MARCOS 4 - Dios Rimashcata Quillcashcami

Jesús tarpuc runamanta chimbapurashpa parlashcamanta

¹ Cutinllatacmi Jesusca cucha patapi yachachi callarirca. Chaimanmi achca gentecuna tandanacurca. Chaimantami Jesusca yacupi cac canoapi yaicushpa tiyarirca. Gentecunaca yacu patapimi carca.

² Chaipimi chimbapurashca parlocunahuan achcata yachachirca. Pai yachachishpaca:

³ “¡Caita uyaichic! Shuc tarpuc runami tarpungapac llucshirca.

⁴ Pai tapucucpica, maijan muyuca ñanpimi urmarca. Chai muyutaca zhutacuna shamushpami mururca.

⁵ Maijan muyuca rumi allpapimi urmarca. Chai muyuca jahualla allpa cacpimi, utca huiñarca.

⁶ Chai yuraca mana ucuman sapiyuc cashpami, inti llucshishpa rupachicpica chaquircalla.

⁷ Maijan muyuca casha chaupipimi urmarca. Casha huiñashpa aguachicpica, mana pucurcachu.

⁸ Maijan muyuca alli allpapi urmashpami alli huiñashpa, shucmanta quimsa chungata, maijanca sucta chungata, maijanca patsac granota pucurca” nirca.

⁹ Shinallatac Jesusca: —Ringrita chariccunaca, alli uyaichic— nirca.

Imapac chimbapurashca parlohuan parlashcamanta

¹⁰ Jesús pailla saquiricpimi, paipac chunga ishcai yachacuccunapuramanta maijan chuchullapi tiyacuccunaca: —Chimbapurashca parloca, ¿imatatac nisha nin?— nishpa tapurca.

¹¹ Chaimantami Jesusca: —Diosca pai mandacucmantaca cancunamanca pacashcatami yachachishca. Ashtahuanpish caishuc gentecunamanca chimbapurashca parlocunallahuanmi yachachini.

¹² Paicuna ricushpapish, ama ricuchun, uyashpapish ama entendichunmi, chashnaca yachachicuni. Shinallatac Diosman ama cuti richun, paicunapac juchacunata ama perdonachunmi, chashna nini— nirca.

Jesús tarpuc runamanta parlashcata entendichishcamanta

¹³ Chaimantami Jesusca: —Cai chimbapurashca parlocunahuan parlashcataca, mana entendishpaca, ¿ima shinatac shuctac parlocunata yachachicpica, entendinguichicyari?

¹⁴ Tarpuc runa shinaca, alli huillaita huillacmi.

¹⁵ Ñanpi urmashca muyu shinaca, alli huillaita uyaccunami. Shina uyacpipish, Satanás shamushpami shungumanta anchuchircalla.

¹⁶ Rumi allpapi urmashca muyu shinaca, alli huillaimanta huillashcata cushilla chasquiccunami.

¹⁷ Shina cashpapish, mana sapiyuc shina cashcamantami, llaquicuna japicpi, mana cashpaca alli huillaita crishcamanta gentecuna piñacpica, crinata saquincunalla.

¹⁸ Casha chaupipi urmashca muyu shinaca, alli huillaimanta huillashcata alli uyaccunami.

¹⁹ Chashna uyashpapish, cai causaipaclla munaihuan, charicyana munaihuan, charishpapish ashtahuan charina munaihuanmi pandarincuna. Chai munaicunami alli huillaita uyashcataca aguachic shina cungachin. Chaimantami grano mana pucuc shina ricurincuna.

²⁰ Alli allpapi tarpushca muyu shinaca, alli huillaita shungupi chasquiccunami. Chaimantami shuc muyumanta quimsa chungata, maijancunaca sucta chungata, maijancunaca patsac granota pucuc shina tucuncuna— nirca.

