MARCOS 9 - Dios Rimashcata Quillcashcami

¹ Shinallatac Jesusca: —Maijan caipi caccunaca Dios, paipac poderhuan shamushpa, mandacucta ricungacaman manarac huañunguichicchu. Chaica chashnatacmi canga— nirca.

Jesús shuctaclaya ricurishcamanta

² Sucta punzha quipami, Jesusca Pedrotapish, Jacobotapish, Juantapish pushashpa, alto urcupi paicunalla cangapac rirca. Chaipimi paicunapac ñaupapi Jesusca shuctaclaya tucurca.

³ Churashcapish yuranlla, jagan nicucmi tucurca. Cai pachapica pipish mana chashna yuranllata tacshanchu.

⁴ Yachacuccunaca Eliastapish, Moisestapish Jesus-huan parlacuctami ricurca.

⁵ Shina ricushpami, Pedroca Jesustaca: —¡Yachachic, mai allimi caipica canchic! Quimsa chucllatami ruhuashun ninchic, shuctaca canman, shuctaca Moisesman, shuctaca Eliasman— nirca.

⁶ Yallita manchaihuan cashpami, Pedroca pai imata rimacushcatapish mana yacharca.

⁷ Shina rimacucpimi puyu llandushpa, paicunata llandurca. Chai puyu ucumanta shuc rimashca uyarishpaca: —Caimi ñuca cuyashca Churi. Pai ima nishcata uyanguichic— nirca.

⁸ Yachacuccuna muyundita ricushpaca, pitapish mana ricurcachu, Jesusllatami ricurca.

⁹ Chai urcumanta cutimushpaca, Jesusca chai quimsa yachacuccunataca chai ricushcataca, Runa Tucungapac shamushca Huañushcacunapuramanta causaringacaman ama piman huillachunmi mandarca.

¹⁰ Chaimantami pimanpish mana huillashpa, paicunapuralla parlanacushpaca: “¿Imamantatac huañushcacunapuramanta causarina nin?” nishpa tapunacurca.

¹¹ Chaimantami Jesustaca: —¿Ima nishpatac mandashcacunata yachachiccunaca: “Ñaupa huillac Eliasracmi shamunga” nincuna?— nishpa tapurca.

¹² Shina tapucpimi, Jesusca paicunataca: —Ari, Eliasracmi tucuita allichingapac shamunga. ¿Manachu Dios quillcachishcapica: “Runa Tucungapac shamushcataca mana ricunayachishpa llaquichingami” nicun?

¹³ Ashtahuanpish ñucaca: Eliasca ñami shamurca. Paitaca Dios quillcachishcapi nishca shinami piñashpa, munashcata ruhuarcacuna ninimi— nirca.

Jesús supai japishca huambrata alliyachishcamanta

¹⁴ Jesusca caishuc yachacuccunapacman cutimushpaca, paicunata achca gentecuna muyushpa shayacuctami ricurca. Mandashcacunata yachachiccunaca yachacuccunahuanmi sinchita rimaricurca.

¹⁵ Chai gentecuna Jesús shamucucta ricushpaca, cushicushpami “allillachu cangui” ningapac callpamurca.

¹⁶ Shina shamucpimi Jesusca: —¿Imatatac paicunahuanca rimarinacucunguichic?— nirca.

¹⁷ Chashna nicpi, chai gentecunapuramanta shuc runaca Jesustaca: —Yachachic, ñuca churitami cambacman pushamurcani. Paitaca supai japishpami, upayachishpa charicun.

¹⁸ Chai supaimi maipipish japishpa urmachinlla. Quiru canirishpa, shimiman puscuta shitashpami, mana cuyurishpa siricunlla. Cambac yachacuccunamanpish supaita llucchichun mañarcani. Paicunaca supaita mana llucchi pudircachu— nirca.

¹⁹ Shina nicpimi Jesusca: —¡Aij, mana cric gentecunalla! Cancunahuanca, ¿maicamantac yachachishpa causacushalla? ¿Maicamantac llaquita apacushalla? Huambrata caiman apamuichic— nirca.

²⁰ Ña apamucpica, supai Jesusta ricushpaca, huambrata chucchuchishpami urmachirca. Huambraca shimiman puscuta shitashpami singurca.

²¹ Jesús huambrapac taitata tapushpaca: —¿Ima horamantatac huambraca cashna causan?— nirca. Shina tapucpi taitaca: —Huahuamanta pachami cashna causan.

²² Tauca cutinmi supaica huañuchisha ninapipish, yacupipish urmachicunlla. Can allichi pudishpaca, ñucanchicta llaquishpa ayudaiyari— nirca.

²³ Shina nicpimi Jesusca: —¿Ima nishpatac “allichi pudishpaca” ningui? Tucui shunguhuan cricca, imatapish ruhuai pudinmi— nirca.

²⁴ Shina nicpimi, chai huambrapac taita caparishpaca: —Ari, crinimi. ¡Ashtahuan cringapac ayudai!— nirca.

²⁵ Achca gentecuna tandarimucta ricushpami, Jesusca chai supaitaca: —¡Mana uyacta, upata ruhuac supai, ñucami cai huambramanta llucshi nini! ¡Ama cutin paipi yaicunguichu!— nishpa, sinchita rimarca.

