SAN MATEO 11 - Dios Rimashcata Quillcashcami

Bautizac Juan Jesusman tapuchun cachashcamanta

¹ Jesús paipac chunga ishcai yachacuccunata yachachishpaca, Galilea llacta pueblocunapi yachachishpa, alli huillaita huillangapacmi rirca.

² Juanca carcelpi cashpami Quishpichic Cristo imata ruhuashcataca yachac chayarca. Chaimantami paipac yachacuccunapuramanta ishcaita Jesusman tapuchun cacharca.

³ Paicuna rishpaca: —¿Canchu chai shamuna cashca Quishpichic Cristoca cangui? Mana cashpaca, ¿shuctachu shuyana canchic?— nirca.

⁴ Chashna tapucpimi Jesusca: —Caipi imata ricushcatapish, uyashcatapish Juanman huillagrichic.

⁵ Ñahui mana ricuccuna ricucushcatapish, suchucunapish puricushcatapish, leprahuan ungushcacuna alliyashcatapish, ringri mana uyaccuna uyacushcatapish, huañushcacunata causachishcatapish, huacchacunaman alli huillaita huillashcatapish huillagrichic.

⁶ Cushicuichic, ñuca ima ruhuacushcata ricushpa, mana pandariccuna— nircami.

⁷ Juanpac yachacuccuna cutiricpi, Jesús Juanmanta gentecunaman parlashpaca: «Shitashca pambapica, ¿imatatac ricungapac rircanguichic? ¿Huairahuan caiman chaiman cuyuricuc carrizollatachu ricugrircanguichic?

⁸ Mana cashpaca, ¿imatatac ricungapac rircanguichic? ¿Shuc alli churanata churarishca runatachu ricugrircanguichic? Alli churanata churarishcaca chayuccunahuanmi cushicushpa, jatun mandaccunapac huasicunapi causan.

⁹ Shinashpaca, ¿imatatac ricugrircanguichic? ¿Dios ima nishcata huillactachu ricugrircanguichic? Ari, chaitami ricugrircanguichic. Juanca Dios ima nishcata huillactapish yallimi.

¹⁰ Dios quillcachishcapi Juanmanta rimashpaca: “Ñuca ima nishcata huillactaca, Quishpichic shamuna ñanta allichichunmi, ñaupachishpa cachani” nicunmi.

¹¹ Cai pachapica Bautizac Juanmanta yallica manatac tiyashcachu. Chashna cacpipish jahua pacha Dios mandacucpica, yangalla imapish mana cacmi, Juanta yalli alli nishcaca. Chaica, chashnatacmi can.

¹² Bautizac Juan huillai callarishca punzhamanta cunan punzhacamanmi jahua pacha Dios mandacucman yaicusha niccunataca millai gentecunaca chingachinata yuyashpa llaquichin.

¹³ Moisés mandashcapipish, Dios ima nishcata huillaccuna huillashcapipish, Juanmantami huillashca.

¹⁴ Chashquisha nishpaca, chasquichic. Dios ima nishcata huillac Elías nishcaca, Juanmi.

¹⁵ Maijanpish ringrita charicca, caita alli uyaichic.

¹⁶ Cai punzhapi causaccunataca, ¿imahuantac chimbapurasha? Paicunaca plaza pambapi huambracuna, caishuc chaishuc caparinacushpa:

¹⁷ “Flautapi tocacpipish, mana bailarcanguichicchu. Llaquillata cantacpipish, mana huacarcanguichicchu ninacuc shinami” ninmi.

¹⁸ Vinotapish mana ubiac, mana achcata micuc Juan shamucpica: “Paica supaihuanmi” ninguichicmi.

¹⁹ Runa Tucungapac shamushca ñuca imatapish micuc, vinotapish ubiacpica: “Cai runaca yalli micucmi, vinotapish ubiacmi, impuestota japiccunahuanpish, caishuc juchayuccunahuanpish tandaricmi” ninguichicmi. Cancuna chashna nicucpipish, Dios yachac cashcataca paita cazuccunami ricuchicun» nirca.

Jesús huillashcata mana cazuccunamanta

²⁰ Jesusca tauca pueblocunapimi, achca milagrocunata ruhuarca. Chashna ruhuacpipish, gentecunaca Diosman mana cutirircachu. Chaimantami, sinchita rimashpaca:

²¹ «¡Aij, Corazín pueblolla, Betsaida pueblolla! Cancunapac pueblocunapi ruhuashca shinata Tiro pueblopi, Sidón pueblopi ruhuashca cacpica, llaquirishpa, sharpa churanata churarishpa, uchupahuan cahuirishpa, Diosman cutirinmanmi carca.

²² Taripana punzhapica, Tiro pueblopi, Sidón pueblopi causaccunata yallimi cancunaca llaquichishca canguichic.

²³ Capernaúm pueblopi causaccuna, ¿jahua pachaman rishunmi yuyanguichicchu? Ashtahuanpish ucu pachamanmi shitashca canguichic. Cancunapac pueblopi milagrocunata ruhuashca shina, Sodoma pueblopi ruhuashca cacpica, cunan punzhacamanmi tiyanman carca.

²⁴ Taripana punzhapica Sodoma pueblopi causac millai gentecunata yalli cancunaca llaquichishca canguichic, ninimi» nirca.

Jesús “ñucapacman shamuichic” nishcamanta

²⁵ Chai quipami Jesusca: «Jahua pachata, cai pachata Mandac ñuca Taitalla, cantaca “allimari cangui” ninimi. Canca, cai yachanacunataca alli yuyaiyuc, alli yachaccunamanta pacashpami, huahuacuna shinamanmi, yachana yuyaita cushpa yachachishcangui.

²⁶ Ari, ñuca Taitito, chaitami munashcangui.

²⁷ Ñuca Taitaca tucuitami ñucamanca curca. Ñuca pipac Churi cashcataca, pi mana yachanchu, ñuca Taitallami yachan. Ñuca Taita pi cashcataca, pi mana yachanchu, ñucallami yachani. Pipish ñuca yuyaita cucllapimi, ñuca Taita pi cashcataca yachan.

²⁸ Aparishca, shaicushca shina causaccuna, tucuilla ñucapacman shamuichic. Ñucami cancunataca samachisha.

²⁹ Yugota apac shina, ñucata catichic, ñucamanta yachacuichic. Ñucaca mana piñaric, alli shungumi cani. Samaringuichicmi.

³⁰ Ñuca yugoca pangallami. Ñuca cushca aparinapish aparinallami» nirca.