MARCOS 1 - Dios Rimashcata Quillcashcami

Bautizac Juan huillashcamanta

¹ Diospac Churi Jesucristomanta alli huillanaca, cashnami callarin.

² Dios ima nishcata huillac Isaías quillcashpaca: «Ñuca huillactaca Quishpichic shamuna ñanta allichichunmi, ñaupachishpa cachani.

³ Shitashca pambapi shuc runa caparishpaca: “Quishpichic shamuna ñanta allichichic, quingu ñancunatapish derechaichic” nicunmi» nirca.

⁴ Bautizac Juanca shitashca pambapimi bautizarinamanta, juchayuc cashcamanta llaquirishpa, Diosman cutirinamanta alli huillaita huillacurca.

⁵ Chashna huillacucpimi, tucui Jerusalén pueblomantapish, Judea llactamantapish pai huillashcata uyangapac shamurca. Juanca paicuna llaquirishpa, juchacunata huillacpimi, Jordán yacupi bautizarca.

⁶ Juanca camello millmamanta ruhuashca churanata churashca, cara chumbihuan chumbillishcami carca. Shinallatac langostacunata, abeja mishquitami micuc carca.

⁷ Juanca huillashpaca: «Ñucapac quipata shamucmi ñucata yalli poderyuc. Ñucaca cumurishpa, paipac ushuta huatashcallatapish mana pascaipacmi cani.

⁸ Ñucaca yacullahuanmi bautizani, ashtahuanpish ñucapac quipata shamucmi Diospac Espirituhuanmi bautizanga» nirca.

Jesusta bautizashcamanta

⁹ Chai punzhacunapimi Jesusca Galilea llacta Nazaret pueblomanta Juanpacman shamurca. Chaimantami Juanca Jordán yacupi Jesustaca bautizarca.

¹⁰ Yacumanta llucshicushpami, Jesusca jahua pacha pascarictapish, Diospac Espíritu paloma shina paipac jahuaman urai shamucuctapish ricurca.

¹¹ Shinallatac jahua pachamanta rimashpaca: «Canmi ñuca cuyashca Churica cangui. Canmi ñucataca yallita cushichingui» nirca.

Jesusta diablo pandachisha nishcamanta

¹² Bautizashca quipaca, Diospac Espiritumi Jesustaca shitashca pambaman pusharca.

¹³ Jesusca chuscu chunga punzhatami shitashca pambapi carca. Chaipimi Satanaspish pandachisha nirca. Sacha animalcunapish tiyarcami. Chaipica angelcunami Jesustaca servicurca.

Jesús Galilea llactapi huillai callarishcamanta

¹⁴ Bautizac Juan carcelpi cacpimi, Jesusca Galilea llactaman rirca. Chaipi Dios mandacucmanta alli huillaita,

¹⁵ huillashpaca: «Alli huillai punzhaca chayamushcami. Diosca ñami mandagrin. ¡Chaimanta juchata saquishpa, Diosman cutirishpa, alli huillaita crichic!» nirca.

Challuata japic chuscu runacunata Jesús cayashcamanta

¹⁶ Jesusca Galilea cucha patata puricushpami, Simontapish, Simonpac huauqui Andrestapish linchita yacupi shitacucta ricurca. Paicunaca challuata japiccuna carca.

¹⁷ Jesusca paicunataca: —Ñucata catichic. Cancunataca challuata japic shinallatac, gentecunata Diospacman pushamuctami ruhuasha— nirca.

¹⁸ Paicunaca linchicunata saquishpa, Jesus-huan rircallami.

¹⁹ Chaimanta ashtahuan chainicman rishpaca, Zebedeopac churicunatami Jacobotapish, Juantapish ricurca. Paicuna canoapi linchicuna lliquirishcata siracucpimi,

²⁰ Jesús paicunatapish cayarca. Chaimantami paicunapac taita Zebedeotapish caishuc challuata japic runacunatapish canoapi saquishpa, Jesusta catishpa rircacuna.

Jesús supai japishca runata alliyachishcamanta

²¹ Chaimantaca Capernaúm puebloman chayashpami, samana punzhapi Jesusca israelcuna tandanacuna huasipi yachachi callarirca.

