MARCOS 14 - Dios Rimashcata Quillcashcami

Jesusta huañuchingapac yuyarinacushcamanta

¹ Levadura illac tandata micuna, Pascua punzhapac ishcai punzha siricpimi, curacunata mandac curacunapish, mandashcacunata yachachiccunapish Jesusta ima shina pacalla japishpa huañuchinata yuyaricurca.

² Chashna yuyaricushpapish, maijanca: «Cai fiesta punzhapica mana imata ruhuanachu canchic. Gentecuna jatarishpa, ñucanchictarac llaquichingami» nirca.

Jesuspac umapi mishquilla ashnacucta churashcamanta

³ Jesusca Betania pueblopi lepra ungüihuan nishca Simonpac huasipi micushpa tiyacucpimi, shuc huarmica achca valic nardo mishquilla ashnacucta, alabastro rumi botellapi apashpa shamurca. Chai botella pascashpami, mishquilla ashnacuctaca Jesuspac umapi churarca.

⁴ Chaimantami maijanca shungupi piñarishpa: —¿Ima nishpatac chai mishquilla ashnacuctaca yanga tallinyari?

⁵ Chaitaca quimsa patsac yalli denario cullquipi catushpa, huacchacunaman cushpachari, alli canman carca— nishpami, huarmitaca rimaricurca.

⁶ Chaimantami Jesusca: —¿Ima nishpatac cai huarmitaca llaquichicunguichic? Saquichic, paica ñucamanca allitami ruhuashca.

⁷ Huacchacunaca punzhantami cancunahuan canga. Paicunaman allita ruhuasha nishpaca ruhuanguichicllami, ashtahuanpish ñucaca cancunahuanca mana causacushallachu.

⁸ Cai huarmica pai ruhuai pudishcatami ruhuashca. Ñuca cuerpo sumacta enterrashca cachunmi, utca ruhuashca.

⁹ Tucui cai pachapi maipipish alli huillaita huillacushpaca, cai huarmi ruhuashcatapish huillangami. Chashnami paita yuyaringa. Chaica chashnatacmi canga— nirca.

Jesusta Judas Iscariote japichisha nishcamanta

¹⁰ Chunga ishcai yachacuccunapuramanta Judas Iscariotemi Jesusta japichingapac curacunata mandac curacunahuan parlangapac rirca.

¹¹ Paicuna chaita uyashpaca, cushicushpami cullquita cushun nircacuna. Chaimanta pachami, Judasca Jesusta ima shina japichinata munacurca.

Pascua micuimanta

¹² Levadura illac tandata micuna fiesta callari punzhaca, Pascuata yuyarishpa, pactalla ovejata huañuchina punzhami carca. Chai punzhami yachacuccunaca Jesustaca: —Pascua micuita micungapacca, ¿maipitac allichigrichun ningui?— nirca.

¹³ Chashna nicpimi, paipac ishcai yachacuccunata cachashpaca: —Jerusalén puebloman richic. Chaipica, yacu puñu aparishca shuc runahuanmi tupanguichic. Paita catishpa richic.

¹⁴ Chai runa mai huasiman yaicucpica, chai huasiyuc runataca: “Yachachicca: ‘¿Maijan ucupitac ñuca yachacuccunahuan Pascua micuita micusha?’ ninmi” ninguichic.

¹⁵ Chashna nicpica, paica, allichishca shuc jatun ucutami altopi ricuchinga. Chaipi ñucanchic micungapac allichinguichic— nirca.

¹⁶ Yachacuccuna rishpa, puebloman chayashpaca, Jesús nishca shinallatacmi tarirca. Chai huasipimi, Pascua micuita allichirca.

¹⁷ Tutayacuctami Jesusca paipac chunga ishcai yachacuccunahuan chai huasiman chayarca.

¹⁸ Jesús mizapi tiyarishpa micucushpaca: —Cancunapuramanta ñucahuan micucucmi, ñucata huañuchiccunaman japichinga. Chaica chashnatacmi canga— nirca.

¹⁹ Chashna nicpimi, yachacuccuna yallita llaquirishpa, caishuc chaishuc Jesusta tapushpaca: —¿Ñucachu cani?— nircacuna.

²⁰ Chashna tapucpimi Jesusca: —Chunga ishcaipuramanta ñucahuan cai platopi tandata jucuchishpa micucucmi, ñucataca japichinga.

²¹ Runa Tucungapac shamushca ñucataca, Dios quillcachishcapi nishca shinallatacmi huañuchinga. Shina cacpipish, ñucata japichic runaca, ¡aij, imachari tucunga! Chai runaca mana huacharishca cashpachari, alli canman carca— nirca.

²² Yachacuccuna micucucpi, Jesús tandata japishpa, Diosta pagui nishpa, chaupishpa, paicunaman cushpaca: —Japichic, caica ñuca aichami— nirca.

²³ Vino vasota japishpa, Diosta pagui nishpa cucpica, tucuimi chai vasomanta ubiarca.

