MARCOS 5 - Dios Rimashcata Quillcashcami

Supai japishca runata alliyachishcamanta

¹ Paicunaca cuchata pasashpaca, Gerasa llactamanmi chayarca.

² Canoamanta Jesús llucshincami, supai japishca runaca panteonmanta llucshishpa, Jesus-huan tupac shamurca.

³ Paitaca pipish mana cadenacunahuan huatai pudircachu. Chaimantami panteonllapi causac carca.

⁴ Tauca cutinmi huatana fierrohuanpish, cadenahuanpish huatac carca. Shina cacpipish chaicunata polvoshpa, pitishpami ric carca. Paitaca pipish mana huatai pudircachu.

⁵ Tutapish, punzhapish urcucunapi, panteoncunapi sinchita caparishpa, paillatac rumihuan chugririshpami puric carca.

⁶ Jesusta carumanta ricushcahuanmi, callpashpa paipac ñaupapi cungurirca.

⁷ Cungurishpa, caparishpaca: —Jahua pacha Diospac Churi Jesús ¿imatatac nic shamunguiyari? ¡Diosmantami mañani, ñucata ama llaquichichu!— nirca.

⁸ Jesús: «¡Millai espíritu, cai runamanta llucshi!» nishcamantami chashna nirca.

⁹ Jesús paita tapushpaca: —¿Ima shutitac cangui?— nircami. Chaimantami chai runaca: —Achcacuna cashcamanta, huaranga huaranga shutimi cani— nirca.

¹⁰ Supaicunaca ama caruman cachachunmi mañarca.

¹¹ Chai urcu cuchullapimi, achca cuchicuna micucurca.

¹² Chaimantami supaicunaca: —Ñucanchictaca chai cuchicunapi yaicuchun cachaiyari— nishpa, mañarca.

¹³ Chaimantami Jesusca chaiman richun saquirca. Supaicuna chai runamanta llucshishpaca, cuchicunapimi yaicugrirca. Shina yaicucpimi, chai cuchicunaca jahuamanta cuchaman singushpa, yacupi aguarishpa huañurca. Chai cuchicunaca ishcai huaranga shinami carca.

¹⁴ Cuchicunata michiccunaca paicunapac pueblopi, llactacunapimi huillangapac callparca. Shina huillacpimi, ima tucushcata ricungapac tucui gentecuna shamurca.

¹⁵ Jesuspacman chayashpaca, achca huaranga supaicuna llaquichishca runa alli tucushpa, churanatapish alli churarishca, alli yuyaipi tiyacuctami ricurca. Chaita ricushpami, yallita mancharirca.

¹⁶ Chaita ricuccunaca supai japishca runa alli tucushcatapish, cuchicuna ima tucushcatapishmi paicunaman parlarca.

¹⁷ Chaimantami Jesustaca chai llactamanta richun mañarca.

¹⁸ Jesús canoapi tiyaricpimi, supaicunata llucchishca runaca paitapish pushashpa richun mañarca.

¹⁹ Jesusca mana pushashpa risha nircachu, ashtahuanpish: —Cambac huasiman rishpa, Dios llaquishpa, canta alliyachishcata cambac familiacunaman huillagri— nirca.

²⁰ Chai runa rishpaca, paita Jesús alliyachishcatami Decápolis pueblocunapi huillai callarirca. Shina huillacpica, tucui gentecunami cushicurca.

Jesús Jairopac ushita causachishcamantapish, shuc huarmita alliyachishcamantapish

²¹ Jesús cutinllatac canoapi yacuta pasashpa, cucha patapi cacpica, achca gentecunami paipacman tandanacurca.

²² Chaimanmi, israelcuna tandanacuna huasita mandac Jairo shamurca. Chai mandac Jesusta ricushpa,

²³ paipac ñaupapi cungurishpaca: —Ñuca ushimi huañugricun. Can rishpa, ñuca ushipac uma jahuapi maquita churacpica, mana huañungachu, alliyangami— nishpa mañarca.

²⁴ Chaimantami Jesusca chai runapac huasiman rirca. Shina ricucpica, achca gentecunami Jesus-huan pacta rircacuna.

²⁵ Chai riccunapurapica, chunga ishcai huatata yahuar cacharirishpa ungushca huarmimi ricurca.

²⁶ Chai huarmica tauca jambiccunapacman rishpami, llaquita apashpa puricurcalla. Jambiricushpallami pai charishcatapish tucui tucuchirca. Ima jambipish mana allichircachu, ashtahuanmi anchayashpa caticurca.

²⁷ Chaimantami Jesusmanta parlashcata uyashpa, gentecunapac chaupita rishpa, Jesuspac churanapi huashamanta tuparirca.

²⁸ Paipac shungupica: «Jesuspac churanapi tuparishpaca, jambirishallami» nishpami yuyacurca.

²⁹ Churanapi tuparicpica, chai ratomi yahuarca jarcarirca. Chaimantami huarmica ña alli tucushcata yacharca.

³⁰ Jesusca alliyachic poder paimanta llucshicpimi, huashaman tigrarishpaca: —¿Maijantac ñuca churanapi tuparin?— nishpa tapurca.

³¹ Chaimantami paipac yachacuccunaca: —¿Manachu cai tucui gentecuna ñitirinacushpa, shamucuctaca ricungui? ¿Chashna cashca jahuachu “¿pitac ñucapi tuparin?” nishpa tapungui?— nirca.

³² Jesusca pi tuparishcata yachangapacmi muyundita ricucurca.

³³ Chashna ricucucpimi, chai huarmica manchaihuan chucchushpa, Jesuspac ñaupapi cungurishpa, ima tucushcata tucuita huillarca.

³⁴ Chaimantami Jesusca: —Huahua, can crishcamantami alliyashcangui. Cunanca, cushicushpa rilla. Ungüimantaca jambirishcanguimi— nirca.

³⁵ Jesús shina nicucllapitacmi, mandac Jairopac huasimanta maijan runacuna shamushpa Jairotaca: —Yachachictaca, ¿imapactac yanga piñachicungui? Cambac ushica ñami huañun— nishpa huillarca.

³⁶ Shina nicpipish, Jesusca tandanacuna huasipi mandactaca: —Ama mancharichu. Ashtahuanpish cri— nirca.

³⁷ Jesusca caishuc gentecunata chaillapi saquishpa, Pedrota, Jacobota, Jacobopac huauqui Juanllata pushashpami,

³⁸ chai mandacpac huasiman rirca. Chaipimi caparishpa, huacanacucucta ricurca.

³⁹ Jesús ucuman yaicushpaca: —¿Ima nishpatac cancunaca caparishpa huacanacucunguichic? Huambraca mana huañushcachu, sueñucunllami— nirca.

⁴⁰ Jesús shina nicpica, burlashpa asircacunami. Chaimantami Jesusca chai ucumanta tucui gentecunata llucchishpa cachashpa, huambrapac taita mamata, quimsa yachacuccunata pushashpa, chai huambra siricuc ucuman yaicurca.

⁴¹ Huambrapac maquita japishpaca: —Talita, cumi— nirca. Chaica: “Huambra jatari, cantami nini” nisha ninmi.

⁴² Shina nicpica, huambraca jatarishpa, puri callarircami. Chaimantami gentecunaca yallita mancharirca. Chai huambraca chunga ishcai huatayucmi carca.

⁴³ Jesusca huambrata causachishcata ama piman huillachunmi cutin cutin mandarca. Shinallatac huambraman carachunpish mandarcami.