SAN LUCAS 9 - Dios Rimashcata Quillcashcami

Jesús chunga ishcai yachacuccunata huillachun, cachashcamanta

¹ Jesusca paipac chunga ishcai yachacuccunata tandachishpami, tucuilaya supaicunata llucchichun, ungushcacunata alliyachichun poderta curca.

² Shinami, Dios mandacucmanta huillagrichun, ungushcacunata alliyachichun cacharca.

³ Paicunata cachashpaca: —Ama imata apanguichicchu. Cucayutapish, taunatapish, cullquitapish ama aparinguichicchu. Yanandi churanatapish ama apanguichicchu.

⁴ Mai huasiman chayashpaca, chai llactamanta ringacaman chaillapi canguichic.

⁵ Maijan pueblopi mana chasquisha nicpica, chaquipi catirishca allpatapish chaspishpa ringuichic. Chashna ruhuacpimi, paicuna mana allita ruhuashcata yachangacuna— nirca.

⁶ Chashnami yachacuccunaca tucui llactacunata alli huillaita huillashpa, ungushcacunata alliyachishpa puricurca.

Jesús pi cashcata Herodes mana yachashcamanta

⁷ Mandac Herodes, Jesús tucui imata ruhuacushcata yachac chayashpaca manchaihuanmi carca. Chaica, maijancunaca: «bautizac Juanmi huañushcamanta causarimushca canga»,

⁸ maijancunaca: «Dios ima nishcata Eliasmi ricurishca canga», cutin maijancunaca: «Dios ima nishcata ñaupa huillaccunamanta maijanmi causarishca canga» nircacuna.

⁹ Herodesca: «Juantaca ñucallatacmi cungata pitichircani. ¿Pitac cai tucui allicunatami ruhuan nishpa parlancuna?» nishpami, quiquin ñahuihuantac Jesusta ricunata munacurca.

Jesús pichca huaranga yalli gentecunaman carashcamanta

¹⁰ Jesús cachashca apostolcuna cutimushpaca, tucui imata ruhuashcatami Jesusman parlarca. Paicunallata pushashpami, Jesusca Betsaida pueblo cuchullaman rirca.

¹¹ Chaita gentecuna yachashpami, catishpa rirca. Chaipimi Jesusca cushilla chasquishpa, Dios mandacucmanta huillashpa, ungushcacunatapish alliyachirca.

¹² Ña tutayagricpimi, chunga ishcai yachacuccuna Jesuspacman cuchuyashpaca: —Cai shitashca pambapimi canchic. Gentecuna cuchulla llactacunapi micunatapish, samarinatapish mashcagrichun cachai— nirca.

¹³ Shina nicpimi Jesusca: —Cancunallatac caraichic— nirca. Chashna nicpimi paicunaca: —Pichca tanda, ishcai challuallatami charinchic. Cai tucui gentecunaman carangapacca, ¿randinachu canchic?— nirca.

¹⁴ Chaipica pichca huaranga yalli runacunami carca. Jesusca paipac yachacuccunataca: —Pichca chunga, pichca chunga raquishpa tiyachichic— nirca.

¹⁵ Yachacuccunaca pai nishca shinami tucuita tiyachirca.

¹⁶ Jesús chai pichca tandata, ishcai challuata japishpaca, jahua pachata huichailla ricushpami, Diosta pagui nirca. Shinami chaupishpa chaupishpa, gentecunaman carachun paipac yachacuccunaman curca.

¹⁷ Tucui gentecunami mana nicta micurca. Paicuna puchuchishcataca, chunga ishcai taza jundatami tandarca.

Jesusca Cristo cashcata Pedro huillashcamanta

¹⁸ Shuc punzha, Jesús pailla Diosta mañacushpa, paipac yachacuccunataca: —Gentecunaca, ¿pi cashcatatac ñucataca yuyancuna?— nirca.

¹⁹ Chashna tapucpimi paicunaca: —Maijancunaca: “Bautizac Juanmi” nincunami. Maijancunaca: “Dios ima nishcata huillac Eliasmi” nincunami. Maijancunaca: “Dios ima nishcata ñaupa huillaccunamanta maijanmi causarimushca canga” nincunami— nirca.

²⁰ Chashna nicpimi Jesusca: —Cutin cancunaca, ¿pi cashcatatac ñucataca yuyanguichic?— nirca. Chashna nicpimi Pedroca: —Canca Dios cachashca, Cristomi cangui— nirca.

