SAN LUCAS 8 - Dios Rimashcata Quillcashcami

Jesusta servic huarmicunamanta

¹ Chai quipami Jesusca paipac chunga ishcai yachacuccunahuan pueblocunapipish, uchilla llactacunapipish Dios mandacucmanta alli huillaita huillashpa puricurca.

² Maijan huarmicunapish caticurcami. Maijan paicunamantami Jesusca supaicunata llucchishca carca. Maijancunataca ungüicunamantami alliyachishca carca. Chai huarmicunapurapica, Magdala pueblomanta Mariapishmi carca. Paimantami Jesusca canchis supaicunata llucchishca carca.

³ Herodespac mayordomo Chuzapac huarmi Juanapishmi carca. Shinallatac Susanapish, shuctac huarmicunapishmi carca. Paicunami imalla charishcacunahuan Jesusta ayudaccunami carca.

Jesús tarpuc runahuan chimbapurashpa parlashcamanta

⁴ Chican pueblocunamanmi achca gentecuna Jesuspacman shamurca. Paicunata Jesús chimbapurashca parlohuan yachachishpaca:

⁵ «Shuc tarpuc runami tarpungapac llucshirca. Pai tarpucucpica, asha muyuca ñanpimi urmarca. Chaipi sarurishpa siricucpimi, zhutacuna shamushpa mururca.

⁶ Cutin maijan muyuca rumi allpapimi urmarca. Chai muyu huiñashpapish, mana achca allpa tiyashcamantami chaquirca.

⁷ Cutin maijan muyuca casha chaupipimi urmarca. Shina cashpami, casha huiñashpa ñiticpica aguarirca.

⁸ Cutin maijan muyuca alli allpapimi urmarca. Chai muyuca sumacta huiñashpami, shuc muyumanta patsac granota pucurca» nirca. Chaicunata yachachishpami Jesusca: «Maijanpish ringrita chariccunaca, cai ñuca huillashcata alli uyaichic» nishpa, sinchita nirca.

Imapac Jesús yuyaita japina parlocunahuan parlashcamanta

⁹ Yachacuccuna Jesusta tapushpaca: —¿Cai chimbapurashca parloca, imatatac nisha nin?— nishpa tapurca.

¹⁰ Chashna tapucpica: —Cancunamanca pimanpish mana yachachishca Dios mandacucmantami yachachini. Ashtahuanpish shuctac runacunamanca paicuna ricushpapish, ama ricuchun, uyashpapish, ama uyachun, shinallatac ama entendichunmi, chimbapurashca parlocunahuan yachachini.

Jesús tarpuc runamanta parlashcata entendichishcamanta

¹¹ Cai chimbapurashca parloca caitami nisha nin: Muyuca, Dios rimashcami.

¹² Ñanpi urmashca muyuca uyaccunami. Shina uyacpipish, paicuna crishpa ama quishpirichunmi, Satanás shamushpa cungachin.

¹³ Rumi allpapi urmashca muyuca Dios rimashcata uyashpa cushilla chasquiccunami. Shina cashpapish mana ucuta sapiyashca cashpami, ashacamanlla crincuna. Chaica llaquicuna japicpica, mana catisha nishpa saquirincunami.

¹⁴ Casha chaupipi urmashca muyuca Dios rimashcata uyaccunami. Chashna uyashpapish ima cai pacha munaicuna, chayucyana yuyaicuna, cai causaillapi cushicuna yuyaicuna shamucpimi, mana pucuc muyu shina tucuncuna.

¹⁵ Ashtahuanpish alli allpapi urmashca muyuca Dios rimashcata tucui shunguhuan uyashpa, alli cazushpa mana cungariccunami. Chashnami, alli pucuc shina cancuna.

Ima pacalla ruhuashcapish ricurina cashcamanta

¹⁶ Maijanpish luzta japichishpaca, mana imahuan tapangapac japichinchu. Shinallatac mana cama ucupi churanchu. Ashtahuanpish ucuman yaicuccunata achicyachichunmi pata jahuapi churan.

¹⁷ Ima pacashcapish mana pacalla saquiringachu, tucuimi ricuringa. Tucui mana yachashcapish yacharinga.

