashpallami, imatapish shuhuanman.

³⁰ Maijanpish mana ñucahuan cashpaca, ñucata piñacmi. Maijanpish ñucahuan mana cashpaca, ñuca tandachishcacunata tucuchicmi.

³¹ Chaimantami cancunataca: Ima juchata ruhuashcatapish, camishcatapish Diosca perdonangami. Ashtahuanpish Diospac Espirituta camishpa rimactaca, Diosca manatac perdonangachu.

³² Runa Tucungapac shamushca ñucata rimactaca Diosca perdonangami. Ashtahuanpish Diospac Espirituta rimactaca, cai pachapipish, quipa punzhapipish Diosca manatac perdonangachu.

Alli yuramantapish, mana alli yuramantapish

³³ Caita yuyarishun: Alli yuraca alli granotami pucun. Mana alli yuraca mana alli granotami pucun. Ima yurapish pucushpami imalaya cashcataca ricuchin.

³⁴ Culebrapac huahuacuna, cancunallatac millai cashpaca, ¿ima shinatac allita rimaringuichic? Shungupi ima yuyaicuna tiyashcatami, shimica riman.

³⁵ Alli runaca paipac shungupi alli yuyai tiyashcamantami, allita riman. Mana alli runaca paipac shungupi millai tiyashcamantami, mana allita riman.

³⁶ Ñucaca: Dios taripana punzhapimi shuccunata mana alli rimashcacunaca yacharinga ninimi.

³⁷ Chaica, cambac rimashcahuanmi alli nishca cangui. Mana cashpaca cambac rimashcallahuantacmi, llaquichishca cangui» nirca.

Millai runacuna Jesusta “milagrota ruhuai” nishcamanta

³⁸ Fariseocunapish, mandashcacunata yachachiccunapish Jesuspacman shamushpaca: —Yachachic, ima milagrota ruhuashpa ricuchi— nirca.

³⁹ Chashna nicpimi Jesusca: —Cai mana cric millai gentecunaca milagrota ruhuashpa ricuchichunmi mañancuna. Chashna mañashpapish imata mana ricungacunachu, ashtahuanpish Dios ima nishcata huillac Jonás ima shina tucushcallatami ricunga.

⁴⁰ Ima shinami Jonás quimsa tutata, quimsa punzhata shuc jatun challuapac huicsapi carca, chashnallatacmi Runa Tucungapac shamushca ñucaca, quimsa tutata, quimsa punzhata allpa ucupi casha.

⁴¹ Nínive pueblopi causaccunaca Dios ima nishcata Jonás huillacpica, llaquirishpa, Diosman cutirircami. Ñucacarin Jonastapish yallimi caipica cani. Dios taripana punzhapica, Ninivepi causaccunami cunan punzhapi causaccuna mana allita ruhuashcamantaca juchanchingapac jataringacuna.

⁴² Sabá llactata jatun mandac huarmipish alli yachac Salomón ima nishcata uyangapacmi, caru llactamanta shamurca. Cunan ñucaca Salomontapish yallimi caipica cani. Chaimantami Dios taripana punzhapica, chai huarmipish cunan punzhapi causaccuna mana allita ruhuashcamantaca juchanchingapac jataringa.

Shuc runamanta supai llucshishpapish, cutimuc cashcamanta

⁴³ Shuc runamanta supai llucshishpaca, shitashca pambacunapi samarinata mashcashpami purin. Samarinata mana tarishpaca:

⁴⁴ “Ñuca llucshimushca huasimanmi cutisha” nishpami yuyarin. Ña cutimushpaca, sumacta pichashpa, allichishca huasi shinatami chai runataca tarin.

⁴⁵ Chaimantami paita yalli ashtahuan millai caishuc canchis supaicunata pushashpa, chai runapica causangapac shamun. Chaimantami chai runaca ñaupa causacushcatapish yalli ashtahuan millai tucun. Shinallatacmi cunan punzhapi causac millai gentecunapish tucunga— nirca.

Jesuspac mamapish, huauquicunapish paipacman shamushcamanta

⁴⁶ Jesús huillacucpimi, paipac mamapish, huauquicunapish paihuan parlasha nishpa, canzhapi shayacurca.

⁴⁷ Chashna cacpimi, chaipi caccunapuramanta shucca: —Cambac mamapish, cambac huauquicunapish canhuan parlasha nishpami, canzhapi shuyacun— nirca.

⁴⁸ Shina nicpimi Jesusca: —¿Pitac ñuca mama, ñuca huauquicunaca?— nirca.

⁴⁹ Shina nishpa paipac yachacuccunata ricuchishpaca: —Caicunami ñuca mama, ñuca huauquicunaca.

⁵⁰ Maijanpish jahua pacha ñuca Taita munashcata ruhuaccunallami, ñuca mama, ñuca pani, ñuca huauqui— nirca.