MARCOS 8 - Dios Rimashcata Quillcashcami

Jesús chuscu huaranga yalli gentecunaman carashcamanta

¹ Chai punzhacunapica, achca gentecunami tandanacurca. Paicuna micunata mana charicpimi, Jesusca paipac yachacuccunata cayashpa:

² —Cai gentecunaca quimsa punzhatami ñucahuan caipi cancuna. Paicunaca ima micunallata mana charinchu, chaimanta llaquinayanmi.

³ Maijancunaca caru llactacunamanta shamushca. Paicunaman mana carashpa huasiman cachacpica, yarcaihuan ñanpi tigrangami— nirca.

⁴ Yachacuccunaca: —Cai shitashca pambapica, ¿maimantatac tucui gentecunamanca carashunyari?— nirca.

⁵ Shina nicpimi Jesusca: —¿Mashna tandatatac charinguichic?— nirca. Shina tapucpimi, paipac yachacuccunaca: —Canchis tandallatami charinchic— nirca.

⁶ Shina nicpimi, Jesusca chai tucui gentecunata pambapi tiyarichun mandarca. Chashna tiyachishpami, Jesusca chai canchis tandata japishpa, Diosta pagui nirca. Chai tandataca chaupishpa chaupishpami, tucuiman carachun yachacuccunaman curca. Paicunaca tucui gentecunamanmi cararca.

⁷ Shinallatac asha challuacunatapish charircami. Chai challuacunamantapish Diosta pagui nishpami, carachun mandarca.

⁸ Chai gentecunaca mana nictami micurca. Shinallatac puchuchishcataca canchis taza jundatami tandarca.

⁹ Micuccunaca chuscu huaranga shinami carca. Chai quipaca Jesusca paicunapac huasicunamanmi cacharca.

¹⁰ Chai quipaca Jesusca paipac yachacuccunahuanmi canoapi tiyarishpa, Dalmanuta llactaman rirca.

Fariseocuna milagrota ruhuachun nishcamanta

¹¹ Fariseocuna shamushpami, Jesusta pandachisha nishpa “jahua pacha Dios cachashca cashpaca, milagrota ruhuashpa ricuchi” nishpa, rimari callarirca.

¹² Chaimantami Jesusca shungupi llaquirishpa: —Cai causaccunaca, ¿ima nishpatac milagrota ruhuashpa ricuchichun ninyari? Paicunaca milagrota ricushun nishpapish, manatac ricungachu. Chaica chashnatacmi canga— nirca.

¹³ Jesusca fariseocunata chaillapi saquishpami, cutinllatac canoapi tiyarishpa chimba ladoman rirca.

Fariseocuna yachachishcaca levadura shina cashcamanta

¹⁴ Jesuspac yachacuccunaca tandata apanata cungarishpami rishca carca. Shuclla tandami canoapi tiyacushca carca.

¹⁵ Jesús paipac yachacuccunata mandashpaca: —Uyaichic, fariseocunapac, Herodespac levadurataca ama chasquinguichicchu— nircami.

¹⁶ Chashna nicpimi yachacuccunaca: —Tandata mana apamushcamantami, chashna nicunga— ninacurca.

¹⁷ Jesús chaita yachashpaca: —¿Ima nishpatac “tandataca manamari apamushcanchicchu” nishpa, rimanacunguichic? ¿Manaracchu entendinguichic? ¿Manaracchu alli yuyaita japinguichic? Cancunapac shunguca, ¿chairac sinchiracchu?

¹⁸ Ñahuita charishpapish, ¿manachu ricunguichic? Ringrita charishpapish, ¿manachu uyanguichic? ¿Manachu yuyaringuichic?

¹⁹ Pichca tandata pichca huaranga gentecunaman ñuca caracpica, chai puchuchishcataca, ¿mashna tazatatac tandarcanguichic?— nirca. Chashna nicpica: —Chunga ishcai tazata— nirca. Shina nicpimi Jesusca:

²⁰ —Shinallatac canchis tandata chuscu huaranga gentecunaman ñuca caracpica, puchuchishcataca, ¿mashna tazatatac tandarcanguichic?— nirca. Shina nicpica paicunaca: —Canchis tazata— nirca.