Jesusta huañuchinamanta huillashcamanta

²¹ Pedro chashna nicpica, Jesusca ama piman huillachunmi cutin cutin mandarca.

²² Shinallatac Jesusca: —Runa Tucungapac shamushca ñucaca llaquicunata apanami cani. Curacunata mandac curacunapish, pushac yuyaccunapish, mandashcacunata yachachiccunapish mana ricusha nishpami huañuchinga. Chashna huañuchicpipish, quimsa punzhapica causarishami— nirca.

²³ Chaipi caccunataca: —Maijanpish ñucata catisha nishpaca, quiquin causaita mana llaquinachu can. Cruzpi chacatashca huañuna shina llaquita apana cashpapish, ñucata punzhanta catichunlla.

²⁴ Maijanpish quiquin causaita llaquicca chingaringami. Maijanpish ñucata caticushcamanta causaita chingachicca huiñaita causangami.

²⁵ Shuc runa tucui cai pachapi tiyaccunata japishpapish, causaita chingachishpa ¿ima allitac cangayari?

²⁶ Maijanpish ñucamantapish, ñuca huillashcacunamantapish pingacpica, Runa Tucungapac shamushca ñucapish Diospac poderhuan, jucha illac angelcunahuan shamushpaca, chai runamanta pingashami.

²⁷ Maijan caipi caccunaca, Dios mandacucta ricungacaman manarac huañunguichicchu. Chaica chashnatacmi canga— nirca.

Jesús shuctaclaya ricurishcamanta

²⁸ Chashna nishcamanta pusac punzha shinapimi, Jesusca Pedrohuan, Juanhuan, Jacobohuan Diosta mañangapac urcuman rirca.

²⁹ Jesús mañacushpaca, ñahuipish shuctaclaya tucushpa, churanapish jagan nicuc yuranlla ricurirca.

³⁰ Chaipica ishcai runacunami Jesus-huan parlanacucurca. Paicunaca shucca Moisés, shucca Eliasmi carca.

³¹ Sumaimana achiclla chaupipimi, Jesús Jerusalenpi huañunamanta parlanacucurca.

³² Pedropish, paihuan caccunapish yalli sueñunayaihuanmi carca. Shina cashpapish, Jesús chashna sumaimana achiclla tucuctapish, paihuan parlanacucuc ishcai runacunatapish ricucurcami.

³³ Chai ishcai runacuna Jesuspacmanta caruyacpica, Pedroca: —Yachachic, ñucanchicca allimi caiman shamushcanchic. Cunanca quimsa chucllata ruhuashun, shuctaca canman, shuctaca Moisesman, shuctaca Eliasman— nirca. Ashtahuanpish Pedroca pai ima nicushcata mana yacharcachu.

³⁴ Chashna nicucllapitacmi, puyu shamushpa paicunata taparca. Chaimantami manchaihuan carca.

³⁵ Chai puyu ucumanta shuc rimashca uyarishpaca: «Caimi ñuca cuyashca Churi. Pai ima nishcata uyanguichic» nirca.

³⁶ Chai rimashca uyarishca quipaca, Jesusllatami ricurcacuna. Chai ricushcataca, chai punzhacunapica piman mana huillarcachu.

Jesús supai japishca huambrata alliyachishcamanta

³⁷ Cayandi punzha urcumanta shamucpica, achca gentecunami tupangapac shamurca.

³⁸ Chai shamuccunapuramanta shuc runa caparishpaca: —Yachachic, ñuca shuclla churita llaquiyari.

³⁹ Paitaca supai japishpami, yuyaita chingachishpa caparichicun. Shimiman puscuta shitachishpami, llaquinayaita punzhanta chucchuchicun.

⁴⁰ Ñami cambac yachacuccunaman supaita llucchishpa cachachun mañarcani. Shina mañacpipish, paicunaca mana pudircachu— nirca.

⁴¹ Chashna nicpimi Jesusca: —¡Aij, mana cric millai gentecunalla! ¿Ima punzhacamantac yachachicushalla? ¿Maicamantac cancunahuan llaquita apacushalla? Cambac churita pushamui— nirca.

⁴² Jesuspacman chai huambra cuchuyacucpica, cutinllatacmi supaica chucchuchishpa, pambaman urmachirca. Jesusca chai supaita sinchita rimashpami, llucchishpa cacharca. Chashnami alliyashca huambrata taitaman curca.

