SAN LUCAS 6 - Dios Rimashcata Quillcashcami

Yachacuccuna samana punzhapi trigo umata pitishcamanta

¹ Samana punzhapi Jesús trigo chagra chaupita ricucpimi, paipac yachacuccunaca trigo umata pitishpa, cacushpa micui callarirca.

² Chaimantami maijan fariseocunaca: —¿Ima nishpatac samana punzhapi mana ruhuanata ruhuacunguichic?— nirca.

³ Chashna nicpimi Jesusca: —Mandac David yarcaihuan cashpa, paihuan puriccunahuan imata ruhuashcataca, ¿manachu rezarcanguichic?

⁴ Paica Diosta mañana huasiman yaicushpami, Diosman cushca tandata micurca. Shinallatac paihuan puriccunamanpish curcami. Chai tandataca mana pipish micunallachu carca, ashtahuanpish curacunallami micuna carca— nirca.

⁵ Shinallatac Jesusca: —Runa Tucungapac shamushca ñucaca, samana punzhapipish mandai pudinimi— nirca.

Jesús maqui chaquishca runata alliyachishcamanta

⁶ Shinallatac shuctac samana punzhapipish Jesusca israelcuna tandanacuna huasiman yaicushpami yachachicurca. Chaipimi alli lado maqui chaquishca shuc runa tiyacurca.

⁷ Mandashcacunata yachachiccunapish, fariseocunapish samana punzhapi chai runata Jesús alliyachictami ricuracurca. Chaica, samana punzhapi alliyachicpica, juchanchingapacmi chaparacurca.

⁸ Jesusca paicuna chashna yuyacucta yachashpami, chai maqui chaquishca runataca: —Jatarishpa, caipi caccunapac chaupipi shayari— nirca. Shina nicpica, chai runaca shayarircallami.

⁹ Jesusca chaipi caccunataca: —Cancunataca caillata tapusha: ¿Samana punzhapica, allitachu ruhuana, mana cashpaca mana allita ruhuanachu alli canga? ¿Huañuimanta quishpichinachu, mana cashpaca, causaita quichunachu alli canga?— nirca.

¹⁰ Jesús chaipi caccunata muyundita ricushpa, chai runataca: —Maquita chutai— nirca. Shina nicpi, chai runa maquita chutacpica, maquica alli tucurcallami.

¹¹ Chaimantami yallita piñarishpa, Jesusta ima shina huañuchinata yuyarinacurca.

Jesús chunga ishcai apostolcunata acllashcamanta

¹² Chai punzhacunapimi Jesusca Diosta mañangapac urcuman rirca. Chaipica tucui tutami Diosta mañarca.

¹³ Ña punzhayamucpimi, yachacuccunata cayashpa, paicunamantaca chunga ishcaita acllashpa, apostolcunata shutichirca.

¹⁴ Paicunaca: Pedro nishca Simón, Simonpac huauqui Andrés, Jacobo, Juan, Felipe, Bartolomé,

¹⁵ Mateo, Tomás, Alfeopac churi Jacobo, Simón Celote,

¹⁶ Jacobopac huauqui Judas, Judas Iscariotemi carca. Quipamanca paimi Jesustaca huañuchiccunaman japichirca.

Jesús achca gentecunata yachachishcamanta

¹⁷ Jesús paicunahuan urcumanta shamushpaca, shuc pambamanmi chayarca. Chai pambamanmi paipac yachacuccunapish, Judea llactamantapish, Jerusalén pueblomantapish, mama cucha lado Tiro llactamantapish, Sidón llactamantapish achca gentecuna Jesús yachachishcata uyangapac, ungüicunamanta alliyangapacpish shamushca carca.

¹⁸ Millai supaicuna japishca cashcamanta llaquihuan caccunatapish alliyachircami.

¹⁹ Alliyachiclla cashcata yachashpami, tucui gentecuna Jesuspi tuparina yuyailla carca.

Huacaccunaca cushilla, cushicuccunaca llaquilla canamanta

²⁰ Jesús paipac yachacuccunata ricushpaca: «¡Cushicuichic, huacchacuna! Jahua pacha Dios mandacucca cancunapacmi.

²¹ ¡Cunan yarcaihuan caccunaca cushicuichic! Mana nictami micunguichic. ¡Cunan huacaccunaca cushicuichic! Cushicushpa asinguichicmi.

²² Runa Tucungapac shamushca ñucamanta gentecuna piñacpipish, llucchishpa cachacpipish, camicpipish, ima millaita rimacpipish, ¡cushicuichic!

²³ Cancunata chashna llaquichicpipish, ¡cushicuichiclla! Diosca jahua pachapica, cancuna japina cashcataca achcatami cunga. Dios ima nishcata huillaccunatapish chai shinallatacmi ñaupa taitacunaca llaquichic carca.

²⁴ ¡Chayuccunalla, imachari tucunguichic! Cancunaca ñami charishcahuan cushicushcanguichic.

²⁵ ¡Cunan mana nicta micuccunalla, imachari tucunguichic! Cancunaca yarcaihuanmi canguichic. ¡Cunan cushicushpa asiccunalla, llaquihuanmi huacanguichic!