¹⁸ Chaimanta cai uyashcata alli yuyarichic. Maijanpish alli yuyaita chariccunamanca ashtahuanmi cushca canga. Mana charicmantaca, pai charinimi nishcatapish quichushcami canga— nirca.

Jesuspac mamapish, huauquicunapish paipacman shamushcamanta

¹⁹ Jesuspac mamapish, huauquicunapish pai maipi cashcamanmi shamurca. Shina cashpapish achca gentecuna chaipi cacpimi, Jesuspacmanca mana chayai pudirca.

²⁰ Chaimantami Jesusmanca: —Cambac mama, cambac huauquicunami canhuan tupasha nishpa, canzhapi shuyacun— nishpa huillarca.

²¹ Chashna huillacpimi Jesusca: —Maijanpish Dios ima nishcata uyashpa, cazuccunami ñuca mama, ñuca huauquicuna— nirca.

Jesús huairatapish, jatun cucha yacutapish parachishcamanta

²² Shuc punzhami Jesusca paipac yachacuccunahuan canoapi tiyarishpaca: —Cai cucha yacuta pasashun— nirca.

²³ Cuchata canoapi ricushpami, Jesusca sueñurca. Chaipimi cungailla huaira jatarishpa, yacuta yallita cuyuchirca. Canoapipish yacu jundai callarircami. Canoaca ña ucuyanallami tucurca.

²⁴ Chaimanta yachacuccuna Jesuspacman cuchuyashpaca: —¡Yachachic, Yachachic, ñami ucuyagrinchic!— nishpa ricchachirca. Jesús riccharishpa, huairatapish, yacutapish rimacpica, casilla tucurcallami.

²⁵ Jesusca yachacuccunataca: —¿Ima nishpatac ñucata mana cringuichic?— nirca. Chashna nicpimi, yallita mancharishpa, caishuc chaishuc tapunacushpaca: —¿Pitac cai runa? Huairapish, yacupish pai nishcataca cazunmi— nishpa nircacuna.

Jesús Gadara llactapi supai japishca runata alliyachishcamanta

²⁶ Jesusca paipac yachacuccunahuanmi Galilea llacta chimba lado Gadara llactaman rirca.

²⁷ Chaiman chayashpa, canoamanta Jesús uricucpimi, pueblomanta shuc runa Jesuspacman shamurca. Chai runaca unai huatacunatami supaicuna japishca carca. Paica mana huasipi causarcachu. Churana illacllami panteonpi causac carca.

²⁸ Chai runa Jesusta ricushpa, paipac ñaupapi cungurishpaca: —Jahua pacha Diospac Churi Jesús, ¿imatatac nic shamungui? ¡Ñucataca ama llaquichichu!— nishpa caparirca.

²⁹ Jesús chai runamanta supaita “llucshi” nicucpimi, chashna caparirca. Tauca cutinmi chai supaica llaquichic carca. Chaimantami maquicunatapish, chaquicunatapish cadenacunahuan huatashpa charic carca. Chashna huatacpipish, cadenacunata pitishpami, shitashca pambaman supai apacpi, riclla carca.

³⁰ Chai runataca Jesusca: —¿Ima shutitac cangui?— nishpa tapurca. Shina nicpimi paica: —Ñucaca huaranga huaranga shutimi cani— nirca. Huaranga huaranga supaicuna japishca cashcamantami, chashna nirca.

³¹ Chai supaicunaca: —Ama ñucanchicta ucu pacha jutcuman cachaichu— nishpami mañarca.

³² Chai urcupica achca cuchicunami micushpa puricurca. Chaimantami supaicunaca chai cuchicunapi yaicuchun saquichun mañarca. Shina mañacpica, Jesusca yaicugrichun saquircallami.

³³ Supaicuna runamanta llucshishpaca cuchicunapimi yaicurca. Chaimantami quingraipi singushpa, yacupi aguarishpa huañurca.

³⁴ Chaita cuchicunata michiccunaca ricushpaca, callpa rishpami llactacunapipish, pueblocunapipish tucui ima tucushcata huillarca.

³⁵ Achca gentecunami ima tucushcata ricungapac Jesuspacman rirca. Paicuna chayashpaca, supaicunata llucchishca runa, alliyashpa yuyaipi Jesuspac ñaupapi tiyacuctami ricurca. Chaita ricushpaca, yallitami mancharirca.

