MARCOS 6 - Dios Rimashcata Quillcashcami

Jesús Nazaret pueblopi cashcamanta

¹ Jesús chaimanta rishpaca, paipac llactamanmi paipac yachacuccunahuan cutimurca.

² Jesusca samana punzha chayamucpimi, israelcuna tandanacuna huasipi yachachi callarirca. Pai yachachishcata uyaccuna mancharishpa, caishuc chaishuc tapunacushpaca: —¿Maipitac cai runaca caita yachacurcayari? ¿Ima shinatac caita yachacurca? ¿Pitac milagrocunata ruhuanata yachachirca?

³ ¿Manachu Mariapac huahua carpintero? ¿Manachu Jacobopac, Josepac, Judaspac, Simonpac huauqui? ¿Manachu paipac panicunaca cai llactapi ñucanchic-huan causan?— nishpami, mana crircacuna.

⁴ Chaimantami Jesusca: —Dios ima nishcata huillactaca maipipish allimi chasquin. Ashtahuanpish quiquin llactapica, quiquin familiacamanmi mana uyashun nin— nirca.

⁵ Chaimantami chaipica, ima milagrocunatapish mana ruhuarca. Maijan ungushcacunallatami paicunapac jahuapi maquita churashpa alliyachirca.

⁶ Jesusca chai gentecuna mana crishcamantami yallita llaquirishpa, chai muyundi llactacunapi yachachishpa puricurca.

Jesús paipac yachacuccunata cachashcamanta

⁷ Jesusca paipac chunga ishcai yachacuccunata cayashpa, supaicunata llucchichun poderta cushpami, ishcai ishcaita cacharca.

⁸ Paicunata cachacushpaca: —Ñanpi micunatapish, cullquitapish ama apanguichicchu ashtahuanpish, taunallata apanguichic.

⁹ Ushutata churarishpapish, ama yanandi churanata apanguichicchu— nirca.

¹⁰ Shinallatac Jesusca paicunata: —Cancuna mai huasiman chayashpaca, shuc llactaman ringacaman chaillapi canguichic.

¹¹ Maijan llactapi cancunata mana chasquishpa, cancuna huillashcatapish mana uyashun nicpica, llucshishpa ringuichiclla. Chai llacta llaquita apana cashcata ricuchingapacca, cancunapac chaquipi catirishca allpatapish chaspishpa ringuichic— nirca.

¹² Yachacuccuna rishpaca, juchayuc cashcamanta llaquirishpa, Diosman cutirichunmi gentecunaman huillarca.

¹³ Achca supaicunatami gentecunamanta llucchishpa cacharca. Achca ungushcacunatami aceiteta umapi churashpa alliyachirca.

Bautizac Juan huañushcamanta

¹⁴ Tucui llactacunapimi Jesús imata ruhuashcaca yacharirca. Chaimantami mandac Herodesca: —Bautizac Juanmi huañushcacunapuramanta causarishca canga. Chaimantami paica milagrocunata ruhuacunga— nirca.

¹⁵ Cutin maijanca: —Dios ima nishcata huillac Eliasmi canga— nircami. Maijanca: —Dios ima nishcata ñaupa huillaccunapuramanta maijanmi canga— nircami.

¹⁶ Chaita Herodes uyashpaca: —Chai runaca Juanmi canga. Paitaca ñucami cungata pitishpa, huañuchichun mandarcani. Paimi huañushcacunapuramanta causarishca canga— nirca.

¹⁷ Herodesllatacmi Herodías huarmi nishcata uyashpa, Juantaca cadenahuan huatashpa carcelpi churachishca carca. Herodesca, paipac huauqui Felipepac huarmi Herodias-huanmi apanacushpa causacurca.

¹⁸ Juanca Herodestaca: «Huauquipac huarmihuan causanaca, mana allichu» nishcami carca.

¹⁹ Herodiasca Juantaca huañuchinatami munarca. Shina cashpapish mana huañuchi pudircachu.

²⁰ Herodesca Juantaca cashcata ruhuac, Diospaclla causactami yacharca. Chaimantami paita manchashpa, cuidashpa charirca. Imata ruhuanata yuyacushpapish, Juan huillacpica, cushillami uyac carca.

²¹ Herodías munashca punzhami chayarca. Chaica, Herodesmi pai huacharishca huata pactacpi, fiestata ruhuashpa, llactata mandaccunatapish, soldadocunata mandaccunatapish, Galilea llactata pushaccunatapish jatun micuiman cayarca.

²² Chai ucuman yaicushpami, Herodiaspac huahua solteraca bailarca. Chaitaca, Herodespish, chaipi caccunapish cushicushpami ricucurca. Chaimantami mandac Herodesca chai solterataca: —Can imata munashcata mañailla. Ñucaca cushallami.

²³ Ñucami: Can mañacpica, ñuca mandacushcamanta chaupi llactatapish cushami— nishpa, ari nini.

²⁴ Soltera chaimanta llucshishpaca mamataca: —¿Imatatac mañasha?— nishpa tapurca. Shina tapucpica mamaca: —Bautizac Juanpac umata mañaiyari— nirca.

²⁵ Chai soltera mandac Herodespacman utca rishpaca: —Cunanllatac Bautizac Juanpac umata shuc platopi cui— nirca.

²⁶ Mandac Herodesca yallitami llaquirirca. Shina cashpapish, chaipi caccunapac ñaupapi ari nishcamantami “mana cushachu” ninataca, mana pudirca.

