SAN LUCAS 7 - Dios Rimashcata Quillcashcami

Jesús soldadocunata mandacta servicta alliyachishcamanta

¹ Jesús chaipi cac gentecunaman tucuita parlashpaca, Capernaúm pueblomanmi rirca.

² Chaipica, Roma llactamanta patsac soldadocunata mandacpac cuyashca, shuc servicmi yallita ungushca carca.

³ Chai mandacca Jesusmanta parlanacucta uyashpami, israelcunata pushac yuyaccunata paipac servicta Jesús alliyachingapac, huasiman shamuchun rogachun cacharca.

⁴ Paicuna Jesuspacman chayashpa rogashpaca: —Soldadocunata mandactaca ayudanami cangui.

⁵ Paica ñucanchic llactata cuyacmi. Paillatacmi ñucanchic tandanacuna huasitapish shayachichirca— nishpa mañarca.

⁶ Jesús paicunahuan rishpa, ña huasiman chayagricucpica, chai soldadocunata mandacca paipac ricsishca runacunatami Jesusta tupachun cacharca. Paicunataca: —Apunchic Jesús, mana piñachisha ninichu. ¿Ñuca ima cacpitac, ñuca huasimanca shamugringuiyari?

⁷ Ñucaca mana cambac ñaupapi ricuripacmi cani. Chaimantami ñuca quiquin mana rircani. Ñuca servic alliyachun mandailla, chashna mandacpica alliyangallami.

⁸ Ñucapish mandachun churashcallami cani. Maijan soldadota ñuca “ri” nicpica, rinllami. Maijanta “shamui” nicpica, shamunllami. Ñuca servicta “imata ruhuai” nicpica, ruhuanllami ningui— nishpa cacharca.

⁹ Chashna nicta Jesús uyashpaca, macharishpami saquirirca. Chaimantami caticcunata ricushpaca: —Cashna crictaca, israelcunapurapish mana tarishcanichu, chaica chashnatacmi— nirca.

¹⁰ Chai cachashcacuna huasiman cutimushpaca, servic ña alliyashcatami ricurca.

Shuc viudapac cari huahuata Jesús causachishcamanta

¹¹ Chai quipami Jesusca Naín puebloman paipac yachacuccunahuan, achca gentecunahuan ricurca.

¹² Jesús chai puebloman ña yaicugricucpimi, shuc huañushca huambrata enterrangapac huandushpa ricurca. Chai huañushcaca viuda huarmipac shuclla cari huahuami carca. Achca gentecunami llaquilla enterrangapac ricurca.

¹³ Apunchic Jesusca chai viuda huarmi huacacucta ricushpa llaquishpaca: —Ama huacaichu— nirca.

¹⁴ Jesús cuchuyashpa, chai huandushcapi tuparicpica, huandushpa riccunaca shayarircami. Chashna cacpimi Jesusca: —Huambra, cantami jatari nini— nirca.

¹⁵ Chashna nicpimi, chai huañushca huambraca tiyarishpa, parlai callarirca. Paitaca mamamanmi curca.

¹⁶ Chaipi caccuna mancharishpa, Diosta pagui nishpaca: —Dios ima nishcata jatun huillacmi ñucanchic chaupipica ricurishca. Diosmi, pai acllashca gentecunata ricungapac shamushca— nircacuna.

¹⁷ Jesús chashna ruhuashcaca tucui Judea llactapi, muyundi llactacunapimi yacharirca.

Bautizac Juanpac yachacuccuna Jesusman tapushcamanta

¹⁸ Tucui chaicunataca, Bautizac Juanpac yachacuccunami Juanman huillarca.

¹⁹ Chaimanta Juan paipac yachacuccunapuramanta ishcaita cayashpa, Jesuspacman cachashpaca: «Cancuna rishpaca: “¿Canchu chai shamuna cashca Cristoca cangui? Mana cashpaca, ¿shuctachu shuyana canchic?” nishpa tapunguichic» nirca.

²⁰ Yachacuccuna Jesuspacman chayashpaca: —Bautizac Juanca: “¿Canchu chai shamuna cashca Cristoca cangui? Mana cashpaca, ¿shuctachu shuyana canchic?” nishpami, tapuchun cachan— nirca.

²¹ Chai ratollacmi Jesusca tauca ungushcacunatapish, supai japishcacunatapish, ñahui mana ricuccunatapish alliyachirca.

²² Jesús paicunata alliyachishpaca: —Juanpacman rishpa, cancuna imata ricushcatapish, uyashcatapish huillanguichic. Ñahui mana ricuccuna ricucushcatapish, suchucuna puricushcatapish, lepra ungüihuan caccuna alliyashcatapish, ringri mana uyaccuna uyacushcatapish, huañushcacunata causachishcatapish, huacchacunaman alli huillaita huillashcatapish huillanguichic.

²³ Cushicuichic, ñucata caticushcamanta mana pingaccuna— nirca.

²⁴ Juanpac cachashcacuna rishca quipa, Jesús Juanmanta gentecunaman parlashpaca: —Shitashca pambapica, ¿imatatac ricungapac rircanguichic? ¿Huairahuan cuyucuc carrizollatachu ricungapac rircanguichic?

²⁵ Chaica, ¿imatatac ricungapac rircanguichic? ¿Shuc alli churashca runatachu ricungapac rircanguichic? Ashtahuanpish alli churanata churashcacunaca cushillami jatun mandaccunapac huasipi causan.

