MARCOS 7 - Dios Rimashcata Quillcashcami

Mana alli yuyaicuna juchayucta ruhuac cashcamanta

¹ Jerusalenmanta shamuc fariseocunapish, maijan mandashcacunata yachachiccunapish Jesuspacmanmi cuchuyarca.

² Paicunaca Jesuspac maijan yachacuccuna maquita mana jahuashpa micucucta ricurca.

³ (Fariseocunapish, tucui israelcunapish ñaupa taitacuna yachachishcata catishpami, maquita jahuashpalla micuc carca.

⁴ Plazamanta cutimushpapish, maquita mana jahuashpaca, mana micucchu carca. Shinallatac shuctac yachachishcacunatapish pactachiccunami carca. Chaimantami vasocunatapish, jarrocunatapish, platocunatapish jahuac, shinallatac camacunatapish tacshac carca).

⁵ Chaimantami fariseocunapish, mandashcacunata yachachiccunapish Jesusta tapushpaca: —¿Ima nishpatac cambac yachacuccunaca ñaupa taitacuna yachachishcata mana cazushpa, maquita mana jahuashpa micun?— nirca.

⁶ Shina nicpimi, Jesusca paicunataca: —¡Mishqui shimi, jayac shungucuna canguichic! Allimi, Dios ima nishcata huillac Isaías cancunamanta quillcashpaca: “Cai gentecunaca shimillahuanmi ñucataca alli nincuna. Ashtahuanpish shunguca ñucamanta carupimi.

⁷ Paicunaca yangallami ñucata alli nincuna. Runacuna yachachishcallatami yachachincuna” nishcami.

⁸ Cancunaca Dios mandashcacunata saquishpami, runacuna yachachishcallata caticunguichic— nirca.

⁹ Shinallatac Jesusca: —Dios mandashcacunataca saquishpami, ñaupa taitacuna yachachishcallata cazunguichic.

¹⁰ Moisés yachachishpaca: “Taita mamata cuyangui. Maijanpish taita mamata mana alli nicca, huañunami canga” nishcami.

¹¹ Ashtahuanpish cancunaca: “Taita mama imata mañacpica, ‘ñuca charishcacunaca Diosman cushca ofrendami. Chaimanta mana ayudai pudinichu’ ninallami” nishpami yachachinguichic.

¹² Chashna yachachishpami, taita mamata ayudachunca mana saquinguichic.

¹³ Chashnami Dios mandashcacunata saquishpa, runacuna yachachishcallata catinguichic. Shinallatac shuctac chai shinacunatami catinguichic— nirca.

¹⁴ Jesús tucui gentecunata cayashpaca: —Tucui mashna uyashpa, alli entendichic:

¹⁵ Imapish shimita yaicucca mana juchayucta ruhuanchu, ashtahuanpish shungumanta llucshic mana alli yuyaimi juchayuctaca ruhuan.

¹⁶ Ringrita chariccunaca, alli uyaichic— nirca.

¹⁷ Jesús gentecunamanta raquirishpa, huasiman yaicucpica, paipac yachacuccunaca chimbapurashpa parlashcamantami tapurca.

¹⁸ Chaimantami Jesusca paicunataca: —Cancunapish ñuca huillacushca imata nisha nishcataca, ¿manaracchu entendinguichic? Ima micunapish shimita yaicucca mana juchayucta ruhuac cashcataca, ¿manachu entendinguichic?

¹⁹ Micunaca shunguman mana yaicushpami, huicsallaman yaicun. Quipamanca llucshinllami— nirca. Chashna nishpaca, ima micunatapish micunallami nishpami yachachirca.

²⁰ Jesús cutin rimashpaca: «Shungu ucumanta llucshicmi juchayucta ruhuan.

²¹ Shungu ucumanta millai yuyaicuna llucshicpimi, huainayancuna, millaita ruhuancuna, huañuchincuna,

²² shuhuancuna, charicyanata munancuna, pitapish llaquichincuna, umancuna, mana pingancuna, envidiancuna, llullancuna, jatun tucuncuna, yuyai illac tucuncuna.

²³ Tucui cai yuyaicunami shungumanta llucshishpa, juchayuctaca ruhuan» nirca.

Sirofenicia huarmi crishcamanta

²⁴ Jesusca chaimanta rishpaca Tiro llacta, Sidón llactamanmi chayarca. Chaipi cashcata pipish ama yachachunmi, shuc huasiman yaicurca. Chashna cacpipish gentecunaca Jesús maipi cashcata yachac chayarcami.

²⁵ Shuc huarmimi Jesús chaipi cashcata yachashpa shamurca. Chai huarmica supai japishca shuc huarmi huambratami charirca.

²⁶ Chai huarmica mana israelcunapuramantachu carca. Ashtahuanpish Sirofenicia llacta huarmimi carca. Paimi, paipac huambramanta supaita llucchishpa cachachun mañarca.

²⁷ Shina nicpimi, Jesusca huarmitaca: —Huahuacunarac micuchun saqui. Huahuacunamanta micucucta quichushpa, allcunaman caranaca, mana allichu— nirca.

²⁸ Shina nicpimi, chai huarmica: —Apunchic Jesús, chashnami. Shina cacpipish allcunaca huahuacuna micucushpa urmachishcataca micunllami— nirca.

²⁹ Shina nicpimi Jesusca: —Canca allitami nishcangui. Cambac huahuamantaca, supaica ñami llucshirca. Cunanca huasiman rilla— nirca.

³⁰ Huarmi huasiman cutishpaca, huambra camapi siricuctami ricurca. Supaica huambramantaca ñami llucshishca carca.

Jesús ringri mana uyac, mana rimac runata alliyachishcamanta

³¹ Jesusca Tiro llactamanta llucshishpaca, Sidón llactata, Decápolis llactata rishpami, Galilea cuchaman chayarca.

³² Chaiman ringri mana uyac, mana rimac runata pushamushpami, Jesús chai runapac uma jahuapi maquita churashpa, alliyachichun mañarca.

³³ Shina mañacpimi, Jesusca chai runata gentecunamanta caruyachishpa, callupi tucata churashpa, ishcai ringripi dedota satirca.

³⁴ Chashna ruhuashpami, Jesusca jahua pachata ricushpa, shungupi llaquirishpa: —¡Efata!— nirca. Chaica: “Pascari” nisha ninmi.

³⁵ Chashna nicpica, chai runapac ringricunaca pascarircami. Callupish alli tucucpimi, ña rimarcalla.

³⁶ Ña alliyachishpaca, Jesusca piman ama huillachunmi cutin cutin rimashpa mandarca. Chashna nicpipish, ashtahuanmi pimanpish parlashpa purirca.

³⁷ Chashna parlacpica, tucui gentecunami mancharishpami: “Paica allita ruhuan. Ringri mana uyaccunatapish uyachin, mana rimaccunatapish rimachinmi” nircacuna.