²⁷ Chaimantami mandac Herodesca Juanpac umata pitishpa apamuchun, shuc soldadota cacharca.

²⁸ Chai soldadoca carcelman rishpami, Juanpac umata platopi apamushpa, chai solteraman curca. Paica paipac mamamanmi curca.

²⁹ Juanpac yachacuccuna chaita yachashpaca shamurcami. Chashnami Juanpac cuerpota enterrangapac aparca.

Jesús pichca huaranga yalli gentecunaman carashcamanta

³⁰ Jesús huillachun cachashcacuna cutimushpaca, yachachishcatapish, imata ruhuashcatapish Jesusman tucuimi parlarca.

³¹ Achca gentecuna rin, cutin puricucpimi, ima shina micunallatapish mana pudircacuna. Chaimantami Jesusca yachacuccunataca: —Shitashca pambaman shamushpa, samarichic— nirca.

³² Chaimantami paicunalla canoapi cuchata pasashpa, shitashca pambaman rircacuna.

³³ Paicuna ricuctaca achca gentecuna ricushpaca ricsircami. Chaimantami tucui pueblocunamanta chaquillahuan paicunata mishashpa, chaiman chayarcacuna.

³⁴ Canoamanta Jesús llucshishpaca, achca gentecunatami ricurca. Paicuna michic illac ovejacuna shina cashcamantami Jesusca llaquirishpa, paicunaman tucuita yachachi callarirca.

³⁵ Tutayamucpi, Jesuspac yachacuccuna paipacman cuchuyashpaca: —Ñami tutayamun. Caipica pipish mana causanchu.

³⁶ Cai gentecunaca micunatapish mana charinchu. Paicunataca chai muyundi uchilla llactacunapi randishpa micuchun cachaiyari— nirca.

³⁷ Shina nicpimi Jesusca: —Cancunallatac micunata caraichic— nirca. Shina nicpimi paicunaca: —¿Ishcai patsac denario cullquihuanchu tandata randimugrichun ningui?— nirca.

³⁸ Jesusca: —Cancunaca, ¿mashna tandatatac charinguichic? Ricungapac richic— nirca. Paicuna cutimushpaca: —Pichca tanda, ishcai challuallatami charinchic— nirca.

³⁹ Shina nicpimi Jesusca: —Chai gentecunata chai quihua pambapi asha asha raquishpa tiyachichic— nishpa mandarca.

⁴⁰ Chaimantami tucui chaipi caccunaca maipica patsac, maipica pichca chunga tiyarirca.

⁴¹ Chai quipami Jesusca pichca tandata, ishcai challuata japishpa, jahua pachata huichailla ricushpa, Diosta pagui nirca. Shinami pichca tandata, ishcai challuata chaupishpa chaupishpa, gentecunaman carachun paipac yachacuccunaman curca.

⁴² Chaitaca tucui gentecunami mana nicta micurca.

⁴³ Puchuchishcataca chunga ishcai taza jundatami tandatapish, challuatapish tandarca.

⁴⁴ Chai micuccunaca, caricunallami pichca huaranga carca.

Jesús yacu jahuata purishcamanta

⁴⁵ Chai quipaca, Jesusca paipac yachacuccunatami canoapi huichicuchishpa, cuchata pasashpa, Betsaida puebloman ñaupachun cacharca. Chaicamanca Jesusca gentecunatami cachacurca.

⁴⁶ Jesusca gentecunata cachashpaca urcumanmi Diosta mañangapac rirca.

⁴⁷ Ña tutayacuctaca paipac yachacuccunaca chaupi yacupimi canoapi carca. Jesusca paillami urcupi saquirirca.

⁴⁸ Yachacuccunaca huaira ñaupamanta jarcacpimi, canoata mana purichi pudicurca. Chaitami Jesusca ricurca. Ña punzhayacuctami Jesusca yacu jahuata rishpa, paicunapac ñaupata rigrirca.

⁴⁹ Yachacuccuna chaita ricushpaca “¡ayami canga!” yuyashpami caparirca.

⁵⁰ Chaica, tucui paipac yachacuccuna ricushpami, yallita mancharirca. Chaimantami Jesusca paicunata rimashpaca: —¡Ama mancharichicchu! Ñucami cani, sinchicuichic— nirca.

⁵¹ Jesús paicuna ricuc canoapi huichicucpica, huairaca pararcami. Chaimantami paipac yachacuccunaca yallita mancharirca.

⁵² Paicunaca rumi shungu cashcamantami tandata mirachishcatapish manarac entendircachu.

Jesús Genesaret llactapi ungushcacunata alliyachishcamanta

⁵³ Cuchata pasashpaca, Genesaret llactaman chayashpami, chai cucha patapi canoata huatarca.

⁵⁴ Canoamanta llucshincami, gentecunaca Jesusta ricsirca.

⁵⁵ Shina ricsishpami, chai muyundi llactacunapi huillagrirca. Shina huillacpimi, Jesús maipi cacta uyashpaca, ungushcacunata huandushpa apamurca.

⁵⁶ Mai puebloman, mai llactaman, mai huasicunaman Jesús chayacpica, ñancunapimi ungushcacunata churarca. Shina churashpaca churana puntallapipish tuparichun saquichunmi mañarca. Jesuspac churanapi tupariccunaca, tucuimi alliyarca.