MARCOS 16 - Dios Rimashcata Quillcashcami

Jesús causarishcamanta

¹ Samana punzha tucuricpimi, Magdala pueblomanta Mariapish, Jacobopac mama Mariapish, Salomepish mishquilla ashnacucta Jesuspac cuerpopi churangapac randirca.

² Chaita apashpami, semana callari punzha, cunan inti llucshimucucta Jesusta enterrashcata ricungapac rirca.

³ Paicuna ricushpaca: —Enterrashca jutcuta tapashca rumitaca, ¿pitac anchuchingayari?— ninacushpami ricurca.

⁴ Paicuna chayashpaca, rumica ña anchuchishcami cashca carca. Chai rumica jatun rumimi carca.

⁵ Chai ucuman yaicushpaca, alli ladoman shuc moso suni yurac churanata churashca tiyacuctami ricurca. Paita ricushpaca, yallitami mancharirca.

⁶ Ashtahuanpish chai mosoca: —Ama mancharichicchu. Cancunaca Nazaret pueblomanta cruzpi chacatashca Jesustami mashcacunguichic. Paica ña causarircami, mana caipichu. Maipi paita churashcapi ricuichic.

⁷ Cunanca Pedromanpish, caishuc yachacuccunamanpish: “Jesusca Galilea llactamanmi cancunapac ñaupata rin. Chaipimi pai nishca shina, ricunguichic” nishpa, utca huillagrichic— nirca.

⁸ Chai huarmicunaca manchaihuan chucchushpami, jutcumanta utca llucshirca. Chaimantami pimanpish imata mana huillashpa upalla rircacana.

Magdala pueblomanta Mariaman Jesús ricurishcamanta

⁹ [Jesús semana callari punzha, tutamanta causarishpaca, Magdala pueblomanta Mariamanmi punta ricurirca. Chai Mariamantami Jesusca canchis supaicunata llucchishca carca.

¹⁰ Paimi Jesuspac yachacuccunapacman rishpa huillarca. Paicunaca llaquillami huacacushca carca.

¹¹ Paicunaca Jesús causarishcatapish, María ricushcatapish mana crircacunachu.

Jesús ishcai yachacuccunaman ricurishcamanta

¹² Chai quipaca, Jesusca paipac ishcai yachacuccunamanmi shuctaclaya ricurirca. Paicunaca pueblomanta llucshishpami ricurca.

¹³ Paicunaca caishuc yachacuccunamanmi huillagrirca. Paicunapish mana crircachu.

Jesús huillagrichun mandashcamanta

¹⁴ Chai quipaca, Jesusca paipac chunga shuc yachacuccuna micucucpimi ricurirca. Causarishcata mana crishcamanta, rumi shungu cashcamanta, causarishcata ricushcata mana crishcamantami rimarca.

¹⁵ Shinallatac paicunataca: —Tucui pachata rishpa, alli huillaita tucui gentecunaman huillagrichic.

¹⁶ Maijanpish crishpa, bautizaricca quishpiringami. Ashtahuanpish mana cricca, juchanchishcami canga.

¹⁷ Ñucata criccunaca milagrocunatami ruhuanga: Ñuca shutipimi supaicunata llucchishpa cachanga, mushuc rimaicunatami rimanga.

¹⁸ Culebracunata maquihuan japirishpapish, ima venenocunata ubiashpapish, mana ima tucungachu. Shinallatac ungushcacunapac uma jahuapi maquita churacpica, alliyangallami— nirca.

Jahua pachaman Jesús rishcamanta

¹⁹ Apunchic Jesús paipac yachacuccunata mandashca quipaca, Diosmi jahua pachaman pusharca. Chaipimi paipac alli lado maquiman tiyarirca.

²⁰ Yachacuccuna rishpaca, tucui gentecunamanmi huillarca. Chashna huillacucpica, Apunchic Jesusmi paicunataca ayudac carca. Milagrocunata ruhuachishpami, Jesusca paicunahuan cashcataca ricuchicurca.]