²¹ Chashna nicpimi Jesusca: —¿Chashna ruhuashca jahuachu manarac entendinguichic?— nirca.

Jesús Betsaida pueblopi ñahui mana ricuc runata alliyachishcamanta

²² Chai quipaca Betsaida pueblomanmi Jesusca paipac yachacuccunahuan chayarca. Chaiman shuc ñahui mana ricuc runata pushamushpami, Jesús maquihuan tuparishpa, alliyachichun mañarca.

²³ Chaimantami Jesusca chai ñahui mana ricuc runata maquimanta aisashpa, pueblomanta caruman pusharca. Chai runapac ishcai ñahuipi tucata churashpa, maquita paipac uma jahuapi churashpaca: —¿Ñachu imallatapish ricungui?— nirca.

²⁴ Chai ñahui mana ricuc runa ña ricui callarishpaca: —Gentecunaca sacha yuracunaman ricchami ricurin. Shina cashpapish puricunmi— nirca.

²⁵ Jesús cutin chai runapac ñahuipi maquita churacpica, tucuita alli ricurcallami.

²⁶ Jesús chai runata huasiman cachashpaca: —Cai puebloman ama yaicushpa, pimanpish ama huillashpa cambac huasiman rilla— nirca.

Jesusta Cristomi nishcamanta

²⁷ Chai quipaca Jesusca paipac yachacuccunahuanmi Filipo mandana Cesarea cuchulla llactacunata ricurca. Chashna ricushpami, paipac yachacuccunataca: —Gentecunaca, ¿pi cashcatatac ñucataca yuyancuna?— nishpa tapurca.

²⁸ Chashna tapucpimi paicunaca: —Maijancunaca Bautizac Juan cashcata, maijancunaca Dios ima nishcata huillac Elías cashcata, maijancunaca Dios ima nishcata huillaccunapuramanta maijan cashcatami yuyancuna— nirca.

²⁹ Shina nicpimi Jesusca: —Cutin cancunaca ñucataca, ¿pi cashcatatac yuyanguichic?— nirca. Shina tapucpimi Pedroca: —Canca, Dios cachashca Cristomi cangui— nirca.

³⁰ Shina nicpica Jesusca, pai pi cashcata pimanpish ama huillachunmi cutin cutin mandarca.

Jesús huañunamanta

³¹ Jesusca paipac yachacuccunataca: “Runa Tucungapac shamushca ñucaca, achca llaquita apanami cani. Curacunata mandac curacunapish, pushac yuyaccunapish, mandashcacunata yachachiccunapish ñucata piñashpa huañuchingami. Shina huañuchicpipish, quimsa punzhapica causarishallami” nishpami yachachirca.

³² Paipac yachacuccunaman chashna canatatac huillacpimi, Pedroca paillata cayashpa, ama chashna tucuchun nishpa rimarca.

³³ Ashtahuanpish Jesús paipac yachacuccunata ricushpa, Pedrota piñarishpaca: —¡Caimanta anchuri, Satanás! Canca Diospac munaitaca mana entendinguichu, ashtahuanpish gentecuna yuyashcallatami yuyangui— nirca.

³⁴ Jesusca paipac yachacuccunatapish, caishuc gentecunatapish cayashpaca: —Maijanpish ñucata catisha nishpaca, quiquin causaita mana llaquishpa, cruzpi huañuna shina llaquita apana cashpapish, ñucataca catichunlla.

³⁵ Maijanpish quiquin causaita llaquicca chingaringami. Maijanpish alli huillaita cazushcamanta quiquin causaita chingachicca quishpiringami.

³⁶ Shuc runa cai pachapi tucui imata charicyashpapish, huiñai causaita chingachishpaca, ¿ima allitac cangayari?

³⁷ Huiñai causaitaca, ¿imahuan randi pudingachu?

³⁸ Maijanpish cai pachapi Diosta mana cazuc, juchayuc gentecunapac ñaupapi ñucamanta, ñuca huillashcacunamanta huillanata pingacpica, Runa Tucungapac shamushca ñucapish ñuca Taitapac poderhuan, paipac sumac jucha illac angelcunahuan achicyachishpa cutimushpa pingashami— nirca.