MARCOS 11 - Dios Rimashcata Quillcashcami

Jerusalén puebloman Jesús yaicushcamanta

¹ Jerusalén puebloman chayagricushpaca, Betfagé pueblohuan, Betania pueblohuan tupanacui Olivos urcu chaquimanmi chayarca. Chaipi Jesús paipac yachacuccunapuramanta ishcaita

² cachashpaca: —Chimba uchilla llactaman rishpaca, pi manarac montashca shuc burro huatashca shayacuctami ricunguichic. Chai burrota cacharishpa apamugrichic.

³ Cancuna cacharicucpi maijan: “¿imapactac cacharicunguichic?” nicpica: “Apunchic Jesusmi apachun cachan, ñallami saquic shamushun” ninguichic— nirca.

⁴ Paicuna rishpaca, huasi lado ñanpi shuc burro huatashca shayacucta tarishpami cacharicurca.

⁵ Chaipi cac maijan caccunaca: —¿Ima nishpatac burrotaca cacharicunguichic?— nirca.

⁶ Ishcai yachacuccunaca Jesús imata nichun nishcatami nirca. Chashna nicpica, apachun saquircacunallami.

⁷ Burrota Jesuspacman apamucpica, churanacunahuanmi sudarca. Ña sudashca burropimi, Jesusca montashpa rirca.

⁸ Achcacunami paicunapac churanacunata Jesús rina ñanpi tendirca. Maijancunaca sacha ramacunatami pitishpa, ñanpi tendirca.

⁹ Chashna churashpami, Jesuspac ñaupata riccunapish, huashata catishpa riccunapish: —¡Dios cachashca shamucucca, alli nishca cachun! ¡Sumac cushicui cachun!

¹⁰ ¡Ñucanchic ñaupa mandac David mandashca shina mandangapac shamucucca, alli nishca cachun! ¡Jahua pachapipish alli nishca cachun!— nircacuna.

¹¹ Jesusca Jerusalenman chayashpaca, Diosta mañana huasimanmi yaicurca. Chai ucupi tucuita ricushpaca, ña tutayagricpimi, paipac chunga ishcai yachacuccunahuan Betania puebloman rirca.

Higo yurata ama pucuchun nishcamanta

¹² Cayandi punzha Betania pueblomanta llucshicushpaca Jesusca yarcachircami.

¹³ Chaimantami carumanta shuc pangasapa higo yurata ricushpa, “ñami pucushca canga” yuyashpa, ricungapac rirca. Chai yuraman chayashpa ricucpica, manarac pucuna punzhacuna cashcamantami chushac pangalla junda cashca carca.

¹⁴ Chaimantami Jesusca chai yurataca: —Cai yuramantaca, ama pi ashtahuan micuchun— nirca. Chashna rimactaca, paipac yachacuccunaca uyacurcami.

Jesús Diosta mañana huasimanta catuccunata llucchishpa cachashcamanta

¹⁵ Jesusca Jerusalén puebloman chayashpami, Diosta mañana huasiman yaicushpa catuccunatapish, randiccunatapish llucchishpa cacharca. Cullquita cambiaccunapac mizacunatapish, palomacunata catuccuna tiyarinacunatapish tigrachishpami shitarca.

¹⁶ Diosta mañana huasi ucupica imata apashpa purichunca mana saquircachu.

¹⁷ Jesusca chaipi caccunataca yachachishpaca: —Dios quillcachishcapica: “Ñuca huasica tucui llactamanta shamuccuna ñucata mañana huasimi canga” ninmi, ashtahuanpish cancunaca shuhuaccuna miticuna machaitami ruhuashcanguichic— nirca.

¹⁸ Chaita uyashpaca, mandashcacunata yachachiccunapish, curacunata mandac curacunapish Jesustaca ima shina huañuchinatami yuyaricurca. Chaica, tucui gentecunami “Jesusca allitami yachachin” nic carca. Chaimantami manchashpa huañuchinata munarca.

¹⁹ Ña chishitaca Jesusca Jerusalenmanta llucshishpa rircami.

Higo chaquishcamanta

²⁰ Cayandi tutamanta ñanta ricushpaca, higo yura sapindi chaquishcatami ricurca.

²¹ Chaimanta Pedroca Jesús nishcata yuyarishpaca: —Yachachic ricui. Can llaquichishca yuraca, chaquishcami— nirca.

²² Shina nicpimi Jesusca: —Diospi crichic.

²³ Maijanpish tucui shunguhuan crishpa, mana caita chaita yuyashpa, cai urcuta “caimanta anchuri, jatun cuchaman shitari” nicpica, ringallami. Chaica chashnatacmi canga.

²⁴ Chaimantami ñucaca nini: Cancuna crishpa, imata mañacushcata japina yuyaihuan Diosta mañashpaca japinguichicmi.

²⁵ Cancuna Diosta mañacushpaca, maijanta piñachishca cashpaca perdonaichic. Chashna ruhuacpimi, jahua pachapi cac cancunapac Taitapish cancunapac juchacunata perdonanga.

²⁶ Cancuna shuccunata mana perdonacpica, jahua pachapi cac cancunapac Taitapish cancunapac juchacunata mana perdonangachu— nirca.

“¿Pitac cantaca chashna ruhuachicun?” nishpa, Jesusta tapushcamanta

²⁷ Chai quipami Jerusalén puebloman cutimurcacuna. Chaipica Diosta mañana huasipi Jesús puricucpimi, Israel curacunata mandac curacunapish, mandashcacunata yachachiccunapish, cunac yuyaccunapish paipacman cuchuyarca.

²⁸ Shina cuchuyashpaca: —¿Pi mandacpitac chashna ruhuacungui? ¿Pitac canman poderta curca?— nirca.

²⁹ Shina nicpimi Jesusca: —Ñucapish cancunata tapusha, ñuca tapushcata cancuna cutichicpica, ñucapish pi chashna ruhuachun mandashcata huillashallami.

³⁰ Bautizac Juan bautizachunca, ¿Dioschu cacharca, mana cashpaca runacunallachu cacharca? Huillaichic— nirca.

³¹ Chashna tapucpica, paicunapura rimanacushpaca: —“Diosmi cachashca” nicpica: “Shinashpaca, ¿ima nishpatac Juan huillashcataca mana crircanguichic?” ningami.

³² Ñucanchic: “Runacunallami Juantaca cacharca” ninapish mana allichu— ninacurca. Tucui gentecuna “Juanca Diosmantatacmi huillacun” ninacucta uyashcamantami, manchashpa imata mana ni pudirca.

³³ Chaimantami Jesustaca: —Mana yachanchicchu— nirca. Shina nicpica Jesusca: —Shinashpaca, ñucapish pi mandacpi chashna ruhuacushcataca mana huillashachu— nirca.