Ima pacalla ruhuashcapish ricurina cashcamanta

²¹ Jesús ashtahuan parlashpaca: —Luzta japichishpaca, ¿pitac cajón ucupi, mana cashpaca cama ucupi churangayari? Ashtahuanpish pata jahuapi achicyachichun churan.

²² Chaica, ima pacashcapish mana pacalla saquiringachu, tucuimi ricuringa. Mana yachashcapish tucuimi yacharinga.

²³ Ringrita chariccunaca, alli uyaichic— nirca.

²⁴ Shinallatac Jesusca: —Caita uyashpa, allita entendichic. Shuccunaman ima shinami cunguichic, chashnallatacmi cancunamanpish Diosca cunga. Cancuna uyaccunamancarin ashtahuanmi cunga.

²⁵ Maijanpish chariccunamanca ashtahuanmi cunga, ashtahuanpish mana chariccunamantaca, ashalla charishcatapish quichungami— nirca.

Huiñacuc muyuhuan chimbapurashcamanta

²⁶ Chashnallatac Jesusca: —Dios mandacucca, shuc runa allpapi muyuta tarpuc shinami.

²⁷ Chai runaca tutaca sueñunmi, punzhaca jatarinmi. Tarpushca muyuca pai mana yachacpimi, huiñashpa catin.

²⁸ Allpaca, paillami granota ricuchin. Chaica, puntaca pangacunarac ricurin. Quipaca espiga ricurin, cutin espigapica grano ricurin.

²⁹ Ña pucushpa, cosechana punzha chayamucpica, hoces-huanmi pitingapac rin— nirca.

Mostaza muyuhuan chimbapurashcamanta

³⁰ Cutinllatac Jesusca: —Dios mandacuctaca, ¿ima shina cashcatatac nisha? ¿Ima parlohuantac chimbapurasha?

³¹ Dios mandacucca, tarpushca mostaza muyuta shinami. Chai muyuca tucui muyucunamanta ashtahuan ñutumi,

³² ashtahuanpish ña tarpushca huiñashpaca, tucui huertapi tiyac yuracunamanta yallimi tucun. Chai ramacunapimi volac animalcuna shamushpa, llandurincuna— nirca.

Jesús yuyaita japina parlocunallahuan parlashcamanta

³³ Jesusca chimbapurashca parlocunahuanmi quishpirinamanta yachachirca. Chashna yachachicushpaca, gentecuna entendinallatami parlacurca.

³⁴ Paicunamanca chimbapurashca parlocunallahuanmi imatapish yachachirca. Paipac yachacuccunallahuan cashpaca, ima nisha nishcatapish tucuimi entendichirca.

Jesús huairata parachishcamanta

³⁵ Chai punzha, ña tutayacucpimi Jesuaca: —Cai cucha yacuta pasashun— nirca.

³⁶ Gentecunata cachashca quipami Jesusta canoapi tiyachishpa pusharca. Maijancunaca shuctac canoapimi Jesusta catishpa rirca.

³⁷ Chashna ricucpimi, huaira sinchita jatarishpa, yacuta caiman chaiman cuyuchi callarirca. Chaimantami canoapi yacu jundai callarirca.

³⁸ Jesusca canoa huasha ladopimi saunarishpa sueñucurca. Chaimantami paipac yachacuccunaca: —Yachachic, ¡ñucanchicca ñami ucuyagrinchicca! ¿Manachu llaquingui?— nishpa ricchachirca.

³⁹ Jesús jatarishpa, huairatapish cuchatapish rimashpaca: —¡Casilla cai!— nishpami, nircami. Shina nicpimi, huairapish, cuchapish casilla tucurca.

⁴⁰ Jesusca, paipac yachacuccunataca: —¿Ima nishpatac yalli mancharinguichic? ¿Manaracchu ñucataca alli cringuichic?— nirca.

⁴¹ Shina nicpimi, mancharishpa, paicunapura parlanacushpaca: —¿Pitac caica? Paitaca huairapish, yacupish cazunmi— ninacurca.