MALAQUÍAS 2 - Dios Rimashcata Quillcashcami

Israelcuna mana cazucpi llaquichishcamanta

¹ Tucuita Mandac Diosca: «Curacunalla, cai mandashcacunaca cancunapacmi.

² Cai mandashcacunata mana cazushpa, tucui shunguhuan ñuca shutita mana alli nicpica, yallitami llaquichisha. Bendicianapac randica maldiciashami. Tucui shunguhuan ñucata mana cazushcamantaca ñami maldiciarcani.

³ Ñucami cancunapac huahua huahuacunataca llaquichisha. Ñucaman cushpa huañuchishca animal huanutapish cancunapac ñahuipimi shitasha. Cancuna fiestata ruhuashpa, animalta huañuchishca huanundimi cancunataca shitasha.

⁴ Chashna ruhuacpimi, ñuca Levipac huahuacunahuan ari nishca pactachun, ñuca mandashcata yachanguichic.

⁵ Ñucaca causaimanta, cushi causaimantami paicunahuan ari ninacurcani. Chaicunataca ñucata manchashpa causachunmi curcani. Chaita cucpimi, ñuca shutita alli nishpa, ñuca ñaupapi cumurirca.

⁶ Levitacunaca cashcata nic mandashcacunatami yachachirca. Paicunaca ima mana allita mana rimarcachu. Cashcata ruhuashpami ñucahuan cushilla causarca. Chashnami tauca mana allita ruhuashpa causac runacunata mana allimanta anchuchirca.

⁷ Paicunaca tucuita Mandac Diospac huillaccunami. Chaimantami paicunaca allillata huillancuna. Chashna huillacpimi, gentecunaca mandashcamanta yachanata munanga.

⁸ Ashtahuanpish cancunaca alli ñanmanta anchurishpami, ñuca mandashcacunata pandata yachachishpa, tauca runacunata mitcachic shina urmachircanguichic. Chashna ruhuashpami, levitacunahuan ari nishcatapish yangapi churarcanguichic.

⁹ Cancunaca ñuca yachachishcataca mana cazurcanguichicchu. Ñuca mandashcacunataca ñahuita ricushpallami yachachircanguichic. Chaimantami cancunataca tucui llactacunapurapi millanga, shinallatac yangalla canguichic» ninmi.

¹⁰ ¿Manachu tucui ñucanchicca shuclla taitata charinchic? ¿Manachu shuclla Dios ruhuashca canchic? Chashna cashpaca, ¿ima nishpatac ñucanchicca caishuc chaishuc mana cazunacushpa, ñaupa taitacunahuan ari nishcataca yangapi churanchic?

¹¹ Judá llactapipish, Israel llactapipish, Jerusalenpipish mana cazushpami, millana juchacunata ruhuarca. Judá llactapi causaccunaca Mandac Dios cuyashca paipaclla huasita yangapi churashpa, mana ricsishca dioscunata mañac huarmicunahuanmi cazararca.

¹² Mandac Dios chashna ruhuac runacunataca pipish cachun, Jacobopac aillumanta anchuchichun. Tapushcata cutichic runatapish, tucuita Mandac Diosman ofrendata apamuc runatapish anchuchichun.

¹³ Cancunaca mana chaillatachu ruhuarcanguichic. Yallita huacashca huiquihuanmi Mandac Diospac altarta taparcanguichic. Mandac Dios ofrendata cancunapac maquimanta mana chasquishcamantami yallita caparishpa huacarcanguichic.

¹⁴ Ashtahuanpish cancunaca: «¿Imamantatac mana chasquin?» ninguichicmi. Cancunallatacmi huambrarac cashpaca, cazarashca cashpapish huarmita shitarcanguichic. Chaitami Mandac Diosca ricurca. Chai huarmica canhuan cazarashpa ari nishcami carca.

¹⁵ ¿Manachu Mandac Diosca caritapish, huarmitapish cuerpondi, espiritundi shuclla shinata ruhuarca? ¿Imapactac chashna ruhuarca? ¡Paica, cancunapac huahua huahuacunapish, paipaclla cachunmi chashna ruhuarca! Chaimanta cancunapac yuyaita cuidarichic, ama cancunapac huarmita shitaichicchu.

¹⁶ Quiquin huarmita shitac runatapish, mana allita ruhuashpa paipac churanata mapayachic runatapish piñanimi. Cancunapac yuyaita cuidarichic, ama cancunapac huarmita shitaichicchu. Chaitaca Mandac Dios ñucami nini.

Taripana punzhamanta

¹⁷ Mandac Diosta rimacushpalla shaicuchishpaca: «¿Imata nishpatac shaicuchishcanchic?» ninguichicmi. Shinallatac: «Maijan cashpapish mana allita ruhuashpami, Mandac Diostaca cushichinchic, chaitami paica chasquin» ninguichic. Mana cashpaca: «¿Maipitac cashcata ruhuac Mandac Diosca?» nishpami shaicuchinguichic.