²⁶ Shinashpaca, ¿imatatac ricungapac rircanguichic? ¿Diosmanta huillactachu ricungapac rircanguichic? Ari, chaitami ricurcanguichic. Juanca Dios ima nishcata huillactapish yallimi.

²⁷ Dios quillcachishcapi Juanmanta rimashpaca: “Ñuca ima nishcata huillactaca, ñaupachishpami cachani. Paimi purina ñantaca allichinga” ninmi.

²⁸ Cai pachapi huacharishcapurapica, Bautizac Juanmanta yalli alli huillacca manatac tiyashcachu. Chashna cacpipish, Dios mandacucpica, yangalla runami Juanta atishpa alli nishcaca. Chaica chashnatacmi can— nirca.

²⁹ Jesús chashna nicpica, tucui gentecunapish, impuestota japiccunacamanmi Dios cashcata ruhuac cashcata yacharcacuna. Chaimantami Juan bautizacucpica, paicunapish bautizarirca.

³⁰ Ashtahuanpish fariseocuna, mandashcacunata yachachiccunaca Dios ima paicunaman allita ruhuasha nishcataca mana chasquishun nircachu. Shinallatac Juan bautizacucpica, mana bautizarisha nircachu.

³¹ Shinallatac Jesusca: —Cunan punzhapi causaccunataca, ¿imahuan chimbapurasha? ¿Pi shinatac caicunaca?

³² Paicunaca plaza pambapi huambracuna shuc chaishuc caparishpa: “Flautapi tocacpipish, mana bailarcanguichicchu. Llaquillata cantacpipish, mana huacarcanguichicchu” nic shinami.

³³ Vinotapish mana ubiac, micunatapish mana micuc Bautizac Juan shamucpica, cancunaca: “Supaihuanmi can” ninguichicmi.

³⁴ Cutin, imatapish micuc, vinotapish ubiac Runa Tucungapac shamushca ñucataca: “Cai runaca imatapish yalli micuc, vinotapish ubiac, impuestota japiccunahuanpish, juchayuc gentecunahuanpish tandariclla” ninguichicmi.

³⁵ Ashtahuanpish Dios yachac cashcataca paita caticcunami ricuchicun— nirca.

Jesús Simonpac huasipi cashcamanta

³⁶ Shuc fariseo runami Jesusta paipac huasipi micuchun pusharirca. Chashnami fariseo runapac huasipi yaicushpa micungapac tiyarirca.

³⁷ Jesús fariseopac huasipi cacta shuc juchasapa huarmi yachashpami, alabastro rumi botella junda mishquilla ashnacucta apashpa shamurca.

³⁸ Chashnami Jesuspac huashata shamushpa, cungurishpa, huacashca huiquihuan chaquita jucuchirca. Chaimantaca acchahuan chaquichishpami, chaquipi mucharca. Shinallatac pai apamushca mishquilla ashnacuctami Jesuspac chaquipi churarca.

³⁹ Chaita, chai micungapac cayac fariseo ricushpaca: «Cai runa, Dios ima nishcata huillac cashpaca, paipac chaquipi tuparicuc huarmi pi cashcata, imalaya huarmi cashcata yachanmanmi. Cai huarmica yalli juchayuc huarmimi» nishpa yuyacurca.

⁴⁰ Chaimantami Jesusca chai fariseotaca: —Simón, caitami nisha nini— nirca. Shina nicpimi fariseoca: —Yachachic, nilla— nirca.

⁴¹ Chashna nicpimi Jesusca: —Shuc runami ishcai runacunaman cullquita mañachirca. Shuc runamanca pichca patsac denario cullquita, caishuc runamanca pichca chunga denario cullquita mañachirca.

⁴² Paicuna mañashca cullquita mana cutichi pudicpimi, chai mañachic runaca ishcai runatatac perdonarca. Chai ishcai runacunamantaca, ¿maijantac cullquita mañachic runataca, ashtahuan cuyanga? Chaita ni— nirca.

⁴³ Shina tapucpimi Simonca: —Maijanmi ashtahuan achcata mañac runami ashtahuan cuyanga, yuyanimi— nirca. Shina nicpimi Jesusca: —Ari, allitami nircangui— nirca.

⁴⁴ Chaimantami huarmita ricuchishpa, Simontaca: —¿Cai huarmi ruhuashcata ricunguichu? Ñuca cambac huasiman yaicumucpica, chaquita jahuangapacca yacullatapish mana curcanguichu, ashtahuanpish cai huarmica paipac huiquihuanmi ñuca chaquitaca jucuchishpa acchahuan chaquichin.

⁴⁵ Canca mana mucharcangui, ashtahuanpish cai huarmica yaicumushcahuanmi, ñuca chaquita muchanata mana saquishca.

⁴⁶ Mana ñuca umapi aceiteta churarcanguichu, ashtahuanpish cai huarmica mishquilla ashnacuctami ñuca chaquipica churan.

⁴⁷ Chaimantami cashna nini: Paipac achca juchacunata perdonashca cashcamantami, paica ashtahuan cuyan. Ashtahuanpish ashalla juchacunata perdonashcacunaca, ashallatami cuyan— nirca.

⁴⁸ Shina nishpa, chai huarmitaca: —Cambac juchacunataca ña perdonanimi— nirca.

⁴⁹ Shina nicpimi, Jesus-huan mizapi micucuccunaca: —Cai runaca, ¿pi cashpatac juchacunatapish perdonan?— ninacurca.

⁵⁰ Chaimantami Jesusca chai huarmitaca: —Can crishcamantaca, ña quishpichishcami cangui. Cunanca cushicushpa rilla— nirca.