SAN LUCAS 4 - Dios Rimashcata Quillcashcami

Jesusta diablo pandachisha nishcamanta

¹ Jesusca Jordán yacumantaca Diospac Espíritu jundami cutirca. Diospac Espiritumi shitashca pambaman pusharca.

² Chaipi chuscu chunga punzhata cacpimi, Satanasca pandachisha nirca. Chai punzhacunata mana micushca cashpami, Jesusca yarcachirca.

³ Chaipimi Satanasca Jesustaca: —Can Diospac Churi cashpaca, cai rumita tanda tucuchun niyari— nirca.

⁴ Chashna nicpimi Jesusca: —Dios quillcachishcapica: “Runaca mana tandallahuanchu causanga” ninmi— nirca.

⁵ Chaimanta Satanasca jatun urcu jahuaman Jesusta pushashpami, shuc ñahui quimllaillapi cai pacha tucui llactacunata ricuchirca.

⁶ Chashna ricuchishpaca: —Cai tucui sumac llactacunata mandanataca ñucamanmi cushca. Chaimanta ñucaca piman cusha nishpaca cushallami.

⁷ Can ñucata cungurishpa adoracpica, tucui caicunata canmanmi cusha— nirca.

⁸ Chashna nicpimi Jesusca: —Dios quillcachishcapica: “Canta Mandac Diosllata adorangui, paillata servingui” ninmi— nirca.

⁹ Chaimantaca Satanasca Jesusta Jerusalén puebloman pushashpa, Diosta mañana huasi jahuapi churashpaca: —Can Diospac Churi cashpaca, caimanta shitari.

¹⁰ Dios quillcachishcapica: “Ama huactarichunca, Diosca paipac angelcunatami jarcachun cachanga.

¹¹ Can ama chaquillatapish rumipi chugririchunca, paicunami maquipi chasquinga” ninmi— nirca.

¹² Shina nicpimi Jesusca: —Dios quillcachishcapica: “Mandac Diosta, ama pandachisha nichun” ninmi— nirca.

¹³ Satanasca Jesusta pandachisha nicushpapish mana pudishpaca, asha punzhacunacaman saquishpa rircami.

Jesús Galilea llactapi huillai callarishcamanta

¹⁴ Jesusca Diospac Espiritupac poderhuanmi Galilea llactaman cutirca. Paimantaca tucui llactacunapimi parlanacurca.

¹⁵ Jesusca israelcuna tandanacuna huasicunapipish yachachircami. Chaimantami tucui gentecuna paitaca “alli yachachicmi” nic carca.

Nazaret pueblopi Jesusta mana crishcamanta

¹⁶ Jesusca pai huiñashca Nazaret pueblomanmi rirca. Chaipimi utcaman ric cashca shinallatac samana punzhapi israelcuna tandanacuna huasiman yaicurca. Chaipimi Dios quillcachishcata rezangapac shayarirca.

¹⁷ Pai rezachunca, Dios ima nishcata huillac Isaías quillcashcatami curca. Chaita pascashpa ricushpaca:

¹⁸ “Ñucaca Diospac Espirituhuanmi cani. Diosca huacchacunaman alli huillaita huillachunmi ñucataca acllashca. Shungupi llaquilla causaccunata alliyachichunmi cacharca. Prezucunata cacharinata huillachun, ñahui mana ricuccunata ricucta ruhuachun, llaquichishca causacuccunata llaquimanta cacharichichunmi cacharca.

¹⁹ Chashnallatac Dios quishpichina punzha chayamushcata huillachunmi, ñucataca cacharca” nishcatami rezarca.

²⁰ Chai quillcashcata pillushpa huacaichic runaman cushpami, chaipi tiyarirca. Chaipi caccunaca Jesusta ricuracurcami.

²¹ Chaimantami Jesusca: —Cunanmi, cai cancunapac ñaupapi rezashcaca pactashca— nirca.

²² Shina sumacta rimashcamantami, tucui uyaccunaca mancharishpa, Jesusmanta allita rimarcacuna. Chaimantami caishuc chaishuc tapushpaca: —¿Caica manachu Josepac churi?— ninacurca.

²³ Chashna nicucpimi Jesusca: —Maijancunaca: “Jambic runa, canllatac jambiri. Capernaúm pueblopi tucui ruhuashcacunatami uyarcanchic. Cai, can huiñashca llactapipish chashnallatac ruhuaiyari” nicunguichicmi— nirca.

