MARCOS 10 - Dios Rimashcata Quillcashcami

Divorciomanta

¹ Jesusca Capernaúm pueblomanta llucshishpaca, Jordán yacuta pasashpa, Judea llactamanmi rirca. Jesusca achca gentecuna tandanacumucpimi, pai yachachic cashca shinallatac cutin yachachi callarirca.

² Fariseocuna pandachingaraicu Jesuspacman cuchuyashpaca: —Mandashcacunapi nishca shinaca, ¿cusaca huarmimanta raquirinachu canga?— nishpa tapurca.

³ Shina tapucpi Jesusca: —Moisés mandashcapica, ¿imatatac nin?— nirca.

⁴ Shina tapucpimi fariseocunaca: —Moisesca: “Firmata cushpaca, huarmimanta raquirinallami” ninmi— nirca.

⁵ Shina nicpimi Jesusca: —Cancuna sinchi shungu cacpimi, Moisesca chashna mandashpa quillcashca.

⁶ Diosca cai pachata ruhuashpaca, caritapish, huarmitapishmi ruhuarca.

⁷ Chaimantami carica taita mamata saquishpa, huarmihuan tandarishpa,

⁸ ishcaimanta shuclla tucunga. Shinashpaca ña mana ishcaichu, ashtahuanpish shucllami can.

⁹ Chaimanta Dios tandachishcataca, pi mana chicanyachingachu— nirca.

¹⁰ Paipac yachacuccuna huasipi cashpami, chaillamantatac cutin Jesusta tapurca.

¹¹ Chaimantami Jesusca: —Maijanpish paipac huarmimanta raquirishpa shuc-huan cazarashpaca juchallinmi.

¹² Chashnallatac huarmipish paipac cusamanta raquirishpa, shuc-huan cazarashpaca, juchallinmi— nirca.

Jesús Huahuacunamanta mañashcamanta

¹³ Huahuacunapac umapi Jesús tuparichun pushamucpimi, yachacuccunaca chai pushamuccunahuan piñarirca.

¹⁴ Jesús chaita ricushpa, yachacucuccunahuan piñarishpaca: —Huahuacuna ñucapacman shamuchunca saquichiclla, ama jarcaichicchu. Cai huahuacuna shinacunami Dios mandacucmanca yaicunga.

¹⁵ Maijanpish shuc huahua shina, Dios mandacucta mana chasquicca, Dios mandacucmanca mana yaicungachu. Chaica chashnatacmi canga— nirca.

¹⁶ Shina nishpami, Jesusca huahuacunata marcashpa, uma jahuapi maquita churashpa bendiciarca.

Chayuc runa Jesusta tapushcamanta

¹⁷ Chaimanta llucshishpa, Jesús ñanta ricucpimi, shuc moso callpamushpa, paipac ñaupapi cungurishpaca: —Alli yachachiclla, ñuca huiñai causaita charingapacca, ¿imatatac ruhuana cani?— nirca.

¹⁸ Shina nicpimi Jesusca: —¿Ima nishpatac “alli” ningui? Shucllami allica tiyan, chaica Diosmi.

¹⁹ Mandashcacunataca canllatac yachanguimi. Chaipica: “Ama huainayangui, ama huañuchingui, ama shuhuangui, ama llullangui, ama umangui, cambac taita mamata cuyangui” nicunmi— nirca.

²⁰ Jesús chashna nicpimi, chai runaca: —Yachachic, tucui caicunataca huahuamanta pachami pactachicuni— nirca.

²¹ Chaimantami Jesusca cuyaihuan paita ricushpaca: —Shina cashpapish, caitami ruhuanarac cangui: Cambac tucui charishcacunata catushpa, huacchacunaman cugri. Chashna cushpaca, jahua pachapimi achcata charingui. Chashna cushpaca, ñucata catilla— nirca.

²² Chai runaca yalli chayucmi carca. Chaimantami llaquilla rirca.

²³ Chaimanta Jesús muyundita ricushpa, paipac yachacuccunataca: —¡Chayuccunapacca Dios mandacucman yaicunaca sinchimi!— nirca.

²⁴ Yachacuccuna chaita uyashpaca yallitami mancharirca. Ashtahuanpish Jesús cutinllatac rimashpaca: —¡Huahuacunalla, charishcallapi shunguta churaccunapacca, Dios mandacucman yaicunaca sinchimi!

²⁵ Chayuc runa Dios mandacucman yaicunapac randica, shuc camellomi auja ringrita pasarinman— nirca.

²⁶ Chaita yachacuccunaca uyashpaca ashtahuan mancharishpami: —Shinashpaca, ¿pitac quishpiringayari?— nishpa, tapunacurca.

²⁷ Jesús paicunata ricushpaca: —Gentecunaca maita mana quishpiripacmi, ashtahuanpish Diosmanca imapish ruhuaipacllami— nirca.

²⁸ Chashna nicpimi Pedroca: —Ñucanchicca tucui charishcacunata saquishpami, canta caticunchic— nirca.

