SAN MATEO 10 - Dios Rimashcata Quillcashcami

Chunga apostolcunata acllashcamanta

¹ Jesusca paipac chunga ishcai yachacuccunata cayashpaca, supaicunatapish llucchichun, tucuilaya ungüitapish alliyachichun, nanaicunatapish anchuchichunmi poderta curca.

² Chai chunga ishcai apostolcunaca: Pedro nishca Simón, paipac huauqui Andrés, Zebedeopac churicuna Jacobo, Juan,

³ shinallatac Felipe, Bartolomé, Tomás, impuestota japic Mateo, Alfeopac churi Jacobo, Tadeo nishca Lebeo,

⁴ Celote nishca Simón, Judas Iscariotemi carca. Paimi quipataca Jesustaca japichirca.

Chunga ishcai yachacuccuna huillagrishcamanta

⁵ Chai chunga ishcai yachacuccunata Jesús cachashpaca: «Mana israelcunapacmanca ama ringuichicchu. Samaria llacta pueblocunamanpish ama yaicunguichicchu.

⁶ Ashtahuanpish chingarishca ovejacuna shina cac, israelcunapacman ringuichic.

⁷ Cancuna rishpaca: “Jahua pacha Diosca ñami mandagrin” nishpa huillanguichic.

⁸ Ungushcacunatapish alliyachinguichic, Lepra ungüitapish pichanguichic, huañushcacunatapish causachinguichic, supaicunatapish llucchishpa cachanguichic. Yangami caita ruhuangapacca poderta chasquircanguichic, chaimantami yanga ruhuana canguichic.

⁹ Curitapish, cullquitapish, cobretapish,

¹⁰ cucayu mochilatapish, yanandi churanatapish, ushutatapish, taunatapish ama apanguichicchu. Maipipish imata ruhuacca, japinata charinmi.

¹¹ Cancuna mai puebloman, mana cashpaca mai llactaman chayashpaca, alli cuyac runata mashcashpa, paipac huasipi shucman ringacaman chaipi canguichic.

¹² Chai huasipi chayashpa, chaipi caccunataca saludanguichic.

¹³ Chai huasiyuc cancunata alli chasquicpica, cancuna saludashcaca paicunahuanmi saquiringa. Mana alli chasquicpica, saludashcaca cancunamanmi cutinga.

¹⁴ Mai pueblopi cashpa, mai huasipi cashpa cancunata mana chasquishpa, cancuna huillashcata mana uyashun nicpica, chaimanta llucshishpa, cancunapac chaquipi catirishca allpatapish chaillapitac chaspishpa ringuichic.

¹⁵ Taripana punzhapica Sodoma pueblota, Gomorra pueblota llaquichishcatapish yallimi chai pueblopi causaccunaca llaquita apanga. Chaica, chashnatacmi canga.

Llaquichiccuna tiyanamanta

¹⁶ Ñucaca cancunataca ovejacunata atuccunapac chaupita cachac shinami cachani. Chaimanta cancunaca culebra shina yuyaisapa, paloma humilde caichic.

¹⁷ Cuidaringuichic, mandaccunapacmanpish japichingami. Tandanacuna huasicunapimi macanga.

¹⁸ Ñucata caticushcamantami llactata mandaccunapacmanpish, jatun mandaccunapacmanpish apanga. Shina cacpimi, paicunamanpish, mana israelcunamanpish ñucamanta huillanguichic.

¹⁹ Mandaccunapacman japichicpica ama: ‘¿Imatashi nishun?’ nishpa, llaquiringuichicchu. Cancuna rimai callaricpica, Diosmi yuyaita cunga.

²⁰ Mana cancunapac yuyaimantachu rimanguichic, ashtahuanpish Diospac Espiritumi, rimana yuyaita cunga.

²¹ Huauquica quiquin huauquillatatac, taitaca quiquin churillatatacmi huañuchiccunaman japichinga. Huahuacunaca taita mamata piñashpami, huañuchiccunaman japichinga.