²² Jesusca mandac cashpami, mandashcacunata yachachiccuna shinallaca mana yachachirca. Chaimantami tucui uyaccunaca mancharirca.

²³ Chai tandanacuna huasipica, supai japishca runami tiyacurca. Chai runa caparishpaca:

²⁴ —Nazaret pueblomanta Jesús, ¿ñucanchictaca imatatac ruhuagringuiyari? ¿Canca llaquichingapacchu shamungui? Canca Dios cachashca Jucha Illacmi cangui. Canta ricsinimi— nirca.

²⁵ Jesusca paitaca: —¡Upallai, paimanta llucshi!— nishpami, sinchita rimarca.

²⁶ Chai supaica chai runata munai chucchuchishpa, sinchita caparishpami llucshi rirca.

²⁷ Chaimantami tucui gentecuna mancharinacushpa: “¿Caica imatac? ¿Mushuc yachachinatachu yachachicun? Millai supaita llucshi nicpica, cazushpa llucshinllami” nishpami tapunacurca.

²⁸ Jesusmantaca Galilea llacta muyundipi tucui causaccunami chayarcacuna.

Pedropac suegrata Jesús alliyachishcamanta

²⁹ Jesús tandanacuna huasimanta llucshishpaca, Jacobohuan, Juanhuanmi Simonpac, Andrespac huasiman rirca.

³⁰ Chai huasipica, Simonpac suegrami fiebrehuan ungushca carca. Chaitami Jesusmanca huillarca.

³¹ Chaimantami Jesusca ungushcapacman cuchuyashpa, maquimanta japishpa jatarichirca. Fiebre paimanta anchuricpimi, paicunaman micunata carai callarirca.

Achca ungushcacunata Jesús alliyachishcamanta

³² Inti tigrashpa tutayamucucpimi, tucui ungushcacunatapish, supai japishcacunatapish Jesuspacman pushamurca.

³³ Tucui pueblocunamantami Jesús tiyacuc huasi punguman tandanacumurca.

³⁴ Jesusca ima ungüihuan caccunatapish, taucatami alliyachirca. Runacunamantapish, supaicunata llucchishpa cacharcami. Supaicunaca Jesús pi cashcataca yacharcami. Chaimantami mana rimarichun saquirca.

Jesús Galilea llactapi huillashcamanta

³⁵ Jesusca tutamanta utca, manarac achicyamucpimi, shitashca pambapi Diosta mañangapac rirca.

³⁶ Chaimantami Simonca paihuan caccunahuan Jesustaca mashcangapac rirca.

³⁷ Jesusta tarishpaca: —Tucui gentecunami cantaca mashcacun— nirca.

³⁸ Shina nicpimi Jesusca: —Cuchulla llactacunamanpish jacuchic. Chaicunapipish huillangapacmi shamurcani— nirca.

³⁹ Jesusca tucui Galilea llacta israelcuna tandanacuna huasicunapimi huillarca. Runacunamantapish supaicunata llucchishpa cacharcami.

Lepra ungüihuan cac runata Jesús alliyachishcamanta

⁴⁰ Lepra ungüihuan ungushca runa Jesuspacman cuchuyashpa, cungurishpaca: —Can ñucata alliyachisha nishpaca, alliyachinguimanllami— nishpa mañarca.

⁴¹ Jesusca chai runata llaquishpami, maquihuan tuparishpaca: —Ari, alliyachisha ninimi, alliyai— nirca.

⁴² Rimarincami lepra ungüica chai runamanta anchurirca.

⁴³ Chai runata Jesús cachacushpaca:

⁴⁴ —Riqui, pi canta alliyachishcataca, pacta piman huillanguiman. Cunanca, Israel curaman ricuchigri. Can alliyashcata paicuna ricuchunca, Moisés mandashca shinallatac ofrendata cugringui— nishpami mandarca.

⁴⁵ Ashtahuanpish chai runaca, ima shina alliyashcataca tucuimanmi parlai callarirca. Chaimantami Jesusca mai pueblomanpish mana yaicui pudishpa, shitashca pambacunapi puricurca. Shina cacpipish, tucui llactacunamantami paipacman shamuc carca.