³⁶ Supaicuna japishca runata ima shina Jesús alliyachishcata ricuccunami, chai shamuccunamanca tucui parlarca.

³⁷ Chashna parlacpimi, tucui Gadara llactamanta shamuccunaca yallita manchaihuan carca. Chaimantami Jesustaca chaimanta richun nirca. Chashna nicpimi, Jesusca canoapi yaicushpa rirca.

³⁸ Supaicunata llucchishca runapish paita pusharichunmi mañarca. Chashna mañacpimi Jesusca:

³⁹ —Huasiman cutishpa, Dios canta alliyachishcataca huillagri— nirca. Chashna nicpimi, chai runaca Jesús paita alliyachishcata, tucui pueblocunapi huillashpa purirca.

Jairopac ushimantapish, Jesuspac churanapi tuparic huarmimantapish

⁴⁰ Achca gentecunami Jesusta shuyacurca. Chaimantami pai cutimucpica, cushilla tuparca.

⁴¹ Jesús tandanacuna huasipi cacpimi, mandac Jairo Jesuspacman shamushpa cungurishpa, paipac huasiman richun mañarca.

⁴² Paipac shuclla ushimi ancha ungushca, carca. Chai ushica chunga ishcai huatayucmi carca. Jesús ricucpica, achca gentecunami paihuan pacta ñitirinacushpa ricurca.

⁴³ Chaipica, chunga ishcai huatata yahuar cacharirishpa causac ungushca huarmimi caticurca. Chai huarmica jambiccunapacman ricushpallami, tucui charishcacunata tucuchishca carca. Pi mana alli pudishcachu carca.

⁴⁴ Chai huarmi huashata shamushpami, Jesuspac churana puntapi tuparirca. Chaipica yahuar shamunaca jarcarircallami.

⁴⁵ Chaimantami Jesusca: —¿Pitac ñucapi tuparin?— nirca. Shina nicpica, tucui gentecunami “pi mana tuparinchicchu” nircacuna. Shina nicpimi Pedropish, paihuan caccunapish: —¿Yachachic, cai tucui gentecuna ñitirinacushpa, shamucushca jahuachu “¿pitac tuparin?” ningui?— nirca.

⁴⁶ Chashna nicpipish Jesusca: —Maijancharimi ñucapi tuparin. Ñucapac podermi ñucamanta llucshin— nirca.

⁴⁷ Chaimantami chai huarmica alliyashcata mana pacaipac cacpi, manchaihuan chucchushpa Jesuspac ñaupapi cungurishpa, churanapi imapac tuparishcatapish, alliyashcatapish chai tucui gentecunapac chaupipi huillarca.

⁴⁸ Chashna huillacpimi Jesusca: —Huahua, crishcamantami alliyashcangui. Cushicushpa rilla— nirca.

⁴⁹ Jesús chashna nicucllapitacmi, mandac Jairopac huasimanta shuc runa shamushpaca: —Cambac ushica ñami huañun. ¿Imapactac Yachachictaca piñachicungui? Saquilla— nirca.

⁵⁰ Chashna nicta Jesús uyashpaca: —Ama mancharichu, crilla. Cambac ushica causaringallami— nirca.

⁵¹ Jesús Jairopac huasiman chayashpaca, Pedrota, Jacobota, Juanta, huahuapac taita mamallatami pushashpa yaicurca. Shuccunataca mana yaicuchircachu.

⁵² Tucui gentecunami chai huahuamanta caparishpa huacacurca. Chaimantami Jesusca: —Ama huacaichicchu. Huahuaca mana huañushcachu, sueñucunllami— nirca.

⁵³ Tucui chaipi cac gentecunaca ña huañushca cashcata yachashcamantami, Jesusta burlashpa asirca.

⁵⁴ Ashtahuanpish Jesús chai huañushcata maquimanta japishpaca: —¡Huambra, jatari!— nishpami, sinchita nirca.

⁵⁵ Chashna nicpica causaita cuc samai cutimucpimi, chai huambraca causarishpa jatarirca. Chashna jataricpimi Jesusca: —Cunanca micunata caraichic— nirca.

⁵⁶ Chaita ricushpa, taita mancharicucpimi, Jesusca, pai alliyachishcata ama piman huillachun mandarca— nirca.