²² Ñucamantami tucui gentecunapac piñashca canguichic. Maijanpish tucuringacaman llaquita apacmi quishpiringa.

²³ Maijan pueblopi llaquichicpica, shuctac puebloman ringuichic. Israel llactapi manarac tucuiman huillacpimi, Runa Tucungapac shamushca ñucaca cutimusha. Chaica, chashnatacmi canga.

²⁴ Yachacucca yachachicmanta mana ashtahuan yachacchu. Servicpish, amota mana ashtahuan yallichu.

²⁵ Yachacuc yachachic shina tucushpaca, allimi canman. Servicpish amo shina tucushpaca, allimi canman. Huasipi taita shina ñucata ‘supaicunata mandac Beelzebumi’ nishpaca, cancunatacarin, ¡imatachari ningacuna!

Diosta manchana cashcamanta

²⁶ Ima pacalla ruhuashcapish ricuringami, Imata pacalla ruhuashcapish yacharingami. Chaimanta gentecunata ama manchanguichicchu.

²⁷ Cancunaman pacallapi nishcataca, achicpi huillanguichic. Ringrillapi huillashcataca, huasi jahua pataman huichicushpa huillanguichic.

²⁸ Cuerpota huañuchiccunataca ama manchanguichicchu. Cuerpota huañuchishpapish, almataca mana huañuchi pudingachu. Ashtahuancarin almatapish, cuerpotapish ucu pachaman cachac Diosta manchanguichic.

²⁹ Ishcai zhutacunataca shuc cullquillapimi catun. Shina cacpipish, cancunapac Taita mana munacpica, shucllapish pambamanca mana urmanchu.

³⁰ Cancunapac umapi mashna acchapish yupashcami.

³¹ Chaimanta gentecunata ama manchanguichicchu. Cancunacarin, achca zhutacunatapish yalli valicmari canguichic.

Jesusmanta huillanata mana pingana cashcamanta

³² Maijanpish gentecunaman ñucata caticushcata huillacpica, ñucapish jahua pacha ñuca Taitaman ‘caticmi’ nishpa huillashami.

³³ Maijanpish gentecunapac ‘mana ricsinichu’ nicpica, ñucapish jahua pacha ñuca Taitapac ñaupapica: ‘Mana ricsinichu’ nishami.

Jesusta caticpi, piñana cashcamanta

³⁴ Ñucataca ama ‘sumac causaita cungapacmi, cai pachamanca shamurca’ ninguichicchu. Mana cushi causaita cungapacchu shamurcani, ashtahuanpish piñanacui tiyachunmi shamurcani.

³⁵ Churica taitahuan, huarmi huahuaca mamahuan, nueraca suegrahuan piñanacuchingapacmi shamurcani.

³⁶ Huasi ucupurallatacmi piñanacunga.

³⁷ Maijanpish taita mamata ñucata yalli cuyacca, mana ñucapacchu. Maijanpish paipac huahuacunata ñucata yalli cuyacca, mana ñucapacchu.

³⁸ Maijanpish cruzpi chacatashca shina llaquita mana apasha nicca, mana ñucapacchu.

³⁹ Maijanpish quiquin causaita llaquicca chingaringami, ashtahuanpish ñucata caticushcamanta quiquin causaita mana llaquicca quishpiringami.

Imata japina cashcamanta

⁴⁰ Maijanpish cancunata chasquicca, ñucatami chasquin. Ñucata chasquicca, ñucata cachac Diostami chasquin.

⁴¹ Maijanpish Dios ima nishcata huillacta chasquicca, Dios ima nishcata huillac japinatami japinga. Cashcata ruhuacta chasquicca, cashcata ruhuac japinatami japinga.

⁴² Maijanpish ñucata catic, yangalla runaman asha chiri yacuta cucca, Diosmanta japina cashcata japingami. Chaica chashnatacmi canga» nirca.