⁴³ Chai shina Diospac poderta ricushpami, tucui gentecuna mancharishpa saquirirca. Chashna tucui chaicunata ruhuashcata gentecuna ricushpa cushicuihuan cacpimi, Jesusca paipac yachacuccunataca:

Jesús, pai huañunamanta cutin huillashcamanta

⁴⁴ —Caita alli uyaichic, Runa Tucungapac shamushca ñucataca runacunamanmi japichinga— nirca.

⁴⁵ Yachacuccunaca Jesús chashna nishcataca mana entendircachu. Chaica, paicunaca chaita entendingapacca manarac yuyaita charircachu. Chashna mana entendishpapish, manchashpami mana tapurcacuna.

Maijan ashtahuan alli canamanta rimanacushcamanta

⁴⁶ Yachacuccunaca maijan ashtahuan alli canamantami rimanacurca.

⁴⁷ Jesús, paicuna chashna yuyacucta yachashpa, shuc huahuata japishpa, paipac ñaupapi

⁴⁸ churashpaca: —Maijanpish ñuca shutipi cai huahuata chasquicca, ñucatami chasquin. Maijanpish ñucata chasquicca, ñucata cachac Taitatami chasquin. Cancunapuramanta maijanpish yangalla nishcami, tucuimanta yalli alli nishca canga— nirca.

“Ñucanchicta mana piñacca, ñucanchic-huan alli cashcatami ricuchin” nishcamanta

⁴⁹ Juanca Jesustaca: —Yachachic, shuc runatami cambac shutipi supaicunata llucchishpa cachacucta ricurcanchic. Mana ñucanchicpura cashcamantami, ama chashna ruhuachun jarcarcanchic— nirca.

⁵⁰ Chaimantami Jesusca: —Chashna ruhuactaca ama jarcanguichicchu. Maijanpish mana ñucanchicta piñacca, ñucanchic-huanmi— nirca.

Jesús Jacobotapish, Juantapish rimashcamanta

⁵¹ Jesusca jahua pachaman rina punzha chayamucucpimi, Jerusalén puebloman rina yuyailla carca.

⁵² Chaimantami Jesusca huillaccunata ñaupachishpa cacharca. Chashnami Samaria llactapi tiyac uchilla llactaman pozanata mashcangapac chayarca.

⁵³ Ashtahuanpish Samaria llacta gentecunaca Jesús Jerusalenman ricucta yachashpami, mana chasquishun nircacuna.

⁵⁴ Chaimantami Jesuspac yachacuccunapuramanta Juanpish, Jacobopish: —Apunchic Jesús, caipi causaccunata tucuchichun, ¿Elías mañashca shina, jahua pachamanta ninata cachachun mañashunchu?— nirca.

⁵⁵ Chashna nicpi, Jesús tigraricushpaca: —Cancunaca imata rimaricushcatapish mana yachanguichicchu.

⁵⁶ Runa Tucungapac shamushca ñucaca, mana causaita chingachingapacchu shamurcani, ashtahuanpish causaita cungapacmi shamurcani— nirca. Chaimantaca shuc llactaman rircallami.

Jesusta catisha niccunamanta

⁵⁷ Ñanta ricucpimi, shuc runa Jesustaca: —Apunchic Jesús, can maita ricpipish catisha ninimi— nirca.

⁵⁸ Chashna nicpimi Jesusca: —Atuccunapish machaicunata charinmi. Volac animalcunapish cuzhacunataca charinmi. Ashtahuanpish Runa Tucungapac shamushca ñucaca, maipi umata samachinallatapish mana charinichu— nirca.

⁵⁹ Shinallatac Jesusca shuc runataca: —Jacu ñucahuan— nirca. Shina nicpimi, chai runaca: —Apunchic Jesús, ñuca taitatarac enterrangapac risha. Quipata catishallami— nirca.

⁶⁰ Chashna nicpimi Jesusca: —Huañushcacuna huañushcacunata enterrachun saqui. Canca, Dios mandacucmanta alli huillaita huillangapac shamui— nirca.

⁶¹ Cutin shuc runa shamushpaca: —Apunchic Jesús, canta catisha ninimi. Shina cashpapish, ñuca huasi caccunamanrac huillagrisha— nirca.

⁶² Chashna nicpimi Jesusca: —Maijanpish yapucushpa, huashata chapacca, mana Dios mandacucman yaicungachu— nirca.