²⁴ Chai quipaca Jesusca: —Caica, Dios-huan mushuc ari ninacuita ruhuashca ñuca yahuarmi. Caimi achcacunata quishpichingapac jichana yahuar.

²⁵ Dios mandacucpi mushuc vinota ubiangacaman, cai uvas vinotaca cutinca manatac ubiashachu. Chaica chashnatacmi canga— nirca.

Pedro neganamanta Jesús huillashcamanta

²⁶ Himnota cantashca quipami, paicunaca Olivos urcuman rirca.

²⁷ Chaipimi Jesusca yachacuccunataca: —Cunan tutallatacmi cancunaca ñucata saquishpa, caita chaita ringuichic. Chaica, Dios quillcachishcapica: “Michicta huañuchishami. Ovejacunaca caita chaitami shic-huaringa” ninmi.

²⁸ Shina cacpipish, ñuca causarishpaca, cancunapac ñaupatami Galilea llactaman risha— nirca.

²⁹ Chaimantami Pedroca Jesustaca: —Caishuccuna canta saquishpa ricpipish, ñucaca manatac saquishachu— nirca.

³⁰ Shina nicpimi Jesusca: —Cunan tutallatacmi gallo manarac ishcai cutin cantacpi, ñucataca quimsa cutin negangui. Chaica chashnatacmi canga— nirca.

³¹ Chashna nicpipish Pedroca: —Canhuan pacta huañuna cacpipish, manatac negashachu— nirca. Caishuc yachacuccunapish chashnallatacmi nirca.

Getsemaní huertapi Jesús Diosta mañashcamanta

³² Getsemaní huertamanmi, Jesusca paipac yachacuccunahuan rirca. Chaiman chayashpaca: —Ñuca Diosta mañangacaman, cancunaca caillapi tiyacuichic— nishpami,

³³ Pedrota, Jacobota, Juanta pushashpa rirca. Shina rishpami, Jesusca shungupi yallita llaquiri callarirca.

³⁴ Chaimantami: —Ñuca shungupica huañuna nanaihuan shinami, yallita llaquiricuni. Cancunaca ama sueñushpa, caillapi chaparacunguichic— nirca.

³⁵ Jesús ashata ñaupaman rishpa, pambacaman cumurishpa, Diosta mañashpaca: «Cai llaquita ñuca mana apaipac cacpica, cunan anchuchi.

³⁶ Ñuca Taitalla, canca imatapish ruhuai pudicmi cangui. Cai jayac ubiana shina llaquita ñucamanta anchuchi. Shina cacpipish, ama ñuca munashcata ruhuaichu, ashtahuanpish can munashcata ruhuai» nirca.

³⁷ Jesús mañashpa cutimushpaca, paicuna sueñucucpimi tuparirca. Chaimantami Pedrotaca: —Simón, ¿sueñucunguillachu? ¿Manachu shuc horasllatapish riccharishca cai pudircangui?

³⁸ Mana pandachishca cangapacca, Diosta mañashpa chaparacuichic. Cancunapac yuyaica sinchimi, ashtahuanpish cancunapac cuerpomi shaicushca— nirca.

³⁹ Jesusca cutin rishpaca, puntaman mañashca shinallatacmi mañarca.

⁴⁰ Cutimushpaca, paipac yachacuccunataca cutin sueñucucpimi tuparirca. Paicunaca yalli sueñuihuan cashpami, ñahuitapish mana pascai pudirca. Chaimantami imata mana nirca.

⁴¹ Jesús quimsa cutin cutimushpaca, paicunataca: —¿Cancunaca samarishpa sueñucunguichicllachu? Ña jatarichic, Runa Tucungapac shamushca ñucataca, juchayuc runacunapac maquipi churana horasca pactamushcami.

⁴² ¡Jatarishpa jacuchic! Ñucata japichicca ñami chayamucun— nirca.

Jesusta japishcamanta

⁴³ Jesús chashna nicucpiracmi, chunga ishcai yachacuccunapuramanta Judasca tauca runacunahuan shamurca. Chai runacunaca Israel curacunata mandac curacunapish, mandashcacunata yachachiccunapish, pushac yuyaccunapish cachacpimi, espadacunahuan, caspicunahuan shamurca.

⁴⁴ Jesusta japichicca: «Maijantami ñuca muchani chaimi. Paita japishpa, mana cacharishpa apanguichic» nishcami carca.

⁴⁵ Judas Jesuspacman cuchuyashpaca: —¡Yachachic!— nishpami mucharca.

⁴⁶ Chashna muchacpimi, Jesusta japircacuna.

⁴⁷ Ashtahuanpish chaipi caccunapuramanta shucca espadata llucchishpami, curacunata jatun mandac curapac servictaca huactashpa, ringrita pitirca.

⁴⁸ Jesusca paita japingapac shamuccunataca: —¿Shuhuacta shinachu ñucataca espadacunahuan, caspicunahuan japingapac shamunguichic?