²⁹ Shina nicpimi Jesusca: —Maijanpish alli huillaita huillangapac, ñucata catishcamanta huasita, huauquicunata, panicunata, taita mamata, huarmita, huahuacunata, allpata saquishpaca,

³⁰ cai pachapica patsac cutinhuanmi huasicunata, huauquicunata, panicunata, mamacunata, huahuacunata, allpacunata chasquinga. Chashnallatac ñucata caticushcamanta gentecunapac piñashca, llaquichishca cashpaca shamuc punzhapica huiñai causaitami charinga. Chaica, chashnatacmi canga.

³¹ Jatun tucushcacunaca yangallami canga. Yangalla nishcacunaca, alli nishcami canga— nirca.

Jesús huañunamanta cutin huillashcamanta

³² Jesusca Jerusalén puebloman ñanta ricushpaca, paipac yachacuccunapac ñaupatami ricurca. Yachacuccunaca manchai manchaillami Jesustaca catishpa ricurca. Chaimantami Jesusca chunga ishcai yachacuccunallata cayashpa, pai ima tucunata huillai callarirca. Pai huillashpaca:

³³ —Cunanca, Jerusalenmanmi ricunchic. Chaipimi Runa Tucungapac shamushca ñucataca, curacunata mandac curacunamanpish, mandashcacunata yachachiccunamanpish japichinga. Paicunami huañuchingapac juchanchishpa, mana israelcunaman cunga.

³⁴ Paicunaca ñucata burlangacunami, macangacunami, tucangacunami, huañuchingacunami. Chashna huañuchicpipish, quimsa punzhapica causarishallami— nirca.

Jacobopish, Juanpish mañashcamanta

³⁵ Zebedeopac churicuna Jacobopish, Juanpish Jesuspacman cuchuyashpaca: —Yachachic, ñucanchic mañashcata uyachunmi munanchic— nirca.

³⁶ Shina nicpimi Jesusca: —¿Imatatac ruhuachun ninguichic?— nirca.

³⁷ Chashna nicpimi paicunaca: —Cambac sumaimana mandanapica, shuctaca cambac alli maquiman, shuctaca lluqui maquiman tiyachingui— nirca.

³⁸ Shina nicpimi Jesusca: —Cancunaca imata mañacushcataca mana yachanguichicchu. Jayacta ubiac shina, bautizaric shina llaquicunataca, ¿ñuca shina apai pudinguichicchu?— nirca.

³⁹ Chashna nicpimi paicunaca: —Ari, chaita apashunllami— nirca. Chashna nicpimi Jesusca: —Ari, cancunaca jayacta ubiac shina, bautizaric shina llaquicunataca, ñuca shina apanguichicmi.

⁴⁰ Ashtahuanpish maijanta ñuca alli maquiman, lluqui maquiman tiyachinataca, Diosmi allichishpa charicun, mana ñucaca— nirca.

⁴¹ Chaita caishuc chunga yachacuccuna uyashpaca, Jacobohuanpish, Juanhuanpish piñarircami.

⁴² Jesús paicunata cayashpaca: —Cai pacha mandaccunallami, llactapi causaccunata quiquin munashcata ruhuashpa mandan. Paicunapurapipish maijan jatun mandac cashpaca, paicunatapish mandanllami. Chaitaca cancunallatac yachanguichicmi.

⁴³ Cancunapurapica, mana chashnachu cana canguichic. Ashtahuanpish cancunapurapi maijan alli nishca casha nishpaca, caishuccunata servinami canguichic.

⁴⁴ Cancunapurapi maijan mandangapac alli nishca casha nishpaca, caishuccunata servinami canguichic.

⁴⁵ Runa Tucungapac shamushca ñucaca, mana servichingapacchu shamurcani, ashtahuanpish servingapac, huañushpa achca runacunata quishpichingapacmi shamurcani— nirca.

Jesús ñahui mana ricuc Bartimeo runata alliyachishcamanta

⁴⁶ Chaimantaca Jericó pueblomanmi chayarcacuna. Chaimanta Jesús paipac yachacuccunahuan, shuctac gentecunahuan ricucpimi, Timeopac churi Bartimeo runa ñanpi caridadta mañashpa tiyacurca.

⁴⁷ Nazaret pueblomanta Jesús cashcata uyashpami chai runaca: —Mandac Davidpac aillupuramanta Apunchic Jesús, ¡ñucataca llaquiyari!— nishpa, capari callarirca.

⁴⁸ Taucacuna upallai nishpa piñaricucpipish, chai runaca: —Mandac Davidpac aillupuramanta Apunchic Jesús, ¡ñucata llaquiyari!— nishpami, ashtahuan caparirca.

⁴⁹ Chaimantami Jesús chaillapi shayarishpaca: —Paita cayamugrichic— nirca. Cayangapac riccuna chai runataca: —Jatari, ama manchaichu. Jesús cayacunmi— nirca.

⁵⁰ Chashna nicpimi, chai runaca pai pillurishcata chaillapi shitashpa, jatarishcahuan Jesuspacman callparca.

⁵¹ Chashna chayaricpimi Jesusca: —¿Imatatac ruhuachun ningui?— nirca. Shina nicpimi, ñahui mana ricuc runaca: —Yachachic, ñuca ñahuicunata alliyachishpa cui— nirca.

⁵² Shina nicpimi Jesusca: —Rilla, can crishcamantaca, ñami alliyashcangui— nirca. Chashna nicpimi, ñahui ña ricucpi, Jesusta catishpa ñanta rircalla.