²⁴ Shinallatac Jesusca: —Dios ima nishcata huillactaca, quiquin llactapi causaccunallatacmi mana uyashun nincuna. Chaica chashnatacmi can.

²⁵ Elías huillacui punzhacunapica, Israel llactapica, achca viuda huarmicunami tiyarca. Chai punzhacunapi quimsa huata, sucta quillata mana tamyacpica, tucui llactacunapimi yarcai tiyarca. Chaica, chashnatacmi carca.

²⁶ Chashna Israelpi achca viuda huarmicuna tiyacpipish, Diosca mana Eliasta ayudachun cacharcachu, ashtahuanpish Sidón pueblo cuchullapi tiyac Sarepta pueblopi causac viuda huarmipacllamanmi cacharca.

²⁷ Eliseo huillacui punzhacunapi, Israelpi achca lepra ungüihuan caccuna tiyacpipish, Eliseoca shucllatapish mana alliyachircachu, ashtahuanpish Siria llactamanta Naamanllatami alliyachirca— nirca.

²⁸ Chaita uyashpami, tucui tandanacuna huasipi caccunaca yallita piñarirca.

²⁹ Chaimantami huaica jatarishpa, Jesusta chai pueblomanta llucchishpa, ucu huaicuta shitangapac aparcacuna. Chai puebloca urcu jahuapimi carca.

³⁰ Chashna apacpipish, Jesusca paicunapac chaupillatatacmi rirca.

Jesús supai japishca runata alliyachishcamanta

³¹ Jesusca Galilea llacta Capernaúm puebloman rishpami, samana punzhacunapi yachachicurca.

³² Jesús poderhuan sinchita yachachicpimi, tucui uyaccunaca mancharishpa saquirirca.

³³ Israelcuna tandanacuna huasipica, millai supai japishca runami tiyacurca. Chai runa

³⁴ caparishpaca: —Nazaret pueblomanta Jesús, ¿canca imatatac ñucanchictaca nic shamungui? ¿Llaquichingapacchu shamungui? ¡Ñucanchictaca saquilla! Ñucaca canta ricsinimi. Canca Dios cachashca Jucha Illacmi cangui— nirca.

³⁵ Chashna nicpimi Jesusca: —¡Upallai, cai runamanta llucshi!— nirca. Shina nicpimi, supaica chai runata tucuipac ñaupapi pambaman shitashpa, mana ashtahuan imata ruhuashpa, llucshishpa rircalla.

³⁶ Chashna ruhuacpi, chaipi caccunaca: —Cai runaca, ¿ima shinatac chashna rimarin? ¿Ima poderhuantac supaicunataca rimashpalla llucchishpa cachan?— nishpa tapunacurca.

³⁷ Chaimantami tucui llactacunapi Jesusmanta parlanacurca.

Pedropac suegrata Jesús alliyachishcamanta

³⁸ Jesusca chai tandanacuna huasimanta llucshishpaca, Simonpac huasimanmi yaicurca. Chaipimi Simonpac suedra fiebrehuan ancha ungushca carca. Chaimantami Jesusta alliyachichun mañarca.

³⁹ Jesusca chai ungushcapacman cuchuyashpami, chai ungüita rimarca. Chai ungüi anchuricpimi, alliyashpa, paicunaman micunata cararca.

Jesús achca ungushcacunata alliyachishcamanta

⁴⁰ Ña inti tigracucpimi, tucuilaya ungüicunata Jesuspacman apamurca. Jesusca tucui ungushcacunapac uma jahuapi maquita churashpami alliyachirca.

⁴¹ Achca runacunamantami supaicunaca llucshirca. Chai supaicuna llucshishpaca: —¡Canca Diospac Churimi cangui!— nishpami caparirca. Chaimantami Jesusca: —¡Upallaichic!— nirca. Cristo cashcata yachashcamantami, supaicunataca mana imata rimachun saquirca.

Jesús Galilea llactapi huillashcamanta

⁴² Jesusca ña achicyamucucpimi, chaimanta llucshishpa, shitashca pambaman rirca. Chaimantami gentecuna mashcashpa, Jesús maipi cashcaman chayashpaca, ama maiman richun jarcanata munarca.

⁴³ Ashtahuanpish Jesusca: —Ñucaca shuctac pueblocunapipish Dios mandacucmanta alli huillaitaca huillagrinami cani. Chashna huillachunmi, Diosca cacharca— nirca.

⁴⁴ Chashnami Jesusca Galilea llacta tandanacuna huasicunapi huillashpa purirca.