⁴⁹ Punzhantami cancunahuan Diosta mañana huasipica yachachicurcani. Chaipica mana japircanguichicchu. Ashtahuanpish Dios quillcachishcapi nishca pactachunmi, cashna japingapac shamushcanguichic— nirca.

⁵⁰ Chaipimi yachacuccunaca Jesusllata saquishpa, tucui miticushpa rircacuna.

Shuc moso miticushpa callpashcamanta

⁵¹ Shuc mosomi pañohuan pillurishca Jesusta caticurca. Paitapish japircami.

⁵² Chashna japicpica, pillurishca pañota chaipi shitashpami, lluchulla atishpa callparca.

Mandaccunapuralla tandanacushcapacman Jesusta apashcamanta

⁵³ Jesustaca curacunata jatun mandac curapacmanmi aparcacuna. Chaipimi curacunata mandac curacunapish, pushac yuyaccunapish, mandashcacunata yachachiccunapish tandanacushca tiyacurca.

⁵⁴ Pedroca carutami catishpa, curacunata jatun mandac curapac huasi pungu pambacaman rirca. Chaipimi Diosta mañana huasita cuidaccunahuan ninapi mashashpa tiyacurca.

⁵⁵ Curacunata mandac curacunapish, tandanacushca mandaccunapish Jesusta huañuchingapacmi, llullashpa huillaccunata cayachirca. Chashna cayachishpapish ima mana allita ruhuashcataca mana tarircachu.

⁵⁶ Achca runacunami Jesusta llaquichingaraicu llullashpa huillarca. Shina huillashpapish shucca shuclata, shucca shuclatami huillarca.

⁵⁷ Maijancunaca jatarishpa, Jesusta llaquichishpa llullashpaca:

⁵⁸ —Ñucanchicca: “Runacuna ruhuashca, cai Diosta mañana huasitaca urmachishpa, quimsa punzhapica mana runacuna ruhuashca shucta huasitami shayachisha” nictami uyarcanchic— nirca.

⁵⁹ Chashna llullashpapish, mana shuclayallata nircacunachu.

⁶⁰ Chaimantami curacunata jatun mandac cura tucuipac chaupipi jatarishpa, Jesusta tapushpaca: —Cai tucuita nicucpipish, ¿manachu imata ningui?— nirca.

⁶¹ Jesusca imata mana nishpa upallami carca. Chaimanta curacunata mandac curaca Jesustaca: —¿Canca alli nina Diospac Churi Cristochu cangui?— nishpa, cutin tapurca.

⁶² Chashna tapucpimi Jesusca: —Ari, ñucami cani. Runa Tucungapac shamushca ñucataca, poderyuc Diospac alli maquiman tiyacuctapish, puyupi jahua pachamanta shamucuctapishmi ricunguichic— nirca.

⁶³ Shina nicpica, curacunata mandac curaca piñarishpa, paipac churanata lliquishpaca: —¿Imapactac shuctac huillaccunata mashcashun?

⁶⁴ Chashna nishpaca Diostami piñachicushca. Chaitaca cancunallatacmi uyashcanguichic. Cunanca, ¿imatatac ninguichic?— nishpa tapurca. Shina tapucpica, tucuimi juchanchishpa, “¡huañunami can!” nircacuna.

⁶⁵ Chaimantami maijanca Jesusta tucai callarirca. Cutin maijanca ñahuita pañohuan huatashpa, huactashpaca: «¡Maijantac huactanchic, huillai!» nircami. Diosta mañana huasita cuidaccunapish Jesusta ñahuipi huactarcami.

Pedro Jesusta negashcamanta

⁶⁶ Pedroca pungu pambapi tiyacucpimi, curacunata jatun mandac curata servic huarmi shamurca.

⁶⁷ Pedro ninapi mashashpa tiyacucta chai huarmi alli ricushpaca: —Canpish Nazaret pueblomanta Jesus-huan puricmi cangui— nirca.

⁶⁸ Shina nicpimi Pedroca: —Paitaca mana ricsinichu. Imatatacpishchari nicungui, mana yachanichu— nirca. Chashna nishpa, canzha pambaman llucshicpica, ñapish galloca cantarcallami.

⁶⁹ Chai servic huarmi cutin Pedrota ricushpaca: —Cai runaca paicunapurami— nishpami, shuccunaman huillarca.

⁷⁰ Shina nicpipish, Pedro cutinmi negarca. Chai quipallami, chaipi caccunaca cutin Pedrotaca: —Canca Galilea llactallamantami cangui. Chaimanta canpish chaipurallatami cangui, rimaipipish ricsinallami— nirca.

⁷¹ Paicuna chashna nicpimi Pedroca: —¡Diospac shutipimi nini, pimantatacpishchari rimacunguichic, chai runataca manatac ricsinichu!— nirca.

⁷² Pai chashna nicucpica, cutinllatacmi galloca cantarca. Chai horasmi Pedroca Jesús puntaman: “Manarac gallo ishcai cutin cantacpimi, quimsa cutin negangui” nishcataca yuyarirca. Chaita yuyarishpami huacarca.