²⁶ Chashna rimacpimi, supaica caparishpa, huambrata chucchuchishpa llucshirca. Huambraca huañushca shinami pambapi saquirirca. Chaita gentecuna ricushpaca: —Ña huañun— ninacurca.

²⁷ Ashtahuanpish Jesús huambrata maquimanta jatarichicpica, chai alliyashpa shayarircallami.

²⁸ Jesús shuc huasiman yaicucpi, paipac yachacuccunaca: —¿Ima nishpatac ñucanchicca chai supaitaca mana llucchi pudircanchic?— nishpa, paillaman tapurca.

²⁹ Chashna tapucpimi Jesusca: —Chai shina supaicunataca ayunashpa, Diosta mañashpallami llucchishpa cachai pudinchic— nirca.

Jesús huañunamanta cutin huillashcamanta

³⁰ Chaimanta llucshishpaca, Galilea llactatami rirca. Jesusca chaita ricushcata pipish ama yachachunmi munarca.

³¹ Paipac yachacuccunata yachachishpaca: “Runa Tucungapac shamushca ñucataca runacunaman japichingami. Paicunami ñucataca huañuchinga. Chashna huañuchicpipish, quimsa punzhapica causarishallami” nircami.

³² Paicunaca chai rimashcacunataca mana entendircachu. Chashna mana entendishpapish, manchashpami mana tapurca.

“¿Maijanshi ashtahuan alli canchic?” ninacushcamanta

³³ Jesús Capernaúm puebloman chayashpa, shuc huasipi yaicushpaca paipac yachacuccunataca: —Cancunaca, ¿imatatac ñanpica rimanacushpa shamucurcanguichic?— nishpa tapurca.

³⁴ Paicunaca ñanta shamucushpaca: “¿Maijantac ashtahuan alli canchic?” nishpami rimanacushpa shamurca. Chaimantami upalla saquirircacuna.

³⁵ Jesús tiyarishpa, paipac chunga ishcai yachacuccunata cayashpaca: —Cancunapuramanta maijan ashtahuan alli nishca casha nishpaca, tucuimanta yalli yangalla tucushpami, tucuita servina canguichic— nirca.

³⁶ Shina nishpami, shuc huahuata paicunapac chaupipi churashpa, chai huahuata Jesús marcashpaca:

³⁷ —Maijanpish ñuca shutipi shuc huahuata shina chasquicca, ñucatami chasquin. Shina chasquishpaca, mana ñucatachu chasquin, ashtahuanpish ñucata cachac Taitatami chasquin— nirca.

“Ñucanchicta mana piñacca, ñucanchic-huanmi” nishcamanta

³⁸ Shina nicpimi Juanca: —Yachachic, cambac shutipimi shuc runaca supaicunata llucchishpa cachacucta ricurcanchic. Paica mana ñucanchicpura cacpimi, jarcarcanchic— nirca.

³⁹ Chashna nicpimi Jesusca: —Ama jarcanguichicchu, saquichiclla. Maijanpish ñuca shutipi milagrota ruhuashpaca, mana ñucataca piñangachu.

⁴⁰ Maijanpish ñucanchicta mana piñacca, ñucanchic-huan alli cashcatami ricuchin.

⁴¹ Cancunaca Quishpichic Cristo ñucata caticcunami canguichic. Chaimanta maijanpish cancunaman shuc vaso yacullatapish cucmanca, Diosca japina cashcata cungami. Chaica chashnatacmi— nirca.

Juchapi mana urmachina cashcamanta

⁴² Maijanpish cai uchilla shina ñucata criccunata pandachictaca, jatun cutana rumita cungapi huatashpa, jatun cuchapi shitanami ashtahuan alli canman.

⁴³ Chaimanta cambac maqui juchapi urmachisha nicpica, pitishpa shitangui. Ishcai maquindi mana huañuc ucu pacha ninaman rinapac randica, shuclla maquihuan jahua pachapi yaicunami canmanca ashtahuan alli.

⁴⁴ Ucu pachapica curucunapish mana huañunchu, ninapish huiñaita rupacunllami.

⁴⁵ Cambac chaqui juchaman apasha nicpica, pitishpa shitangui. Ishcai chaquindi ucu pachapi shitashca canapac randica, shuclla chaquihuan jahua pachapi yaicunami canmanca ashtahuan alli canga.

⁴⁶ Ucu pachapica curucunapish mana huañunchu, ninapish huiñaita rupacunllami.

⁴⁷ Cambac ñahui juchapi urmachisha nicpica, surcushpa shitangui. Ishcai ñahuindi ucu pachapi shitashca canapac randica, Dios mandacucpi shuclla ñahuihuan yaicunami canmanca ashtahuan alli canga.

⁴⁸ Ucu pachapica curucunapish mana huañunchu, ninapish huiñaita rupacunllami.

⁴⁹ Tucuimi ninahuan chuyayachishca canga.

⁵⁰ Cachica allimi. Ashtahuanpish gamuyashpaca, ¿ima shinatac cutinca alli canga? Cancunaca caishuc chaishuc-huan sumacta causashpa, cachi shina caichic— nirca.