²⁶ ¡Tucui gentecunapac alli nishcacunalla, imachari tucunguichic! Chai shinallatacmi ñaupa taitacunapish, llullac huillaccunataca alli nic nirca.

Piñaccunata cuyanamanta

²⁷ Caipi ñucata uyaccunataca cashnami nini: Cancunata piñaccunata cuyaichic. Mana ricunayachiccunaman allita ruhuaichic.

²⁸ Cancunata sinchita rimacpica, sumac rimaicunahuan cutichichic. Cancunata camiccunamanta Diosta mañanaichic.

²⁹ Canta shuc lado jazhapi huactacpica, caishuc ladopipish huactachun saquingui. Cambac jahualla churanata quichucpica, ucu churanatapish apachun saquingui.

³⁰ Maijan imata mañacpipish cungui. Maijan canmanta imata quichucpipish, upalla saquingui.

³¹ Ima shinami shuccuna cancunaman allita ruhuachun ninguichic, chashnallatac cancunapish shuccunaman allita ruhuaichic.

³² Cancunata cuyaccunallata cuyashpaca, ¿ima allitatac ruhuanguichic? Diosta mana cazuccunapish paicunata cuyaccunataca cuyancunami.

³³ Allita ruhuaccunallata cuyashpaca, ¿ima allitatac ruhuanguichic? Diosta mana cazuccunapish chashnaca ruhuancunami.

³⁴ Imatapish cutichipaccunallaman mañachishpaca, ¿ima allitatac ruhuanguichic? Diosta mana cazuccunapish chashnaca mañachinacuncunami.

³⁵ Cancunata piñaccunata cuyaichic, paicunaman allita ruhuaichic. Imata mañachishpaca, ama chasquina yuyaihuan caichicchu. Chashna ruhuashpami, allicunata japinguichic. Jahua pacha Diospac huahuacunapishmi canguichic. Diosca mana paita pagui niccunatapish, millaicunatapish llaquinmi.

³⁶ Chashnallatac Dios ima shinami cancunata llaquin, chai shinallatac shuccunata llaquichic.

Mana juchanchina cashcamanta

³⁷ Ama shuccunata juzgaichichicchu. Shina mana juzgacpica, Diospish cancunata mana juzgangachu. Ama shuccunata juchanchichicchu. Shina mana juchanchicpica, Diospish cancunata mana juchanchingachu. Shuccunata perdonaichic. Chashna perdonacpica, Diospish cancunapac juchacunata perdonangami.

³⁸ Shuccuna ima minishtishcata cuichic, Chashna cucpica, Diospish cancunaman cungami. Paica alli medidapimi jatun cushtalpi alli cuyuchishpa jundachishpa, talliricucta cunga. Cancuna cushca shinallatacmi Diosca cancunamanpish cunga» nirca.

³⁹ Jesús chimbapurashca parlohuan parlashpaca: «¿Shuc ñahui mana ricuc runaca caishuc mana ricuc runata pushai pudingachu? ¿Manachu ishcaitac mai jutcupi urmanman?

⁴⁰ Yachacucca yachachicta mana yallichu. Shina cashpapish tucuita alli yachacushpaca, yachachic shinallatacmi tucunga.

⁴¹ ¿Ima nishpatac cambac ñahuipi tiyacuc caspita ricushpa, shucpac ñahuipi tiyacuc ucshatarac ricungui?

⁴² Cambac ñahuipi tiyacuc caspita manarac ricushpaca, ¿ima shinatac cambac huauquitaca: “Shuyai, cambac ñahuipi tiyacuc ucshata llucchisha” ningui? Mishqui shimi, jayac shungu, cambac ñahuipi tiyacuc caspitarac llucchi. Chashna llucchishpami, alli ricushpa, cambac huauquipac ñahuipi tiyacuc ucshataca llucchingui.

Yuraca pucushpa ricuchic cashcamanta

⁴³ Alli yuraca, mana alli granota mana pucunchu. Mana alli yurapish, mana alli granota pucunchu.

⁴⁴ Yuraca pucushpami ima yura cashcata ricuchin. Higoca, mana casha yurapi pucunchu. Uvaspish chini yurapica mana pucunchu.

⁴⁵ Alli runaca, shungupi alli yuyaiyuc cashcamantami allita riman. Mana alli runaca shungupi millai yuyai junda cashcamantami mana allita riman. Shungupi ima tiyashcatami shimica riman.

Jesús ishcai huasichiccunamanta parlashcamanta

⁴⁶ Cancunaca, ¿ima nishpatac Apunchic Jesús, Apunchic Jesús nicushpapish, mandashcataca mana pactachinguichic?

⁴⁷ Maijanpish ñucapacman shamushpa, ñuca nishcata uyashpa cazucca,

⁴⁸ ucuta allashpa, rumi allpapi huasichic runa shinami. Chai huasica sinchi rumi allpapimi ruhuashca. Chaimantami achca yacu shamushpa huactarishpapish, yacu jundashpapish mana imata ruhuanchu.

⁴⁹ Maijanpish ñuca nishcata uyashpapish mana cazucca, mana ucuta allashpa, cabia allpapi huasichic runa shinami. Chai huasita achca yacu shamushpa huactarishpaca, tucui urmachinllami. Chaica yalli llaquimi» nirca.