MARCOS 15 - Dios Rimashcata Quillcashcami

Pilatopacman Jesusta apashcamanta

¹ Tutamanta ña pacarimucucpimi, Israel curacunata mandac curacunaca pushac yuyaccunahuanpish, mandashcacunata yachachiccunahuanpish, caishuc mandaccunahuanpish parlangapac tandanacurca. Chai quipami, mandac Pilatopac ñaupaman Jesustaca huatashpa aparcacuna.

² Chaipimi Pilatoca: —¿Canchu israelcunata Jatun Mandac cangui?— nirca. Shina tapucpimi Jesusca: —Ari, canllatac nishcanguimi— nirca.

³ Curacunata mandac curacunaca caita chaita nishpami juchanchirca.

⁴ Pilato cutin tapushpaca: —Canta yallita juchanchicucpipish, ¿manachu imata ningui?— nirca.

⁵ Ashtahuanpish, Jesusca upallami carca. Chaimantami Pilatoca mancharirca.

Jesús huañunamanta cutin huillashcamanta

⁶ Pascua fiesta punzhapi gentecuna shuc prezuta cacharichun nicpica, Pilatoca cacharicllami carca.

⁷ Chai punzhapica Barrabasmi prezu carca. Paica caishuc runacunahuan tandanacushpami, jatun mandac-huan piñanacushca carca. Chaipi huañuchishcamantami carcelpi tiyacurca.

⁸ Gentecunaca utcaman ruhuashca shinallatac shuc prezuta cacharichunmi Pilatoman mañangapac chayarca.

⁹ Chashna mañacpimi Pilatoca: —¿Israelcunata Jatun Mandactachu cacharichun ninguichic?— nirca.

¹⁰ Pilatoca curacunata mandac curacuna envidiamanta Jesusta apamushcata yachashpami, chashnaca nirca.

¹¹ Ashtahuanpish chai mandac curacunaca Jesusta cacharinapac randica, Barrabasta cacharichun mañachunmi chaipi caccunamanca yuyaita curca.

¹² Pilato caccunata cutin tapushpaca: —Israelcunata Jatun Mandac nishca runataca, ¿imatatac ruhuachun ninguichic?— nirca.

¹³ Chashna tapucpica: —¡Paitaca chacatailla!— nishpami caparircacuna.

¹⁴ Chaimantami Pilatoca: —Cai runaca, ¿ima mana allitatac ruhuashcayari?— nirca. Chashna nicpicarin: —¡Cai runataca chacatailla!— nishpami, ashtahuan caparircacuna.

¹⁵ Pilatoca gentecunahuan alli saquiringaraicumi Barrabasta cacharichirca. Jesustaca azotichishpami, chacatachun soldadocunaman curca.

¹⁶ Chaimantaca Pilato mandana jatun huasi pungu pambaman Jesusta apashpa, soldadocunata tandachirca.

¹⁷ Chaipimi soldadocunaca morado churanata Jesusman pachallichishpa, casha anguta ahuashca coronata churachirca.

¹⁸ Chashna churachishpa burlashpaca: —¡Israelcunata Jatun Mandac, canca allimari cangui!— nircami.

¹⁹ Chashna nishpami, Jesusta caspihuan umapi huactashpa, tucashpa cunguric tucushpa, mañac tucurca.

²⁰ Chashna burlashca quipami, morado churanata llucchichishpa, paipac churanallatatac cutin churachishpa, chacatangapac aparcacuna.

Jesusta cruzpi chacatashcamanta

²¹ Alejandropac, Rufopac taita, Cirene llacta Simonmi chagramanta shamurca. Paimanmi Jesuspac cruzta apachirca.

²² Jesustaca Gólgota urcumanmi pusharcacuna. (“Gólgota” nishpaca, “Uma Tullu” nisha ninmi).

²³ Chai urcupimi Jesusmanca, mirrahuan chapushca vinota ubiachishun nirca. Paica mana ubiasha nircachu.

²⁴ Jesusta cruzpi chacatashpaca, paipac churanacunata maijanlla japingapacmi suerteta ruhuarca.

²⁵ Iscun horastami Jesusta chacatarca.

²⁶ Imamanta chacatashcataca caspipimi: “Caica Israelcunata Jatun Mandacmi” nishpa quillcarca.

