MARCOS 3 - Dios Rimashcata Quillcashcami

Jesús maqui chaquishca runata alliyachishcamanta

¹ Jesusca cutinllatacmi israelcuna tandanacuna huasiman yaicurca. Chaipimi shuc maqui chaquishca runa tiyacurca.

² Fariseocunaca Jesusta juchanchingaraicumi chai runata samana punzhapi allichicta ricuracurcacuna.

³ Jesusca chai maqui chaquishca runataca: —Jatari, caipi caccunapac chaupipi shayari— nirca.

⁴ Jesús chaipi caccunata tapushpaca: —¿Samana punzhapica allita ruhuanachu alli canga, mana cashpaca mana allita ruhuanachu alli canga? ¿Huañuimanta quishpichinachu alli canga, mana cashpaca huañuchinachu alli canga?— nirca. Ashtahuanpish paicunaca upallami carcacuna.

⁵ Chaimantami muyundipi caccunata ricushpa piñarirca. Jesusca paicuna sinchi shungu cashcamantami yallita llaquirishpa, chai maqui chaquishca runataca: —Maquita chutai— nirca. Chai runa maquita chutacpica, maquica alli tucurcallami.

⁶ Fariseocunaca chai ucumanta llucshishpaca, mandac Herodespac runacunahuanmi Jesusta ima shina huañuchinata yuyarinacurca.

Jesús achca gentecunahuan cucha patapi cashcamanta

⁷ Jesús paipac yachacuccunahuan cucha pataman ricpimi, Galilea llacta achca gentecuna paitaca catishpa rircacuna.

⁸ Shinallatac Judea llactamantapish, Jerusalén pueblomantapish, Idumea llactamantapish, Jordán yacu chimba lado llactacunamantapish, Tiro, Sidón pueblocunamantapishmi achca gentecuna shamurca. Chai gentecunaca Jesús allicunatami ruhuacucta uyashpami shamurca.

⁹ Chashna achca gentecuna shamushpa, ama ñitimuchunmi, Jesusca paipac yachacuccunataca canoata apamushpa charicuchun mandarca.

¹⁰ Jesusca achca ungushcacunatami alliyachirca. Chaimantami ungushpa llaquilla causaccuna Jesuspi tuparingapac ñitirimurca.

¹¹ Millai supaicuna Jesusta ricushpa, paipac ñaupapi cungurishpaca: —¡Canca Diospac Churimi cangui!— nishpa caparircacuna.

¹² Chaimantami Jesusca pai pi cashcata ama huillachun mandarca.

Jesús chunga ishcai apostolcunata acllashcamanta

¹³ Jesusca, pai acllasha nishca runacunallata cayashpami urcuman rirca. Chashna cayacpica shamurcacunami.

¹⁴ Chunga ishcai runacunatami paihuan purichun, alli huillaita huillachun cachangapac acllarca.

¹⁵ Paicunamanca supaicunata llucchichun, ungushcacunata alliyachichunmi poderta curca.

¹⁶ Paicunaca: Simón, (Paitami Pedrota shutichirca).

¹⁷ Zebedeopac churicuna Jacobopish, Juanpishmi carca. Paicunataca “Boanergesta” shutichirca. Chaica: “Rayo shina sinchi” nisha ninmi.

¹⁸ Andrespish, Felipepish, Bartolomepish, Mateopish, Tomaspish, Alfeopac churi Jacobopish, Tadeopish, Celote nishca Simonpish,

¹⁹ Judas Iscariotepishmi carca. Paimi quipamanca Jesustaca japichirca.

Jesusta “diablohuanmi cangui” nishcamanta

²⁰ Chaimantaca huasimanmi cutimurca. Cutinllatac huasipi achca gentecuna jundaricpimi, micunallatapish mana pudircacuna.

²¹ Jesús chaipi cacpimi, paipac familiacunaca: «Yuyai illacmi tucushca» nishpa, pushangapac shamurca.

²² Jerusalén pueblomanta mandashcacunata yachachiccuna shamushpaca: «Cai runaca supaicunata mandac Beelzebuhuan cashpami, supaicunataca llucchishpa cachan» nircami.

²³ Jesús paicunata cayashpa, yuyaita japina parlohuan parlashpaca: —¡Maitatac Satanasca, Satanasllatatac llucchishpa cachangayari!

²⁴ Llactata mandaccunapura macanacucpica, chai llactaca chingaringami.

²⁵ Huasipi causaccuna paicunapura macanacucpica, chai huasica tucuringami.

²⁶ Satanaspura caita chaita mandacpica, paicuna mandanaca tucuringami.

²⁷ Shuc sinchi runapac huasiman shuhuangapac yaicugricushpaca huasiyuctami huatanman. Paita huatashpallami, imatapish shuhuai pudinman.

²⁸ Caica pactangatacmi: Diosca ima juchatapish, ima rimashcatapish perdonangami,

²⁹ ashtahuanpish jucha illac Espirituta piñashpa rimactaca manatac perdonangachu. Paica huiñaitami juchayuc canga— nirca.

³⁰ Paicuna: «Supai japishca runami cangui» nishcamantami, Jesusca chashna nirca.

Jesuspac mamamantapish, huauquicunamantapish

³¹ Chaicamanca Jesuspac mamapish, huauquicunapish shamushpami, canzhallamanta cayac cacharca.

³² Jesuspac muyundipi tiyacuccunaca Jesustaca: —Cambac mama, huauquicunami canzhapi canta mashcacun— nirca.

³³ Chashna nicpimi Jesusca: —¿Pitac ñuca mama, ñuca huauquicunaca canga?— nirca.

³⁴ Muyundipi tiyaccunata ricuchishpaca: —Caicunami ñuca mama, ñuca huauquicunaca.

³⁵ Maijanpish Dios munashcata ruhuacmi ñuca huauqui, ñuca pani, ñuca mamaca— nirca.