MARCOS 13 - Dios Rimashcata Quillcashcami

Diosta mañana huasi urmanamanta

¹ Diosta mañana huasimanta Jesús llucshicucpimi, paipac yachacuccunamanta shucca: —Yachachic, ¡cai sumac rumicunata, cai jatun huasicunata riquiyari!— nirca.

² Chashna nicpimi Jesusca: —¿Cai jatun huasicunallata ricushpachu mana mancharicungui? Caipica shuc rumillapish mana saquiringachu, tucuimi urmachishca canga— nirca.

Cai pacha tucurina llaquicuna tiyanamanta

³ Jesusca Diosta mañana huasi chimbapura Olivos urcupimi tiyarirca. Chaipi Jesús tiyacucpimi, Pedropish, Jacobopish, Juanpish, Andrespish Jesuspacman cuchuyashpa, paillata tapushpaca:

⁴ —Can huillashcaca, ¿ima punzhatac pactangayari? Chashna tucugricuctaca, ¿imata ricushpatac yachashun?— nirca.

⁵ Shina nicpimi Jesusca: —Cuidaringuichic, pacta pi pandachinman.

⁶ Achcacunami ñuca shutipi shamushpa: “Ñucami Cristoca cani” nishpa, achcacunata pandachinga.

⁷ Cancunaca “macanacuimi tiyagrin, ñami macanacucun” nicpipish ama mancharinguichicchu. Chai llaquicunaca tiyangallatacmi. Chashna tucucpipish, cai pachaca manarac tucuringachu.

⁸ Shuc llactaca, shuctac llactahuan, jatun mandacca shuctac jatun mandac-huanmi macanacunga. Tauca llactacunapimi allpa chucchuipish, yarcaipish tiyangami. Chai llaquicunaca callari llaquicunallami canga.

⁹ Cancunaca alli cuidaringuichic. Cancunataca mandaccunapacman apangami. Tandanacuna huasicunapipish azotingami. Ñucata caticushcamantami mandaccunapacmanpish, jatun mandaccunapacmanpish apangami. Chashna apacpica, paicunaman ñucamanta huillanguichicmi.

¹⁰ Cai pacha manarac tucuricpimi, cai alli huillaica tucui llactacunapi huillashca canga.

¹¹ Mandaccunapacman cancunata pushacpica, “¿imatatac nishun?” nishpa, ama manchailla canguichicchu. Cancuna rimai callaricpica, Diosmi rimana yuyaita cunga. Mana cancunapac yuyaimantachu rimanguichic, ashtahuanpish Diospac Espiritumi rimana yuyaitaca cunga.

¹² Huauquica, quiquin huauquita, taitaca quiquin churitami huañuchichun japichinga. Churicunaca taita mamata piñashpami huañuchichinga.

¹³ Ñucamantami tucuipac piñashca canguichic. Chashna piñacpipish, tucuringacaman llaquita apacca quishpiringami.

¹⁴ Diosta mañana huasipi yallita millana tucuchic tiyacucta ricushpaca, Judea llactapi causaccunaca urcucunapi miticugrichun. (Maijanpish cai quillcashcata ricucca, alli entendinguichic).

¹⁵ Maijanpish huasi jahuapi caccunaca, ama uricuchun, ucumanta imata apangapacllapish ama uricuchun.

¹⁶ Chagrapi caccunaca, churanata apangapac ama huasiman cutichun.

¹⁷ Chai punzhacunapi huicsayuc huarmicunapish, chuchuchicuc huarmicunapish, ¡aij, imachari tucunga!

¹⁸ Chai punzhacuna ama tamya cachun, Diosta mañaichic.

¹⁹ Chai punzhacunaca mancharina llaquimi canga. Chashna llaquicunaca Dios cai pachata ruhuashca punzhamanta cunancaman mana tiyashcachu. Quipa punzhapipish mana tiyangachu.

²⁰ Chai llaqui punzhacunata Dios mana ashata chaupicpica, pipish mana causai pudinmanchu. Ashtahuanpish Diosca pai acllashcacunata cuyashcamantami, chai llaqui punzhacunataca chaupisha nishca.

²¹ Maijanpish: “¡Riquichic, Cristoca caipimi, chaipimi!” nicucpipish ama cringuichicchu.

²² Chai llulla cristocuna, llullac huillaccunami ricuringa. Chaicunaca pandachingapacmi milagrocunatapish, pi mana ricushcacunatapish ruhuashpa ricuchinga. Chashnami Dios acllashcacunatapish pandachisha ninga.

²³ Chaimanta cancunaca cuidaringuichic. Tucui chaicunataca ñaupamanmi cancunamanca huillani.

Apunchic Jesucristo cutin shamunamanta

²⁴ Chai mancharina llaqui punzhacuna tiyashca quipaca, intipish amsayangami, quillapish mana achicyachingachu.

²⁵ Lucerocunapish jahuamanta urmangami. Jahua cielopi tiyac jatuncunapish chucchungami.

²⁶ Chashna tucucpica, Runa Tucungapac shamushca ñucatami poderhuan, sumaimana achiclla cashcahuan puyupi achicyachishpa shamucucta ricungacuna.

²⁷ Chaimantaca ñuca angelcunatami ñuca acllashcacunata tucui pacha muyundimanta tandachichun cachasha.

²⁸ Higo yura ima tucucta ricushpa, yuyaita japichic. Chai yurapi panga huiñashpa cutin jundarimucta ricushpaca, usyai punzhacuna chayamucuctami yachanguichic.

²⁹ Shinallatac cai ñuca huillashcacuna pactamucucta ricushpaca, Runa Tucungapac shamushca cutimuna pungullapi cashcata yachanguichic.

³⁰ Cunan punzha causaccuna manarac huañucpimi, cai ñuca huillashcacunaca pactanga. Chaica chashnatacmi canga.

³¹ Jahua pachapish, cai pachapish tucuringami. Ashtahuanpish ñuca huillashcacunaca pactacungallami.

³² Shina cacpipish ima punzha, ima horas ñuca cutimuna cashcataca pi mana yachanchu. Jahua pacha angelcunapish mana yachanchu. Ñuca Diospac Churi cashpapish mana yachanichu, ashtahuanpish ñuca Taitallami yachan.

³³ Ñuca ima horas cutimunata mana yachashcamantaca, alli yuyaihuan riccharishca shina Diosta mañashpa chaparacuichic.

³⁴ Caica shuc amo caru llactaman rishpa, paita serviccuna imacunallata ruhuachun mandashpa saquic shinami. Huasita cuidactaca pungupi chaparachunmi mandashpa saquin.

³⁵ Cancunapish Huasiyuc ima horas cutimunata mana yachashcamantaca, alli yuyaihuan riccharishca shina chaparacuichic. Paica tutayamuctachari, chaupi tutatachari, gallo cantai horastachari, mana cashpaca pacarinatachari cutimunga.

³⁶ Pacta cungailla chayamushpa, cancunataca sueñucucta japinman.

³⁷ Cancunata nishpaca, tucui mashnatami ‘chaparacuichic’ nini— nirca.