²⁷ Jesus-huanca ishcai shuhuac runacunatapish, shuctaca alli maquiman, shuctaca lluqui maquimanmi chacatarca.

²⁸ Chashna chacatacpimi, Dios quillcachishcapi: «Juchayuccunahuanmi tandachishca canga» nishcaca pactarca.

²⁹ Chaita pasaccunaca umata cuyuchishpa, camishpaca: —¡Jai, canca “Diosta mañana huasita urmachishpaca, quimsa punzhapi cutin shayachishallami” nircanguica!

³⁰ ¡Cunanca, chacatashcamanta uricushpa, canllatac quishpiriyari!— nircacuna.

³¹ Shinallatac curacunata mandac curacuna mandashcacunata yachachiccunahuan burlashpaca: —Paica shuccunataca quishpichircami. Cunanca paillatacca mana quishpiri pudinchu.

³² ¡Israelcunata Jatun Mandac Cristo cashpaca, cunanllatac chacatashcamanta uricui, chaita ricushpaca, ñucanchicpish crinchicmanmi!— nircacuna. Jesus-huan pacta chacatashca runacunapish, camishpa rimarcami.

Jesús huañushcamanta

³³ Chaupi punzhamanta quimsa horas chishicamanmi, tucui cai pachaca amsayarca.

³⁴ Chai horasllatacmi Jesusca: —Eloí, Eloí, ¿lama sabactani?— nishpa, sinchita caparirca. (Caica: “Ñuca Dios, ñuca Dios, ¿ima nishpatac ñucallata saquinguiyari?” nisha ninmi).

³⁵ Chaipi caccunapuramanta maijanca: —Uyaichic, huillac Eliastami cayacun— nirca.

³⁶ Cutin shuc runaca esponjata apangapacmi callparca. Chaitaca jayac vinopi satishpami, caspi puntapi churashpa, Jesusman ubiachisha nishpa, shimiman chayachirca. Shina ruhuashpaca: —Saquichic, Eliasca cruzmanta uricuchingapac shamucta ricungapac— nirca.

³⁷ Jesusca sinchita caparishcahuan huañurcallami.

³⁸ Jesús huañucpica, Diosta mañana huasi ucupi jarcachishca jatun lienzoca jahuamanta uraimanmi chaupita lliquirirca.

³⁹ Jesusta cruzpi chacatashca ladopica, patsac soldadocunata mandacmi shayacurca. Chai mandac, Jesús ima shina caparishpa huañucta ricushpaca: —Cai runaca Diospac Churitacmi cashca— nirca.

⁴⁰ Shinallatac tauca huarmicunapish carullamanta ricushpami shayacurca. Chai huarmicunapurapica, Magdala pueblomanta Mariapish, quipa Jacobopac, Josepac mama Mariapish, Salomepishmi carca.

⁴¹ Paicunami Galilea llactapi Jesús puricucpica, ayudashpa paita catishpa puriccuna carca. Jerusalén puebloman paihuan shamuc huarmicunapish chaipimi carca.

Jesusta enterrashcamanta

⁴² Cayandi samana punzhapac allichirina punzhaca, ñami chishiyarca.

⁴³ Chai chishimi Arimatea pueblomanta Joseca mana manchashpa, mandac Pilatopacman rishpa, Jesuspac cuerpota enterrangapac mañarca. Paica tandanacushca mandaccunapurapica, mai alli nishca runami carca. Paipish Dios mandacucta ricusha nishpami shuyacurca.

⁴⁴ Pilatoca Jesús huañushcata uyashpami, mancharirca. Chaimantami patsac soldadocunata mandacta cayashpa tapurca.

⁴⁵ Patsac soldadocunata mandac huillacpimi, Pilatoca Jesuspac cuerpota enterrachun Joseman curca.

⁴⁶ Chaimantami Joseca shuc jatun lienzo pañota randishpa, Jesuspac cuerpota uricuchishpa, chai lienzohuan pillushpa, rumi quingrai jutcushcapi churarca. Chaimantaca shuc jatun rumita singuchishpami, chai jutcu pungutaca jarcarca.

⁴⁷ Jesusta maipi churactaca, Magdala pueblomanta Mariapish, Josepac mama Mariapishmi ricucurca.