MALAQUÍAS 1 - Dios Rimashcata Quillcashcami

¹ Cai rimaicunaca Mandac Dios israelcuna llaqui tucunamanta Malaquiasman huillachishcami.

Mandac Dios israelcunata cuyashcamanta

² Mandac Dios israelcunataca: «Ñucaca cancunata cuyarcanimi. Chashna cuyacpipish cancunaca: “¿Ima shinatac ñucanchictaca cuyarcangui?” nircanguichicmi. ¿Manachu Esauca Jacobopac huauqui carca? Chashna cacpipish, Jacobollatami cuyarcani. Chaitaca Mandac Dios ñucami nini.

³ Esautaca piñarcanimi. Chaimantami pai causana urcucunatapish llaquinayaita tucuchircani. Paipac allpacunatapish, chacal animalcuna causana shitashca pambatami ruhuarcani» ninmi.

⁴ Edom llactapi causac Esaú aillucunaca: “Ñucanchicca tucui tucuchishcami canchic. Chashna cashpapish, cutinllatac shayachishunmi” ningami. Chaimantami tucuita Mandac Diosca: «Paicuna cutin shayachicpipish, ñucami cutin urmachisha. Shina urmachicpica: “Diosta mana manchac llactami, huiñaita Mandac Dios piñashca gentecunami” nishpami shutichinga.

⁵ Chaita cancuna quiquin ñahuihuan ricushpaca: “¡Mandac Diosca Israel llacta linderocunatapish yalli jatunmi!” ninguichicmi.

Mandac Dios curacunata rimashcamanta

⁶ Churica taitata cazunmi. Servicpish amota manchanmi. Ñuca cancunapac Taita cacpica, ¿ima nishpatac mana cazunguichic? Ñuca cancunapac amo cacpica, ¿ima nishpatac mana manchanguichic? Ñuca shutita yangapi churac curacunalla, cancunaca: “¿Ima shinatac cambac shutitaca yangapi churanchicyari?” ninguichicmi. Chaitaca Mandac Dios ñucami nini.

⁷ Cancuna mapa tandata ñuca altar jahuapi rupachishpaca: “¿Ima mana allita ruhuashpatac mana cazunchicyari?” ninguichicmi. Cancunaca ñuca mizata yangapi churashpami, chashna ruhuanguichic.

⁸ Mana ricuc animalta ñucaman huañuchichun cushcaca, ¿cancunamanca allichu? Suchu animalta, ungushca animalta ñucaman cushcapish, ¿cancunamanca allichu? Alli cacpica, chai animaltaca cancunata mandacman cugrichicyari. Shina cucpica, ¿cantaca alli ningachu? ¿Chai cushcataca chasquingachu?» ninmi.

⁹ Mandac Dios ñuca cancunaman allita ruhuachun mañaichic. Shina mañashpapish, mana alli ofrendata cucpica, ¿cancuna mañashcata chasquishachu? Chaitaca Mandac Dios ñucami nini.

¹⁰ Ñuca altar jahuapi ama yanga rupachic shamuchunca, cancunapuramanta, ¿pitac ñuca huasi punguta huichcac shamunguichic? Ñucaca cancunahuanca mana cushillachu cani. Cancunapac ofrendatapish mana chashquishachu. Chaitaca Mandac Dios ñucami nini.

¹¹ Cai pachapica ñuca shutica inti llucshina ladomanta, inti tigrana ladocamanmi jatun. Chashna ñuca shuti cai pachapi jatunyachishca cacpimi, maipi cashpapish, inciensota rupachishpa, chuya ofrendacunata ñucaman cun. Chaitaca tucuita Mandac Dios ñucami nini.

¹² Shina cacpipish cancunaca: “Mandac Diospac mizapish, chaipi tiyac micunapish millanami” nishpami, yangapi churarcanguichic.

¹³ Shinallatac cancunaca: “¡Caita ruhuanataca shaicunchicmi!” nishpami, ñucata yangapi churarcanguichic. Shinallatac lisiado, suchu, ungushca animalcunata ñucaman cungapac apamushpami yallita piñachircanguichic. ¿Chaitaca cancunapac maquimantaca chasquishachu?

¹⁴ Maijanpish paipac manada ovejacunapi huira ovejacunata charishca jahua, chaita cushami nishca jahua, mana alli animalta Mandac Dios ñucaman cuc runaca mana alli nishca cachun. Ñucaca Jatun Mandacmi cani. Shinallatac ñuca shutica tucui llactacunapac manchanami. Chaitaca Mandac Dios ñucami nini.